പാട്ടുപാടുന്ന ഈന്തപ്പനകൾ; കൗതുകമൊളിപ്പിച്ച് അബുദാബിയിലെ മരങ്ങൾ
വിനോദ സഞ്ചാരികളുടെ ഇഷ്ടകേന്ദ്രങ്ങളിൽ ഒന്നാണ് അബുദാബിയിലെ ലൂവ്ര് മ്യൂസിയം. വൈവിധ്യമാർന്ന കാഴ്ചകൾക്കൊപ്പം സാങ്കേതിക വിദ്യയുടെ ഉപയോഗവും ഈ മ്യൂസിയത്തിന്റെ പ്രത്യേകതയാണ്. ഇപ്പോഴിതാ പാട്ടുപാടുന്ന മരങ്ങളെ പരിചയപ്പെടുത്തുകയാണ് ഈ മ്യൂസിയം. അബുദാബിയിലെ ലൂവ്ര് മ്യൂസിയത്തിന് പുറത്തുള്ള ഈന്തപ്പനകളിലാണ് ഇനി മുതൽ സംഗീതം ഉയർന്ന് കേൾക്കുന്നത്.
ഈന്തപ്പനകള്‍ക്ക് അരികിലൂടെ നടക്കുമ്പോള്‍ ആരംഭിക്കുന്ന പാട്ട് ആളുകൾ അടുത്തെത്തുന്നതോടെ ഉയർന്നുകേൾക്കും. മരത്തെ കെട്ടിപ്പിടിക്കുന്നതോടെ പാട്ട് അതിന്റെ ഏറ്റവും ഉയർന്ന ശബ്ദത്തിലാകും.
പുതിയ ടെക്‌നോളജി നിലവിൽ വരുന്നതോടെ ഈ മ്യൂസിയം കൂടുതൽ ആളുകൾക്ക് സ്വീകാര്യമാകും. മനുഷ്യനും പ്രകൃതിയും തമ്മിലുള്ള അഭേദ്യമായ ബന്ധമാണ് ഇതു സൂചിപ്പിക്കുന്നത് എന്നാണ് മ്യൂസിയം അധികൃതരുടെ വാദം.
ഫ്രഞ്ച് തിയേറ്ററായ ഡൂ ഷാറ്റ് ലെറ്റും ലണ്ടൻ ആസ്ഥാനമാക്കി പ്രവർത്തിക്കുന്ന ഡിജിറ്റൽ കലാകാരന്മാരുടെ കൂട്ടായ്മയായ അംബ്രല്ലിയവും കൂടി ചേർന്നാണ് പുതിയ ടെക്‌നോളജി അവതരിപ്പിച്ചിരിക്കുന്നത്.
അതേസമയം ഈ പരിപാടിയുടെ ആദ്യ ഘട്ടമെന്ന നിലയിൽ 30 ഈന്തപ്പനകളിലാകും പാട്ടുകൾ ഒരുക്കുക. പിന്നീടത് മറ്റ് രാജ്യങ്ങളിലേക്കും വ്യാപിപ്പിക്കാൻ ആലോചിക്കുന്നുണ്ട്. 2024 ഒളിമ്പിക്സിന്റെ ഭാഗമായി പാരീസിലും പാട്ട് പാടുന്ന മരങ്ങൾ ഒരുക്കും. ഇപ്പോൾ പാട്ടുപാടുന്ന ഈ മരങ്ങൾക്ക് അഞ്ച് വർഷത്തെ കാലാവധിയാണ് കമ്പനി നൽകിയിരിക്കുന്നത്.
