ജോജുവിന്റെ മകളായി അനശ്വര; കൗതുകമായി ‘അവിയൽ’ ട്രെയ്‌ലർ
വെള്ളിത്തിരയിൽ തനിക്ക് ലഭിക്കുന്ന കഥാപാത്രങ്ങളെ അതിന്റെ പൂർണതയിൽ എത്തിക്കുന്ന കലാകാരനാണ് ജോജു ജോർജ്. അതുകൊണ്ടുതന്നെ താരത്തിന്റെ ചിത്രങ്ങൾക്കായി കാത്തിരിക്കാറുമുണ്ട് ആരാധകർ. ഇപ്പോഴിതാ താരത്തിന്റേതായി അണിയറയിൽ ഒരുങ്ങുന്ന ചിത്രത്തിന്റെ വിശേഷങ്ങളാണ് ആരാധകർ ഏറ്റെടുക്കുന്നത്. ജോജു ജോർജ് പ്രധാന കഥാപാത്രത്തെ അവതരിപ്പിക്കുന്ന ചിത്രമാണ് അവിയൽ. നവാഗതനായ ഷാനിൽ മുഹമ്മദ് സംവിധാനം ചെയ്യുന്ന ചിത്രം പോക്കറ്റ് എസ്ക്വയർ പ്രൊഡക്ഷൻസിൻസിന്റെ ബാനറിലാണ് നിർമ്മിക്കുന്നത്. സംവിധായകൻ തന്നെ തിരക്കഥയും ഒരുക്കിയിരിക്കുന്ന ചിത്രത്തിൽ ജോജുവിന് പുറമെ അനശ്വര രാജൻ, അഞ്ജലി നായർ, ആത്മീയ, കേതകി നാരായണൻ തുടങ്ങിയ താരങ്ങളും അണിനിരക്കുന്നുണ്ട്. ഇപ്പോഴിതാ സിനിമയുടെ ട്രെയ്‌ലർ പുറത്തുവിട്ടിരിക്കുകയാണ് അണിയറപ്രവർത്തകർ.
കണ്ണൂർ ജില്ലയിൽ ജനിച്ചു വളർന്ന കൃഷ്ണൻ എന്ന വ്യക്തിയുടെ ജീവിതം പറയുന്ന ചിത്രമാണ് അവിയൽ. സംഗീതത്തിനോട് അതിയായ സ്നേഹവും ആവേശവുമുള്ള ആളാണ് കൃഷ്ണൻ. അദ്ദേഹത്തിന്റെ ജീവിതത്തിലെ ബാല്യകാലം, കൗമാരം, യൗവനം, ഉൾപ്പെടെയുള്ള വിവിധ കാലഘട്ടങ്ങളെക്കുറിച്ചാണ് സിനിമ പറയുന്നത്. ഈ കാലഘട്ടങ്ങളെക്കുറിച്ച് പറയുന്ന ചിത്രം രണ്ട് വർഷങ്ങൾ കൊണ്ടാണ് പൂർത്തിയാക്കിയത്. സിനിമയിലേതായി കഴിഞ്ഞ ദിവസം പുറത്തുവന്ന ഗാനവും ഏറെ ശ്രദ്ധിക്കപ്പെട്ടിരുന്നു. സംവിധായകൻ ജിസ് ജോയ് ആണ് ഗാനത്തിന്റെ വരികൾ എഴുതിയിരിക്കുന്നത്. ആലപിച്ചിരിക്കുന്നത് സനൂപ് കളരിക്കലാണ്.
Read also: മീനൂട്ടിയുടെ റൊമാന്റിക് ഹീറോയെ വേദിയിലെത്തിച്ച് പാട്ട് വേദി, ചിരി നിമിഷം
അതേസമയം നേരത്തെ പുറത്തുവിട്ട ചിത്രത്തിന്റെ ടീസറിന് മികച്ച പ്രേക്ഷക പ്രശംസ ലഭിച്ചിരുന്നു. നിറയെ സസ്പെൻസ് നിറച്ചാണ് ചിത്രത്തിന്റെ ടീസർ ഒരുക്കിയിരിക്കുന്നത്. ചിത്രത്തെക്കുറിച്ച് ഒരു സൂചനയും നൽകാത്ത രീതിയിലാണ് ടീസർ ഒരുക്കിയത്. ഇപ്പോൾ പുറത്തുവന്ന സിനിമയുടെ ട്രെയ്‌ലറും ഏറെ കൗതുകം ഒളിപ്പിച്ചുകൊണ്ടാണ് പ്രേക്ഷകരിലേക്കെത്തുന്നത്.
അതേസമയം പടയാണ് ജോജു ജോര്ജിന്റേതായി അവസാനം പ്രേക്ഷകരിലേക്കെത്തിയ ചിത്രം. കുഞ്ചാക്കോ ബോബൻ പ്രധാന കഥാപാത്രമാകുന്ന സിനിമയിൽ വിനായകനും മുഖ്യകഥാപാത്രത്തെ അവതരിപ്പിക്കുന്നുണ്ട്. കേരളത്തിൽ നടന്ന യഥാർത്ഥ സംഭവങ്ങളെ ആസ്പദമാക്കിയുള്ള സിനിമയാണ് പട.
Story highlights: Joju movie aviyal trailer out
