ഹൃദയത്തിലെ പാട്ടുകള്‍ ഓഡിയോ കാസറ്റ് രൂപത്തില്‍; ഇത് കേവലം നൊസ്റ്റാള്‍ജിയ അല്ലെന്ന്’ വിനീത് ശ്രീനിവാസന്‍
നടനായും ഗായകനായും സംവിധായകനായും മലയാള ചലച്ചിത്രലോകത്ത് നിറഞ്ഞു നില്‍ക്കുന്ന താരമാണ് വിനീത് ശ്രീനിവാസന്‍. അദ്ദേഹത്തിന്റെ സംവിധാനത്തിലൊരുങ്ങുന്ന ഏറ്റവും പുതിയ ചിത്രമാണ് ഹൃദയം. പാട്ടുകള്‍ക്ക് വളരെയേറെ പ്രാധാന്യം നല്‍കിയിട്ടുണ്ട് ഈ ചിത്രത്തില്‍. 15 പാട്ടുകള്‍ ചിത്രത്തിലുണ്ടെന്നും വിനീത് ശ്രീനിവാസന്‍ മുന്‍പ് വ്യക്തമാക്കിയിരുന്നു.
ഇപ്പോഴിതാ ചിത്രത്തിലെ മറ്റൊരു പാട്ടുവിശേഷം കൂടി പങ്കുവെച്ചിരിക്കുകയാണ് താരം. ഹൃദയത്തിലെ പാട്ടുകള്‍ ഓഡിയോ കാസറ്റ് രൂപത്തിലും പ്രേക്ഷകരിലേക്കെത്തും. ‘ടേപ്പ് റെക്കോര്‍ഡറും വാക്മാനുമൊക്കെ പൊന്നു പോലെ സൂക്ഷിച്ച്, പഴയ ഓഡിയോ കാസ്സറ്റ് പ്ലേ ചെയ്തു പാട്ടു കേള്‍ക്കുന്നവര്‍ ഇപ്പോഴും ഇവിടെ ഉണ്ട്. ഇത് കേവലം നൊസ്റ്റാള്‍ജിയയല്ല. എല്ലാം ഡിജിറ്റലിലേക്കു മാറുന്ന ഈ കാലത്ത് നമ്മുടെ ഹൃദയത്തില്‍ തൊടാനുള്ള ഒരു ക്വാളിറ്റി analog-ന് ഉണ്ട് എന്ന് അനുഭവിച്ചറിഞ്ഞവരാണിവര്‍. ഇത് ഇവര്‍ക്കുള്ള ഞങ്ങളുടെ സ്‌നേഹസമ്മാനമാണ്.’ എന്ന് കുറിച്ചുകൊണ്ടാണ് പാട്ടുകള്‍ ഓഡിയോ കാസറ്റായും ഓഡിയോ സിഡിയായും പുറത്തിറക്കുമെന്ന് വിനീത് ശ്രീനിവാസന്‍ അറിയിച്ചത്.
Read more: കാക്കിക്കുള്ളിലെ കലാകാരന്മാര്‍ അണിനിരന്നു; കൊവിഡ്ക്കാലത്ത് കവചമായി പാട്ട്
പ്രണവ് മോഹന്‍ലാല്‍ ആണ് ഹൃദയത്തില്‍ നായക കഥാപാത്രമായെത്തുന്നത്. രണ്ട് നായികമാരും ചിത്രത്തില്‍ അണിനിരക്കുന്നു. കല്യാണി പ്രിയദര്‍ശനും ദര്‍ശന രാേേജന്ദ്രനുമാണ് നായികമാര്‍. അടുത്തിടെ ചിത്രത്തിലെ കഥാപാത്രങ്ങളെ പരിചയപ്പെടുത്തിക്കൊണ്ടുള്ള ക്യാരക്ടര്‍ പോസ്റ്ററുകളും പുറത്തിറങ്ങിയിരുന്നു.
Story highlights: Songs from Hridayam movie in audio cassettes
