‘എന്റെ സ്വപ്നത്തിന് താമര പൊയ്കയില്‍…’; വാക്കുകള്‍ക്കും വര്‍ണ്ണനകള്‍ക്കും അതീതം: കുരുന്ന് പാട്ടുകാരിയെ ഏറ്റെടുത്ത് സോഷ്യല്‍മീഡിയ
‘എന്റെ സ്വപ്നത്തിന് താമരപ്പൊയ്കയില്‍
വന്നിറങ്ങിയ രൂപവതീ..
നീല താമര മിഴികള്‍ തുറന്നു
നിന്നെ നോക്കിനിന്നു ചൈത്രം…’ കാലങ്ങള്‍ക്ക് മുന്‍പേ മലയാള ഹൃദയത്തില്‍ കുടിയിരിക്കാന്‍ തുടങ്ങിയതാണ് ഈ ഗാനം. മധുരമായ ഈ ഗാനം വീണ്ടും ആസ്വാദക ഹൃദയത്തിലേക്ക് പെയ്തിറങ്ങുന്നു, ഒരു കുരുന്ന് ഗായികയുടെ അതിഗംഭീര ശബ്ദത്തില്‍.
സമൂഹമാധ്യമങ്ങളില്‍ വൈറലാണ് ആര്‍ദ്രമായി ഈ ഗാനം ആലപിക്കുന്ന ഒരു കൊച്ചു മിടുക്കിയുടെ വീഡിയോ. പ്രായത്തെ പോലും വെല്ലുന്ന ഈ മിടുക്കിയുടെ ആലാപനം സൈബര്‍ ലോകത്തെ അതിശയിപ്പിക്കുന്നു. ആത്രമേല്‍ സുന്ദരമായാണ് മിടുക്കി പാടുന്നത്. അതും പാട്ടിന്റെ ഭാവവും താളവും തെല്ലും ചോരാതെ…
പേരോ മറ്റ് വിവരങ്ങളോ ലഭ്യമായിട്ടില്ലെങ്കിലും അവര്‍ണ്ണനീയമായ ഈ ഗാനാലാപനത്തെ ഏറ്റെടുത്തിരിക്കുകയാണ് സോഷ്യല്‍ മീഡിയ. മികച്ച അഭിപ്രായങ്ങളാണ് കൊച്ചുമിടുക്കിയുടെ ആലാപനത്തിന് ലഭിക്കുന്നതും.
1973-ല്‍ തിയേറ്ററുകളിലെത്തിയ അച്ചാണി എന്ന ചിത്രത്തിലേതാണ് ഈ മനോഹര ഗാനം. പി ഭാസ്‌കരന്റെ വരികള്‍ക്ക് ജി ദേവരാജന്‍ സംഗീതം പകര്‍ന്നിരിക്കുന്നു. കെ ജെ യേശുദാസ് ആണ് സിനിമയില്‍ ഈ ഗാനം ആലപിച്ചിരിക്കുന്നത്. വര്‍ഷങ്ങളേറെ പിന്നിട്ടിട്ടും ഇന്നും ആസ്വാദക മനസ്സുകളില്‍ നിത്യഹരിത ശോഭയോടെ തെളിഞ്ഞു നില്‍ക്കുന്നുണ്ട് ഈ പാട്ട്.
Story highlights: Little Cute Girl Singing Amazingly Viral Video
