മോഹൻലാൽ അഭിനയിക്കുന്നത് കണ്ട് പഠിക്കണം- സേതുപതി; വൈറലായ ഫേസ്ബുക്ക് പോസ്റ്റ് വായിക്കാം…
ലോകമെങ്ങുമുള്ള മലയാളി പ്രേക്ഷകരുടെ ഇഷ്ടതാരാണ് മോഹൻലാൽ. സിനിമ പ്രേമികൾ മാത്രമല്ല സിനിമ നടന്മാരും അദ്ദേഹത്തിന്റെ വലിയ ആരാധകരാണ്.. തമിഴ് സിനിമയുടെ മക്കൾ സെൽവൻ, വിജയ് സേതുപതിക്കും ആരാധകർ ഏറെയാണ്. തമിഴകത്തെ മാത്രമല്ല മലയാളത്തിലെയും പ്രിയപ്പെട്ടവനാണ് മക്കൾ സെൽവൻ വിജയ് സേതുപതി.
അഭിനയത്തിലെ മികവും കഥാപാത്രങ്ങൾ തിരഞ്ഞെടുക്കുന്നതിലെ വ്യത്യസ്തതയും കൊണ്ടുമാത്രമല്ല അദ്ദേഹത്തിന്റെ ലാളിത്യം കൊണ്ടും ആരാധകരോടുള്ള അദ്ദേഹത്തിന്റെ സ്നേഹം കൊണ്ട് കൂടിയുമാണ് വിജയ് സേതുപതി ആരാധകരുടെ പ്രിയപ്പെട്ടവനാക്കുന്നത്. എന്നാൽ മലയാളത്തിന്റെ സ്വകാര്യ അഹങ്കാരമായ മോഹൻലാലിനെ കാണാൻ ആഗ്രഹം പ്രകടിപ്പിച്ച വിജയ് സേതുപതിയാണ് ഇപ്പോൾ സമൂഹ മാധ്യമങ്ങളിൽ ചർച്ചയാകുന്നത്. പ്രൊഡക്ഷൻ കൺട്രോളർ സിദ്ധു പനയ്ക്കൽ അദ്ദേഹത്തിൻറെ ഫേസ്ബുക്കിൽ പങ്കുവെച്ച കുറിപ്പിലാണ് ഈ രസകരമായ അനുഭവം പങ്കുവെച്ചിരിക്കുന്നത്.
മോഹൻലാലിനെ കാണാൻ ആഗ്രഹം പ്രകടിപ്പിച്ച വിജയ് സേതുപതിയോട് ഇപ്പോൾ അദ്ദേഹം ഫ്രീ ആണെന്നറിയിച്ചപ്പോൾ എനിക്ക് അദ്ദേഹത്തെ കാണേണ്ടത് കാരവാനിലല്ല, അദ്ദേഹം അഭിനയിക്കുമ്പോഴാണ്. തനിക്ക് അദ്ദേഹത്തിന്റെ അഭിനയം കണ്ട് പഠിക്കേണ്ടതുണ്ടെന്ന് സേതുപതി പറഞ്ഞതായും സിദ്ധു പനയ്ക്കൽ ഫേസ്ബുക്കിൽ കുറിച്ചു.
സിദ്ധു പനയ്ക്കലിന്റെ ഫേസ്ബുക്ക് കുറിപ്പ് വായിക്കാം..
മക്കൾ സെൽവനോടൊപ്പം…. ഇന്നലെ രാവിലെ രാമോജി ഫിലിംസിറ്റിയിൽ കുഞ്ഞാലിമരക്കാർ സെറ്റിന് പുറത്ത് ലാലേട്ടനെ കാത്ത് നിൽക്കുമ്പോൾ, ഒരു കാർ എന്നെയും കടന്നു മുന്നോട്ടു പോയി. നോക്കുമ്പോൾ ആ കാർ റിവേഴ്‌സ് വരുന്നു. കാറിൽ നിന്നിറങ്ങി വന്നത് fight മാസ്റ്റർ അനൽ അരസ്സ്. അനലുമായി വർഷങ്ങളുടെ ബന്ധമുണ്ട്‌. ഞാൻ വർക്ക്‌ ചെയ്ത ഒരു പടത്തിൽ ആണ് അനൽ സ്വതന്ത്ര മാസ്റ്റർ ആകുന്നത്‌.”മത്സരം”. അതിൽ പീറ്റർ ഹൈൻ ആയിരുന്നു മാസ്റ്റർ. അദ്ദേഹത്തിന് ഒരു തമിഴ് പടം വന്നപ്പോൾ അസിസ്റ്റന്റ് ആയ അനലിനെ പടം ഏൽപ്പിച്ചു പീറ്റർ മാസ്റ്റർ പോയി. അനൽ തന്റെ ജോലി നന്നായി പൂർത്തിയാക്കുകയും ചെയ്തു.
പൃഥ്വിരാജ് അഭിനയിച്ച”പുതിയമുഖം” ആണ് അനലിനെ മലയാളത്തിൽ അടയാളപ്പെടുത്തിയ സിനിമ. ഇപ്പോൾ ഹിന്ദി, തമിഴ് സിനിമകളിലെ മുടിചൂടാമന്നൻ ആണ് അനൽ. വിജയ്സേതുപതിയുടെ ഷൂട്ട്‌നാണ് മാസ്റ്റർ എത്തിയിരിക്കുന്നത്. മാസ്റ്റർ എന്നെയും വിളിച്ചു അവരുടെ സെറ്റിലേക്ക് പോയി. വിജയ്സേതുപതിയെ പരിചയപ്പെടുത്തി.
ലാലേട്ടന്റെ പടത്തിന്റെ ഷൂട്ട്‌ ആണ് നടക്കുന്നതെന്നറിഞ്ഞപ്പോൾ വിജയ് പറഞ്ഞു. എനക്ക് ഉടനെ അവരെ പാത്തകണം സാർ, നാൻ അവരുടെ പെരിയഫാൻ. അതിനെന്താ നമുക്ക് പോകാം. ലാലേട്ടൻ ഇപ്പോൾ ഫ്രീ ആണ് കാരവാനിൽ ഉണ്ട്. എനിക്ക് കാരവാനിൽ അല്ല കാണേണ്ടത് അദ്ദേഹം അഭിനയിക്കുന്നത് കാണണം. അത് കണ്ടു പഠിക്കണം. അഭിനയത്തിന്റെ സർവകലാശാലയാണ് അദ്ദേഹം. ലാലേട്ടനെ ഓർത്ത് എനിക്ക് അഭിമാനം തോന്നി. വിജയ് സേതുപതിയോട് ആദരവും. പെട്ടെന്നാരും ഇങ്ങനെ ഒരു തുറന്നുപറച്ചിലിനു തയ്യാറാവില്ല. അതും തന്റെ ഭാഷയിൽ ഔന്നത്യത്തിൽ നിൽക്കുന്ന ഒരു നടൻ. തനിയെ എന്നോട് മാത്രമായിട്ടല്ല. ആ പടത്തിന്റെ സംവിധായാകനും സഹനടന്മാരും ചുറ്റും നിൽക്കുമ്പോൾ.
വൈകീട്ട് അദ്ദേഹം സെറ്റിൽ വന്നു. കുറെ നേരം ലാലേട്ടന്റെ അഭിനയം കണ്ടിട്ടാണ് മടങ്ങിയത്‌. നേരിട്ടും പ്രിയദർശൻ സാറിനൊപ്പം മോണിറ്ററിന്റെ മുന്നിലിരുന്നും.മറ്റു ഭാഷകളിലെ നടൻമാർക്ക് കണ്ടുപഠിക്കാൻ ഒരു അഭിനേതാവ് നമ്മുടെ ഭാഷയിൽ ഉണ്ടായി എന്നത്‌ മലയാളികൾക്കെല്ലാം അഭിമാനിക്കാവുന്ന കാര്യം തന്നെയാണ്.
