“കല്യാണം മുടക്കരുത്, മുടങ്ങാന്‍ അനുവദിക്കരുത്”: ചിരി പടര്‍ത്തി ‘പെണ്ണന്വേഷണം’ ടീസര്‍
ചലച്ചിത്രലോകത്ത് ശ്രദ്ധേയമാവുകയാണ് പെണ്ണന്വേഷണം എന്ന ചിത്രത്തിന്റെ ടീസര്‍. പൂര്‍ണ്ണമായും 360 ഡിഗ്രി ഷോട്‌സിലാണ് ടീസര്‍ ചിത്രീകരിച്ചിരിക്കുന്നത് എന്നതു തന്നെയാണ് ടീസറിന്റെ മുഖ്യ ആകര്‍ഷണം. നര്‍മ്മരഹസങ്ങള്‍ കോര്‍ത്തിണക്കിക്കൊണ്ടാണ് ടീസര്‍ ഒരുക്കിയിരിക്കുന്നതും. അതുപോലെ കേന്ദസര്‍ക്കാര്‍ പരസ്യങ്ങളുടെ ശൈലിയാണ് ടീസറിന്റെ അവതരണം.
പോസ്റ്റര്‍ ഡിസൈനിംഗിലൂടെ പ്രേക്ഷകശ്രദ്ധ നേടിയ അധിന്‍ ഒള്ളൂര്‍ ആദ്യമായി സംവിധാനം നിര്‍വ്വഹിക്കുന്ന ചിത്രമാണ് പെണ്ണന്വേഷണം. നിരവധി ഷോര്‍ട്ട് ഫിലിമുകള്‍ സംവിധാനം ചെയ്തിട്ടുണ്ടെങ്കിലും ഫീച്ചര്‍ ഫിലിമിന്റെ സംവിധാനത്തിലേക്ക് അധിന്‍ പ്രവേശിക്കുന്നത് ഇത് ആദ്യമാണ്. നേരത്തെ പുറത്തിറങ്ങിയ ചിത്രത്തിന്റെ ഫസ്റ്റ് ലുക്ക് പോസ്റ്ററും ഏറെ ശ്രദ്ധ നേടിയിരുന്നു.
9090 പ്രൊഡക്ഷന്‍സിന്റെ ബാനറില്‍ സൈനുല്‍ ആബിദാണ് ചിത്രത്തിന്റെ നിര്‍മ്മാണം. അധിന്‍ ഒള്ളൂര്‍ തന്നെയാണ് ചിത്രത്തിന്റെ തിരക്കഥയും ഒരുക്കിയിരിക്കുന്നത്. കോഴിക്കോട് പശ്ചാത്തലമാക്കിയാണ് ചിത്രമൊരുക്കുന്നത്. പെണ്ണ് അന്വേഷിച്ചു നടക്കുന്ന ഒരു ചെറുപ്പക്കാരന്റെ കഥയാണ് ചിത്രത്തിന്റെ മുഖ്യ പ്രമേയം.
Read more:കണ്ണും കാതും വായും പൊത്തി താരങ്ങള്‍; ആ വൈറല്‍ ചിത്രമെടുത്തത് ഇങ്ങനെ: വീഡിയോ
പുതുമുഖങ്ങളടക്കം നിരവധി താരനിരകള്‍ ചിത്രത്തില്‍ അണിനിരക്കുന്നുണ്ടെന്നാണ് പുറത്തുവരുന്ന റിപ്പോര്‍ട്ടുകള്‍. സജാദ് കാക്കു ആണ് ചിത്രത്തിന്റെ ഛായാഗ്രഹണം നിര്‍വ്വഹിക്കുന്നത്. എറിക് ജോണ്‍സണ്‍ ആണ് സംഗീത സംവിധാനം. ദിനു മോഹന്‍, സൈക്കു വിശ്വരാജ് എന്നിവരുടെതാണ് വരികള്‍. വിനീത് ശ്രീനിവാസന്‍ ചിത്രത്തില്‍ ഒരു ഗാനവും ആലപിച്ചിട്ടുണ്ട്.
