‘ആശങ്കപ്പെടേണ്ട, എല്ലാവർക്കും അവസരമുണ്ടാവും’; താരങ്ങൾക്ക് ആശ്വാസമായി നായകൻ രോഹിത് ശർമയുടെ വാക്കുകൾ

പുതിയ നായകനായ രോഹിത് ശർമയുടെ കീഴിൽ വലിയ കുതിപ്പാണ് ഇന്ത്യൻ ടീം നടത്തിക്കൊണ്ടിരിക്കുന്നത്. വെസ്റ്റ് ഇൻഡീസിനും ശ്രീലങ്കക്കുമെതിരെയുള്ള ടി 20 പരമ്പരകൾ തൂത്തുവാരിയിരിക്കുകയാണ് ടീം ഇന്ത്യ. അതോടൊപ്പം നിരവധി റെക്കോർഡുകളും രോഹിതിന്റെ നേതൃത്വത്തിൽ ഇന്ത്യൻ ടീം നേടുകയുണ്ടായി. രോഹിത്തിന്റെ കീഴിൽ നിരവധി താരങ്ങൾക്ക് ടീമിൽ കളിക്കാനുള്ള അവസരവും രണ്ട് പാരമ്പരകളിലായി ഉണ്ടായിട്ടുണ്ട്.

ഇപ്പോൾ താരങ്ങളുടെ ടീമിലെ സ്ഥാനത്തെപ്പറ്റി രോഹിത് പറഞ്ഞ വാക്കുകളാണ് ചർച്ചയാവുന്നത്.
ഒന്നോ രണ്ടോ കളിയിലെ മോശം പ്രകടനം മൂലം ആരും പുറത്തിരിക്കേണ്ടി വരില്ലെന്നും ടീമിലെ സ്ഥാനത്തെക്കുറിച്ച് ആശങ്കപ്പെടേണ്ടെന്നും രോഹിത് പറഞ്ഞു.

“നമ്മള്‍ മുന്നോട്ട് കുതിക്കാനാണ് ശ്രമിക്കുന്നത്. അതുകൊണ്ടുതന്നെ ടീമിലെ സ്ഥാനത്തെക്കുറിച്ചോർത്ത് നിങ്ങള്‍ ആശങ്കപ്പെടേണ്ട. എല്ലാ വിടവുകളും നികത്തിയാകും നമ്മള്‍ മുമ്പോട്ടുപോകുന്നത്. അവസരം അർഹിക്കുന്നവരെ തേടിയെന്തായാലും വിളി വരും. ഈ പരമ്പരയില്‍ എല്ലാ ഘടകങ്ങളും ഒരുമിച്ചുവന്നു. ഞങ്ങൾ ഒരുമിച്ച് നന്നായി കളിച്ചു, ഒരുപാട് പോസിറ്റീവായ കാര്യങ്ങള്‍ സംഭവിച്ചു. കഴിഞ്ഞ ഒന്‍പത് മത്സരങ്ങളെടുത്ത് നോക്കൂ. ഏറെക്കുറെ എല്ലാവര്‍ക്കും അവസരം കിട്ടി. അതാണ് ഞങ്ങൾ ആഗ്രഹിച്ചത്. അവസരം കിട്ടുന്നവര്‍ അത് മുതലാക്കുമ്പോള്‍ ടീമിന് കൂടുതല്‍ കരുത്താകും”- രോഹിത് പറഞ്ഞു. പ്രതിഭാസമ്പന്നമായ ഇന്ത്യൻ ടീമിലെ സ്ഥാനത്തെ പറ്റി ആശങ്കപ്പെട്ടുകൊണ്ടിരിക്കുന്ന താരങ്ങൾക്ക് വലിയ ആശ്വസമാണ് രോഹിതിന്റെ വാക്കുകൾ നൽകുന്നത്.

Read More: മലയിടുക്കിൽ അകപ്പെട്ടപ്പോഴുള്ള അനുഭവങ്ങൾ ചിരിവേദിയിൽ തുറന്നുപറഞ്ഞ് ബാബു

ലങ്കക്കെതിരെയുള്ള ഇന്നലത്തെ വിജയത്തോടെ വലിയ ഒരു റെക്കോർഡ് ഇന്ത്യയെ തേടി എത്തിയിരിക്കുകയാണ്. നായകൻ രോഹിത് ശർമയുടെ നേതൃത്വത്തിൽ ഇന്ത്യ തുടര്‍ച്ചയായ 12-ാം ടി 20 മത്സരത്തിലാണ് ജയിക്കുന്നത്. ഇത് റെക്കോര്‍ഡ് നേട്ടമാണ്. തുടര്‍ച്ചയായി 12 അന്താരാഷ്ട്ര ടി 20 മത്സരങ്ങള്‍ വിജയിക്കുന്ന രണ്ടാമത്തെ ടീമാണ് ഇന്ത്യ.

Story Highlights: Rohit Sharma’s words to other players