മോഹമുന്തിരിയ്ക്ക് ചുവടുവെച്ച് ഒരു വീട്ടമ്മ; ഇവരെപ്പോലെ നൃത്തം ചെയ്യാൻ കഴിഞ്ഞിരുന്നെങ്കിൽ എന്ന് സൈബർ ലോകം, ഹിറ്റായി വീഡിയോ

കഴിഞ്ഞ വർഷം പുറത്തിറങ്ങിയ ഹിറ്റ് ഗാനങ്ങളിൽ ഒന്നായിരുന്നു മമ്മൂട്ടി ചിത്രം മധുരരാജയിലെ മോഹമുന്തിരി എന്ന് തുടങ്ങുന്ന ഗാനം. പ്രേക്ഷകർ ഇരുകൈകളും നീട്ടി സ്വീകരിച്ച ഗാന രംഗത്തിൽ പ്രത്യക്ഷപ്പെട്ടത് സണ്ണി ലിയോൺ ആയിരുന്നു. ഗോപി സുന്ദർ ഈണം നൽകി സിതാര കൃഷ്ണകുമാർ ആലപിച്ച ഗാനം സോഷ്യൽ മീഡിയകളിൽ അടക്കം ഹിറ്റായിരുന്നു. ഇപ്പോഴിതാ ഈ ഗാനത്തിന് നൃത്ത ചുവടുകളുമായി എത്തുകയാണ് ഒരമ്മ.

ചുറ്റുമുള്ളതെല്ലാം മറന്ന് നൃത്ത ചുവടുകൾ വയ്ക്കുന്ന വീട്ടമ്മയുടെ വീഡിയോ ഗോപി സുന്ദർ അടക്കമുള്ള നിരവധി പേർ പങ്കുവെച്ചിട്ടുണ്ട്. സ്വയം മറന്ന് പാട്ടിന് ചുവട് വയ്ക്കുന്ന ഈ വീട്ടമ്മ ആരാണെന്നോ എവിടെയുള്ളതാണെന്നോ വ്യക്തമല്ല. എന്നാൽ മനോഹരമായ നൃത്തച്ചുവടുകളുമായി എത്തുന്ന വീട്ടമ്മയ്ക്ക് മികച്ച പ്രതികരണങ്ങളാണ് സമൂഹമാധ്യമങ്ങളിൽ നിന്നും ലഭിച്ചുകൊണ്ടിരിക്കുന്നത്. ഇവരുടെ മുൻപിൽ സാക്ഷാൽ സണ്ണി ലിയോൺ പോലും തോറ്റുപോകും എന്നാണ് മിക്കവരും അഭിപ്രായപ്പെടുന്നത്.

Read also: സംസ്ഥാനത്ത് ഇന്ന് കൊവിഡ് സ്ഥിരീകരിച്ചത് 5042 പേർക്ക്; 4338 പേര്‍ക്ക് സമ്പര്‍ക്കത്തിലൂടെ രോഗബാധ

മെഗാസ്റ്റാര്‍ മമ്മൂട്ടിയെ നായകനാക്കി വൈശാഖ് സംവിധാനം ചെയ്ത ചിത്രമാണ് മധുരരാജ. തിയേറ്ററുകളില്‍ മികച്ച പ്രേക്ഷക സ്വീകാര്യത നേടിയ ‘പോക്കിരിരാജ’യുടെ രണ്ടാം ഭാഗമാണ് ‘മധുരരാജ’. മികച്ച പ്രേക്ഷക പ്രതികരണമാണ് ‘മധുരരാജ’യും നേടിയത്. മമ്മൂട്ടിക്ക് ഒപ്പം തമിഴ് നടന്‍ ജയ്-യും ചിത്രത്തിലെത്തി. ഉദയ് കൃഷ്ണനാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ആക്ഷന്‍ രംഗങ്ങള്‍ക്ക് പ്രാധാന്യം നല്‍കിയൊരുക്കുന്ന ഫാമിലി എന്റര്‍ടെയ്‌നറാണ് ‘മധുരരാജ’. നര്‍മ്മവും പ്രണയവും ആക്ഷനുമെല്ലാം കോര്‍ത്തിണക്കിക്കൊണ്ടായിരുന്നു മധുരരാജ.

Story Highlights:lady performing dance for mohamunthiri song