പ്രണയവും ചിരിയും നിറച്ച് ‘ഷിബു’വിലെ വീഡിയോ ഗാനം
വെള്ളിത്തിരയിലേക്കെത്താന്‍ ഒരുങ്ങുന്ന പുതിയ ചിത്രമാണ് ‘ഷിബു’. കാര്‍ത്തിക് രാമകൃഷ്ണനും അഞ്ജു കുര്യനുമാണ് ചിത്രത്തില്‍ കേന്ദ്ര കഥാപാത്രങ്ങളായെത്തുന്നത്. മലയാളികളുടെ പ്രിയ ഹാസ്യ താരം ബിജുക്കുട്ടനു ഷിബു എന്ന ചിത്രത്തില്‍ പ്രധാന കഥാപാത്രമായെത്തുന്നുണ്ട്. ജൂണ്‍ 28 ന് ഷിബു തീയറ്ററുകളിലെത്തും. സിനിമയ്ക്കുള്ളിലെ സിനിമയുടെ കഥയാണ് ചിത്രത്തിന്റെ മുഖ്യ പ്രമേയം. അടുത്തിടെ പുറത്തിറങ്ങിയ ചിത്രത്തിന്റെ ട്രെയ്‌ലറും മികച്ച പ്രേക്ഷക സ്വീകാര്യത ലഭിച്ചിരുന്നു. ഇപ്പോഴിതാ പ്രേക്ഷകര്‍ക്കിടയില്‍ ശ്രദ്ധേയമാവുകയാണ് ചിത്രത്തിലെ പുതിയ ഗാനവും. പ്രണയവും നര്‍മ്മവുമൊക്കെ നിറച്ചാണ് ഗാനം ഒരുക്കിയിരിക്കുന്നത്.
ചിത്രത്തിലെ ഒരു പൂചെണ്ടു… എന്നു തുടങ്ങുന്ന ഗാനമാണ് പുറത്തെത്തിയിരിക്കുന്നത്. വിഗ്നേഷ് ബാസ്‌ക്കരനാണ് ഈ ഗാനത്തിന്റെ സംഗീതം നിര്‍വ്വഹിച്ചിരിക്കുന്നത്. വിനായക് ശശികുമാരിന്റേതാണ് ഗാനത്തിലെ വരികള്‍. അന്‍വര്‍ സാദ്ത് ആണ് ആലാപനം. ദൃശ്യഭംഗിയിലും ഗാനം ഏറെ മികച്ചുനില്‍ക്കുന്നു.
’32ാം അധ്യായം 23ാം വാക്യം’ എന്ന ചിത്രത്തിനു ശേഷം അര്‍ജുന്‍ പ്രഭാകരന്‍, ഗോകുല്‍ രാമകൃഷ്ണന്‍ എന്നിവര്‍ ചേര്‍ന്ന് സംവിധാനം നിര്‍വ്വഹിക്കുന്ന ചിത്രമാണ് ‘ഷിബു’. കാര്‍ഗോ സിനിമാസ് ആണ് ചിത്രത്തിന്റെ നിര്‍മ്മാണം. തീയറ്റര്‍ ജോലിക്കാരനായ അച്ഛനിലൂടെ സിനിമയെ പ്രണയിച്ചു തുടങ്ങുന്ന ഒരു ചെറുപ്പക്കാരന്റെ കഥയാണ് ‘ഷിബു’വിന്റെ മുഖ്യ പ്രമേയം. ഇഷ്ടനടനെ കേന്ദ്ര കഥാപാത്രമാക്കി ഒരു സിനിമ ചെയ്യണമെന്നതാണ് ഈ ചെറുപ്പക്കാരന്റെ ഏറ്റവും വലിയ ആഗ്രഹവും.
Read more:‘സാള്‍ട്ട് ആന്‍ഡ് പെപ്പറി’ന് തുടര്‍ഭാഗം; ‘ബ്ലാക്ക് കോഫി’യുമായി ബാബുരാജ്
നര്‍മ്മവും പ്രണയവുമെല്ലാം ചിത്രത്തില്‍ ഇടം നേടിയിട്ടുണ്ടെന്നാണ് അണിയറ പ്രവര്‍ത്തകരുടെ പ്രഖ്യാപനം. ഈ പ്രഖ്യാപനം ശരിവെയ്ക്കുന്ന തരത്തിലുള്ളതാണ് ചിത്രത്തിന്റെ പുതിയ ട്രെയ്‌ലറും. ഷിബു എന്ന ചിത്രത്തിലെ മറ്റ് രണ്ട് ഗാനങ്ങളും നേരത്തെ പുറത്തിറങ്ങിയിരുന്നു. മികച്ച പ്രേക്ഷക സ്വീകാര്യതയാണ് ഈ ഗാനങ്ങള്‍ക്കും ലഭിച്ചിരുന്നത്. നേരത്തെ പുറത്തെത്തിയ പുലരുംവരെ, അലിയുകയായി എന്നു തുടങ്ങുന്ന ഷിബുവിലെ രണ്ട് ഗാനങ്ങളുടെയും വരികള്‍ എഴുതിയിരിക്കുന്നത് മനു മഞ്ജിത്താണ്. പ്രണയാര്‍ദ്രമായിരുന്നു ഈ രണ്ട് ഗാനങ്ങളും. കെ എസ് ഹരിശങ്കര്‍, കാര്‍ത്തിക് എന്നിവരാണ് ഗാനങ്ങള്‍ ആലപിച്ചിരിക്കുന്നത്.
പ്രണീഷ് വിജയനാണ് ഷിബു എന്ന ചിത്രത്തിന് തിരക്കഥ ഒരുക്കിയിരിക്കുന്നത്. പാട്ടിലും ടീസറിലുമെല്ലാം പുലര്‍ത്തിയ മികവ് ചിത്രത്തിലുമുണ്ടായാല്‍ വെള്ളിത്തിരയിലെത്തുക മികച്ച ഒരു ഫാമിലി എന്റര്‍ടെയ്‌നര്‍ ആയിരിക്കും എന്ന കാര്യത്തില്‍ സംശയിക്കേണ്ടി വരില്ല.
