ജയലളിതയായ് കങ്കണ; ‘തലൈവി’ ടീസറിന് വൻ വരവേൽപ്പ്

November 24, 2019

മുന്‍ തമിഴ്‌നാട് മുഖ്യമന്ത്രി ജയലളിതയുടെ ജീവിതകഥ പറയുന്ന പുതിയ ചിത്രമാണ്  ‘തലൈവി’. എഎല്‍ വിജയ് ആണ് ചിത്രത്തിന്റെ സംവിധായകന്‍. കങ്കണ റണാവത് ആണ് ചിത്രത്തില്‍ ജയലളിതയായി എത്തുന്നത്. ഇപ്പോഴിതാ ആരാധകർക്കിടയിൽ ശ്രദ്ധ നേടുകയാണ് ചിത്രത്തിന്റെ ടീസർ. ജയലളിതയുടെ സിനിമാ ജീവിതവും രാഷ്ട്രീയത്തിൽ സജീവമായതിന് ശേഷമുള്ള ജീവിതവും ചിത്രത്തിൽ പറയുന്നുണ്ടെന്ന് സൂചന നൽകുന്നതാണ് ചിത്രത്തിന്റെ ടീസർ. ജയലളിത അഭിനയിച്ച ഒരു പഴയ കാല ചിത്രത്തിലെ നൃത്തരംഗവും ടീസറിൽ ഉൾപ്പെടുത്തിയിട്ടുണ്ട്.

ജയലളിതയുടെ പിറന്നാള്‍ ദിനമായ ഫെബ്രുവരി 24- നാണ് പുതിയ ചിത്രത്തെക്കുറിച്ച് പ്രഖ്യാപനമുണ്ടായത്. ചിത്രത്തെക്കുറിച്ചുള്ള കൂടുതല്‍ വിവരങ്ങള്‍ക്കായുള്ള കാത്തിരിപ്പിലായിരുന്നു പ്രേക്ഷകര്‍. തമിഴ്,  തെലുങ്ക്, ഹിന്ദി ഭാഷകളില്‍ ‘തലൈവി’ തിയേറ്ററുകളിലെത്തും. വിബ്രി മീഡിയയുടെ ബാനറില്‍ വിഷ്ണു വരദനാണ് ചിത്രത്തിന്റെ നിര്‍മ്മാണം. ജി.വി പ്രകാശ് കുമാറാണ് ചിത്രത്തിന്റെ സംഗീത സംവിധായകന്‍. നീരവ് ഷായാണ് ഛായാഗ്രഹണം നിര്‍വഹിക്കുന്നത്.

ഇതിനുമുമ്പും ജയലളിതയുടെ ജീവിതം പറയുന്ന രണ്ട് സിനിമകള്‍ പ്രഖ്യാപിച്ചിരുന്നു. പ്രിയദര്‍ശിനി സംവിധാനം ചെയ്യുന്ന ‘ദ് അയണ്‍ ലേഡി’യാണ് ഒന്ന്. നിത്യ മേനോനാണ് ഈ ചിത്രത്തില്‍ ജയലളിതയായി എത്തുന്നത്. നിര്‍മാതാവായ ആദിത്യ ഭരദ്വാരാജും ജയലളിതയുടെ ജീവിതകഥ സിനിമയാക്കാന്‍ മുന്നോട്ടു വന്നിരുന്നു. ‘തായ്: പുരട്ചി തലൈവി’ എന്നാണ് ഈ ചിത്രത്തിന്റെ പേര്.

Read more: പാമ്പ് കടിയേറ്റാൽ: ചെയ്യേണ്ടതും, ചെയ്യരുതാത്തതും

അതേസമയം കങ്കണ റണാവത് ജയലളിതയാകുന്നു എന്ന വാര്‍ത്തയും ചലച്ചിത്രലോകം പ്രതിക്ഷയോടെയാണ് ഏറ്റെടുത്തിരിക്കുന്നത്. ചിത്രത്തിനായി അക്ഷമരായി കാത്തിരിക്കുകയാണ് ആരാധകർ. തമിഴിൽ ‘തലൈവി’ എന്ന് പേരിട്ടിരിക്കുന്ന ചിത്രം ഹിന്ദിയിൽ ‘ജയ’ എന്ന പേരിലാണ് റിലീസ് ചെയ്യുന്നത്.