പറന്ന് പറന്ന് വിമാനത്തിനകത്തേക്ക്; യാത്രക്കാരേയും പൈലറ്റിനേയും വട്ടംകറക്കി പ്രാവുകൾ, വീഡിയോ

കൗതുകകരമായ ചിത്രങ്ങൾക്കും വീഡിയോകൾക്കും കാഴ്ചക്കാർ ഏറെയാണ്. ഇപ്പോഴിതാ പറന്ന് പറന്ന് വിമാനത്തിൽ കയറിക്കൂടിയ രണ്ട് പ്രാവുകളുടെ വീഡിയോയാണ് സമൂഹമാധ്യങ്ങളിൽ ചിരിപടർത്തുന്നത്. വിമാനം ഉയരുന്നതിന് തൊട്ടുമുൻപാണ് പ്രാവുകൾ വിമാനത്തിൽ കയറിക്കൂടിയത്. ഏറെ പണിപ്പെട്ടതിന് ശേഷമാണ് വിമാനത്തിനകത്ത് കയറികൂടിയ പ്രാവുകളെ പുറത്താക്കിയത്.

അഹമ്മദാബാദില്‍ നിന്നും ജെയ്പൂരിലേക്ക് പറക്കാനിരുന്ന ഗോ എയര്‍ ഫ്ലെെറ്റിലാണ് പ്രാവുകൾ കയറിപ്പറ്റിയത്. പ്രാവുകളെ പിടിക്കാനുള്ള ശ്രമങ്ങളെല്ലാം പരാജപ്പെട്ടതോടെ, വിമാനത്തിന്റെ വാതില്‍ തുറന്ന് പ്രാവുകളെ പുറത്താക്കുകയായിരുന്നു. അര മണിക്കൂറോളം വൈകിയാണ് വിമാനം പുറപ്പെട്ടത്. എന്നാൽ വിമാനം ഉയരുന്നതിന് മുൻപ് പ്രാവുകളെ പുറത്താക്കാനായതുമൂലം വലിയൊരു ദുരന്തം ഒഴിവായി എന്നാണ് അധികൃതർ അറിയിക്കുന്നത്.