ഇത് തിരിച്ചറിവിന്റെ കാലം; കൊവിഡ് പ്രതിരോധപ്രവര്‍ത്തനങ്ങള്‍ക്ക് കരുത്ത് പകര്‍ന്ന് സംഗീത വീഡിയോ: ശ്രദ്ധേയമായി ‘കാലം’
കൊവിഡ് 19 എന്ന മഹാമാരിക്കെതിരെ ചെറുത്തുനില്‍പ്പിനായുള്ള പോരാട്ടത്തിലാണ് ലോകം. മാസങ്ങളായി നാം ഓരോരുത്തരും അണി ചേര്‍ന്നിരിക്കുന്നു ഈ പോരാട്ടത്തില്‍. ശക്തമായ പ്രതിരോധപ്രവര്‍ത്തനങ്ങള്‍ തന്നെയാണ് നമ്മുടെ കൈമുതല്‍. കൊവിഡ് പ്രതിരോധപ്രവര്‍ത്തനങ്ങള്‍ക്ക് കരുത്ത് പകരുകയാണ് ഒരു സംഗീത വീഡിയോ.
കവിതാശൈലിയിലുള്ള ഈ ഗാനത്തിന്റെ പേര് കാലം എന്നാണ്. ‘ഇത് തിരിച്ചറിവിന്റെ കാലമാണ്. തിരിച്ചുവരാന്‍ ആഗ്രഹിക്കാത്ത കാലമാണ്’ എന്ന ഓര്‍മ്മപ്പെടുത്തലാണ് ഈ വീഡിയോ. രചന സുബ്രഹ്മണ്യത്തിന്റെ വരികള്‍ ഗാനത്തിന് കരുത്ത് പകരുന്നു. കോഴിക്കോട് സ്വദേശിനിയാണ് രചന സുബ്രഹ്മണ്യം.
ചലച്ചിത്രസംവിധായകനും നടനുമായ ജോണി ആന്റണിയുടെ മുഖവരയോടെയാണ് വീഡിയോ ആരംഭിയ്ക്കുന്നത്. കൊവിഡ് പ്രതിരോധ പ്രവര്‍ത്തനങ്ങളില്‍ സ്വന്തം ജീവന്‍പോലും മറന്ന് പ്രയത്‌നിയ്ക്കുന്ന ഡോക്ടര്‍മാരും നഴ്‌സുമാരും പാരാമെഡിക്കില്‍ ജീവനക്കാരും അടങ്ങിയ ആരോഗ്യപ്രവര്‍ത്തകര്‍ക്കും പൊലിസ് ഉദ്യോഗസ്ഥര്‍ക്കുമൊക്കെയുള്ള ആദരവ് കൂടിയാണ് ഈ ഗാനം. അഭി വേങ്ങരയാണ് കാവ്യഭംഗിയില്‍ ഗാനം മനോഹരമായി ആലപിച്ചിരിക്കുന്നത്.
Story highlights: kaalam song of Covid resistance
