മറവി രോഗമുണ്ടോ..? തിരിച്ചറിയാം പരിഹരിക്കാം..
ജീവിതത്തിലെ തിരക്കുകൾക്കിടയിൽ സ്ഥിരമായി ചില കാര്യങ്ങൾ നാം മറക്കാറുണ്ട്. എന്നാൽ ഇതിനെ പലരും വേണ്ടത്ര സീരിയസായി കാണാറില്ല. മറവിരോഗം അഥവാ ഡിമെൻഷ്യ അത്ര ചെറിയ കാര്യമല്ല. അതേസമയം കേരളത്തിൽ മറവിരോഗം ബാധിക്കുന്നവരുടെ എണ്ണം ക്രമാതീതമായി ഉയർന്നുവരികയാണെന്നാണ് പഠനങ്ങൾ തെളിയിക്കുന്നത്. എന്നാൽ ജീവിത ശൈലിയിൽ ചെറിയ മാറ്റം വരുത്തിയാൽ ഇതിനെ ഒരു പരിധി വരെ തടയാനാകും.
മറവിരോഗത്തെ ഇല്ലാതാക്കാൻ ഏറ്റവും ശ്രദ്ധിക്കേണ്ടത് ഭക്ഷണകാര്യത്തിലാണ്. പോഷക ഗുണങ്ങളുള്ള ആഹാരങ്ങൾ ശീലമാക്കുന്നത് വഴി ഒരു പരിധി വരെ ഇതിനെ തടയാൻ സാധിക്കും. അതുപോലെ പുകവലി ശീലമുള്ളവരാണെങ്കിൽ അത് ഒഴിവാക്കാൻ ശ്രദ്ധിക്കണം. ശരീരത്തിലെ അവയവങ്ങളുടെ പ്രവർത്തനം കൃത്യമായി നടക്കുന്നുവെന്ന് ഉറപ്പുവരുത്തണം. കൊളസ്‌ട്രോൾ, രക്തസമ്മർദ്ദം, തൈറോയിഡ് എന്നിവ കൃത്യമായി പരിശോധിച്ച് ഇവയില്ലെന്ന് ഉറപ്പുവരുത്തണം.
ദിവസവും കൃത്യമായി വ്യായാമം ചെയ്യുന്നുവെന്ന് ഉറപ്പുവരുത്തണം. കഴിയുമെങ്കിൽ ദിവസവും കുറച്ച് സമയമെങ്കിലും നടക്കാൻ ശ്രമിക്കണം. അതുപോലെ ഡ്രൈവ് ചെയ്യുന്നതും, കൂടുതൽ ശ്രദ്ധ ആവശ്യമായ ചെസ്, സുഡോകു, പദപ്രശ്നം, അന്താക്ഷരി തുടങ്ങിയ തലച്ചോറിനെ ഉത്തേജിപ്പിക്കുന്ന പ്രവർത്തനങ്ങളിൽ ഏർപ്പെടാനും ശ്രദ്ധിക്കണം. എല്ലാ സമയങ്ങളിലും മാനസീകമായി ഉണർന്നിരിക്കാൻ ശ്രദ്ധിക്കണം.
പഴയ ചിത്രങ്ങൾ ആൽബങ്ങൾ എന്നിവ എടുത്തുവെച്ച് ആളുകളുടെ പേരുകൾ, സ്ഥലങ്ങൾ എന്നിവ ഓർത്തെടുത്ത് പറയാൻ ശ്രദ്ധിക്കണം. അതുപോലെ എന്തിനും ഏതിനും ഗൂഗിളിനെ ആശ്രയിക്കുന്നത് ഓഴിവാക്കണം. കൂടുതലും കാര്യങ്ങൾ സ്വന്തമായി ഓർത്തെടുക്കാൻ ശ്രമിക്കണം.
ദിവസവും ആറ് അല്ലെങ്കിൽ എട്ട് മണിക്കൂർ ഉറങ്ങാൻ പ്രത്യേകം ശ്രദ്ധിക്കണം. കൃത്യമായി ഉറങ്ങുന്നത് തലച്ചോറിന്റെ പ്രവർത്തനം കൃത്യമായി നടക്കാൻ സഹായിക്കും. കൗമാരക്കാർ എട്ട് മുതൽ ഒമ്പത് മണിക്കൂർ വരെ ഉറങ്ങണമെന്നാണ് വിദഗ്ദർ പറയുന്നത്. മസ്തിഷ്‌കം വളരുന്ന പ്രായമാണ് കൗമാരം. ആ സമയത്താണ് രോഗ പ്രതിരോഗ ശേഷി വർധിക്കുന്നത്. നല്ല ഉറക്കം ഓർമ്മ ശക്തി വർധിപ്പിക്കാനും സഹായിക്കും. മെലറ്റോണിൻ എന്ന ഹോർമോൺ രാത്രിയിലാണ് ഉത്പാദിപ്പിക്കപ്പെടുന്നത്. ഇത് കൗമാരക്കാരിൽ ഇതര പ്രായക്കാരേക്കാളും വൈകിയാണ് ഉത്പാദിപ്പിക്കാറുള്ളത്. അതുകൊണ്ടുതന്നെ നല്ല ഉറക്കം ഒരു കൗമാരക്കാരന് വളരെ അത്യാവശ്യമാണ്.
