‘ചന്ദ്രോത്ത് പണിക്കർക്ക് വേണ്ടി ഉണ്ടാക്കിയെടുത്ത മസിൽസ് എല്ലാം കഴിഞ്ഞ നാല് മാസം കൊണ്ട് ഒഴിവാക്കിയിരിക്കുകയാണ്’- പുതിയ ലുക്ക് പുറത്ത് വിട്ട് ഉണ്ണി മുകുന്ദൻ

മലയാള സിനിമയിൽ ശരീര സൗന്ദര്യം കാത്തുസൂക്ഷിക്കുന്നതിൽ മുൻ പന്തിയിലാണ് നടൻ ഉണ്ണി മുകുന്ദൻ. വ്യായാമവും വർക്ക് ഔട്ടും കൃത്യമായി ചെയ്യുന്ന ഉണ്ണി മുകുന്ദൻ ഏറ്റവും ഒടുവിൽ റിലീസ് ചെയ്ത ‘മാമാങ്ക’ത്തിൽ നല്ല ഫിറ്റ് ശരീരത്തിൽ ഒരു പോരാളിയുടെ വേഷത്തിലാണ് പ്രത്യക്ഷപ്പെട്ടത്. എന്നാൽ ഇപ്പോൾ തന്റെ ലുക്ക് പുറത്ത് വിട്ടിരിക്കുകയാണ് ഉണ്ണി മുകുന്ദൻ. കുടവയർ ചാടിയ ലുക്കിലാണ് ഇപ്പോൾ ഉണ്ണി മുകുന്ദൻ. പുതിയ ചിത്രമായ ‘മേപ്പടിയാനി’ൽ എത്തേണ്ട ലുക്കിലാണ് താരം. അതിനെക്കുറിച്ച് ഉണ്ണി മുകുന്ദൻ പറയുന്നതിങ്ങനെ;

നമസ്കാരം,

ശാരീരികമായും, മാനസികമായും ചന്ദ്രോത്ത് പണിക്കർ എന്ന കഥാപാത്രത്തിലേക്ക് എനിക്ക് എത്തിച്ചേരാൻ 11 മാസം വേണ്ടി വന്നു.

ചന്ദ്രോത്ത് പണിക്കരെ ഹൃദയത്തിൽ ഏറ്റിയവർക്കും, സ്വീകരിച്ചവർക്കും നന്ദി. മാമാങ്കം കഴിഞ്ഞിരിക്കുന്നു. ഇനിയുള്ള യാത്ര പുതിയ കഥാപാത്രത്തിലേക്കുള്ളതാണ്. ചന്ദ്രോത്ത് പണിക്കർക്ക് വേണ്ടി ഉണ്ടാക്കിയെടുത്ത മസിൽസ് എല്ലാം കഴിഞ്ഞ നാല് മാസം കൊണ്ട് ഒഴിവാക്കിയിരിക്കുകയാണ്.

ഇപ്പോൾ നിങ്ങൾ ഈ കാണുന്ന മാറ്റത്തിലേക്ക് എത്തിച്ചേർന്നിരിക്കുന്നത് എന്റെ പുതിയ ചിത്രത്തിനു വേണ്ടിയുള്ള ഒരുക്കങ്ങളുടെ ഭാഗമായാണ്.

“മേപ്പടിയാൻ” എന്ന അടുത്ത ചിത്രത്തിലെ നായകൻ ജയകൃഷ്ണൻ ഒരു നാട്ടിൻപുറത്തുകാരനായ സാധാരണക്കാരനാണ്. അത്തരമൊരു വേഷം ചെയ്യുന്നതിനായി ഈ രൂപത്തിലേക്ക് മാറേണ്ടത് ആവശ്യകതയാണെന്നു മനസിലാക്കിയതിനാലാണ് ഈ മുന്നൊരുക്കം. അത് ചിത്രത്തിലൂടെ നിങ്ങൾക്ക് ബോധ്യമാകുമെന്നു പ്രതീക്ഷയുണ്ട്.

എന്റെ ഓരോ വിജയങ്ങൾക്ക് പിന്നിലും നിങ്ങൾ തന്ന വലിയ പിന്തുണ ഉണ്ടായിരുന്നു. അതിനു ഞാൻ നിങ്ങൾ ഓരോരുത്തരോടും കടപ്പെട്ടിരിക്കുന്നു. തുടർന്നും നിങ്ങളുടെ മനസ്സറിഞ്ഞ ഹൃദയത്തിൽ തൊട്ടുള്ള പിന്തുണ കൂടെയുണ്ടാകണം. 🙏

ഒരു സുപ്രധാന കാര്യം കൂടി നിങ്ങളുടെ ശ്രദ്ധയിൽപ്പെടുത്താൻ ആഗ്രഹിക്കുകയാണ്. എന്റെ മറ്റു ചിത്രങ്ങളെ അപേക്ഷിച്ച് “മേപ്പടിയാൻ” എന്ന ചിത്രത്തിൽ യാതൊരു തരത്തിലുള്ള ആക്ഷൻ രംഗങ്ങളും ഉണ്ടായിരിക്കുകയില്ല. ചിത്രം കുടുംബ പ്രേക്ഷകർക്കും, യുവാക്കൾക്കും ഇഷ്ടപ്പെടുന്ന ഒരുപിടി നല്ല രംഗങ്ങൾ കൊണ്ട് സമ്പന്നമായിരിക്കും.

നിങ്ങളുടെ എല്ലാ പ്രാർത്ഥനകളും, പിന്തുണയും കൂടെയുണ്ടാകും എന്ന് പ്രതീക്ഷിച്ചുകൊണ്ട് നിങ്ങളുടെ സ്വന്തം…
ഉണ്ണി മുകുന്ദൻ 💓

Read More:അഭിമന്യുവായി ഉണ്ണി മുകുന്ദൻ; പുതിയ ചിത്രം ഒരുങ്ങുന്നു

അതേസമയം, ഉണ്ണി മുകുന്ദൻ നായകനായി എത്തുന്ന പുതിയ ചിത്രമാണ് ചോക്ലേറ്റ് സ്റ്റോറി റീറ്റോൾഡ്. ചിത്രത്തിൽ അഭിമന്യുവെന്നാണ് താരത്തിന്റെ കഥാപാത്രത്തിന്റെ പേര്. പൃഥ്വിരാജിനെ നായകനാക്കി 2007 പുറത്തിറങ്ങിയ ചോക്ലേറ്റ് എന്ന ചിത്രത്തിന്റെ തിരക്കഥ തയാറാക്കിയ സേതു തന്നെയാണ് പുതിയ ചിത്രത്തിനും തിരക്കഥ എഴുതുന്നത്. ചിത്രം സംവിധാനം ചെയുന്നത് ബിനു പീറ്ററാണ്.