മണംപിടിച്ച് മലയണ്ണാനും കൈക്കരുത്തുകാട്ടി സിംഹവാലൻ കുരങ്ങും; ചക്കയ്ക്ക് വേണ്ടി പോരടിച്ച് മൃഗങ്ങൾ, വൈറൽ വീഡിയോ
നാട്ടിൽ ചക്കയുടെ സീസണായാൽ പിന്നെ ദിവസവും ചക്കയും ചക്കക്കുരുവുമൊക്കെയാണ്. ലോക്ക് ഡൗൺ ആയതിനാൽ ചക്കയ്ക്ക് ഇപ്പോൾ ആവശ്യക്കാർ ഏറെയാണ്. സുലഭമായി ലഭിക്കുന്നതും ആരോഗ്യഗുണങ്ങളുടെ കാര്യത്തിൽ സമ്പന്നവുമായതിനാൽ ചക്ക എന്നും പ്രിയപ്പെട്ടതാണ്. എന്നാൽ മനുഷ്യന് മാത്രമല്ല മൃഗങ്ങൾക്കും ഏറെ പ്രിയപ്പെട്ടതാണ് രുചിയിലും കേമനായ ചക്ക.
ഇപ്പോഴിതാ പഴുത്ത ചക്കയ്ക്ക് വേണ്ടി പോരടിക്കുന്ന സിംഹവാലൻ കുരങ്ങന്റെയും മലയണ്ണാന്റെയും രസകരമായ വീഡിയോയാണ് വൈറലാകുന്നത്. ബിബിസി എര്‍ത്താണ് മനോഹരമായ ദൃശ്യങ്ങള്‍ ചിത്രീകരിച്ചിരിക്കുന്നത്.
മണം പിടിച്ച് പഴുത്ത ചക്ക കണ്ടെത്തുന്ന മലയണ്ണാനിൽ നിന്നും ചക്ക കൈക്കലാക്കുന്ന സിംഹവാലൻ കുരങ്ങനെയാണ് വീഡിയോയിൽ കണുന്നത്. മലയണ്ണാന്‍റെ മുഖത്തടിച്ചാണ് സിംഹവാലൻ ചക്ക കൈക്കലാക്കുന്നത്. ആദ്യമൊന്നും ചക്കയിൽ നിന്നും പിടിവിടാതിരിക്കുന്ന മലയണ്ണാൻ സിംഹവാലന്റെ അടിയുടെ ശക്തി കൂടുന്നതോടെ ചക്ക ഉപേക്ഷിച്ച് പോകുകയാണ്.
ഇതിനോടകം ആറ് ലക്ഷത്തിലധികം ആളുകളാണ് ഈ വീഡിയോ കണ്ടിരിക്കുന്നത്.
