പാട്ടുപാടി അയ്യപ്പനും കോശിയും; പ്രോമോ ഗാനം പുറത്തുവിട്ട് മോഹൻലാൽ
ചിത്രത്തിന്റെ പേര് റിലീസ് ചെയ്തതുമുതൽ ആരാധകർ കാത്തിരിക്കുന്ന ചിത്രമാണ് പൃഥ്വിരാജും ബിജു മേനോനും പ്രധാന കഥാപാത്രങ്ങളെ അവതരിപ്പിക്കുന്ന ‘അയ്യപ്പനും കോശിയും’. ചിത്രം നാളെ തിയേറ്ററുകളിൽ എത്തുമ്പോൾ ചിത്രത്തിന്റെ പ്രോമോ ഗാനം പുറത്തുവിട്ടിരിക്കുകയാണ് മോഹൻലാൽ. പൃഥ്വിരാജും ബിജു മേനോനും ചേർന്ന് ആലപിക്കുന്ന ഗാനത്തിന്റെ വരികൾ തയാറാക്കിയിരിക്കുന്നത് ബി കെ ഹരിനാരായണനാണ്.
ചിത്രത്തിന്റെ പോസ്റ്ററുകളും, ഗാനങ്ങളും നേരത്തെ സമൂഹമാധ്യമങ്ങളിൽ ഇടംനേടിയിരുന്നു. ചിത്രത്തിനായി നഞ്ചിയമ്മ ആലപിച്ച ഗാനമാണ് ഏറെ പ്രേക്ഷക പ്രീതി പിടിച്ചുപറ്റിയത്. അതേസമയം ചിത്രത്തിന് വേണ്ടി അക്ഷമരായി കാത്തിരിക്കുകയാണ് അണിയറപ്രവർത്തകർ.
ഗോള്‍ഡ് കോയിന്‍ മോഷന്‍ പിക്‌ചേഴ്‌സിന്റെ ബാനറില്‍ രഞ്ജിത്തും പി എം ശശിധരനും ചേര്‍ന്നാണ് ചിത്രത്തിന്റെ നിര്‍മാണം. അന്നാ രേഷ്മാരാജന്‍, സിദ്ദിഖ്, അനുമോഹന്‍, ജോണി ആന്റണി, അനില്‍ നെടുമങ്ങാട്, തരികിട സാബു, ഷാജു ശ്രീധര്‍, ഗൗരി നന്ദ തുടങ്ങി നിരവധി താരങ്ങള്‍ ചിത്രത്തില്‍ കഥാപാത്രങ്ങളായെത്തുന്നു.
അതേസമയം തിയേറ്ററുകളില്‍ മികച്ച പ്രതികരണം നേടിയ അനാര്‍ക്കലി എന്ന ചിത്രത്തിന് ശേഷം സച്ചി- ബിജു മേനോന്‍- പൃഥ്വിരാജ് കൂട്ടുകെട്ടില്‍ ഒരുങ്ങുന്ന ചിത്രം എന്ന പ്രത്യേകതയും ‘അയ്യപ്പനും കോശിയും’ എന്ന സിനിമയ്ക്കുണ്ട്.
സബ് ഇന്‍സ്‌പെക്ടര്‍ അയ്യപ്പനായാണ് അയ്യപ്പനും കോശിയും എന്ന ചിത്രത്തില്‍ ബിജു മേനോന്‍ എത്തുന്നത്. പട്ടാളത്തില്‍ 16 വര്‍ഷത്തെ സര്‍വീസിന് ശേഷം നാട്ടിലെത്തിയ ഹവീല്‍ദാര്‍ കോശിയായ് പൃഥ്വിരാജും ചിത്രത്തിലെത്തുന്നു. മലയാള സിനിമയ്ക്ക് പൃഥ്വിരാജിനെ സമ്മാനിച്ച സംവിധായകന്‍ രഞ്ജിത്തും ചിത്രത്തില്‍ അഭിനയിക്കുന്നുണ്ട്. ‘അയ്യപ്പനും കോശിയും’ എന്ന ചിത്രത്തില്‍ പൃഥ്വിരാജിന്റെ അച്ഛനായാണ് രഞ്ജിത് എത്തുന്നത്. രഞ്ജിത് എഴുതി സംവിധാനം നിര്‍വഹിച്ച ‘നന്ദനം’ എന്ന ചിത്രത്തിലൂടെയായിരുന്നു പൃഥ്വിരാജിന്റെ ചലച്ചിത്രപ്രവേശനം. ഇപ്പോഴിതാ ഇരുവരും ഒരുമിച്ച് അഭിനയിക്കുകയാണ് ‘അയ്യപ്പനും കോശിയും’ എന്ന ചിത്രത്തില്‍.
