‘ഇത്തവണ കപ്പ് അടിക്കും, ഫൈനലിൽ എടികെ ആവണം എതിരാളികൾ’; ബ്ലാസ്റ്റേഴ്സിന്റെ ഫൈനൽ പ്രതീക്ഷകൾ പങ്കുവെച്ച് ഇന്ത്യൻ ഫുടബോൾ ഇതിഹാസം ഐ എം വിജയൻ
ജംഷഡ്‌പൂർ എഫ്‌സിയെ കീഴടക്കി കേരള ബ്ലാസ്റ്റേഴ്സ് ഐഎസ്എല്ലിന്റെ ഫൈനലിൽ പ്രവേശിച്ചതോട് കൂടി വലിയ ആവേശത്തിലാണ് ആരാധകർ. കലൂർ ഫാൻ പാർക്കിലടക്കം ആരാധകർ ആഘോഷിക്കുന്ന വീഡിയോകളാണ് ഇപ്പോൾ സമൂഹമാധ്യമങ്ങളിൽ വൈറലാവുന്നത്. പല പ്രമുഖരും തങ്ങളുടെ സന്തോഷം മാധ്യമങ്ങളിലൂടെ പ്രകടിപ്പിച്ചിരുന്നു.
ഇപ്പോൾ കേരള ബ്ലാസ്റ്റേഴ്സിന്റെ ഏറ്റവും വലിയ ആരാധകനായ ഇന്ത്യൻ ഫുടബോളിലെ ഇതിഹാസ താരം ഐ എം വിജയനാണ് ബ്ലാസ്റ്റേഴ്സിന്റെ ഫൈനൽ പ്രതീക്ഷകളെ പറ്റി വാചാലനാവുന്നത്. മികച്ച ഫോമിലുള്ള ബ്ലാസ്റ്റേഴ്സ് ഇത്തവണ ഐഎസ്എൽ കിരീടം നേടുമെന്നാണ് താരം പറയുന്നത്. എടികെ മോഹൻ ബഗാൻ ഫൈനലിൽ ബ്ലാസ്റ്റേഴ്സിന്റെ എതിരാളികളായി വരണമെന്നാണ് തന്റെ ആഗ്രഹമെന്നും ഐ എം വിജയൻ പറഞ്ഞു.
അതേ സമയം ഫൈനലിനായി നന്നായി തയാറെടുക്കുമെന്നാണ് ബ്ലാസ്റ്റേഴ്സിന്റെ കോച്ച് ഇവാൻ വുകോമനോവിച്ച് പറയുന്നത്. പ്രതിസന്ധി ഘട്ടങ്ങളിൽ ബ്ലാസ്റ്റേഴ്സ് തളരാതെ പൊരുതിയിട്ടുണ്ടെന്നും അതിന്റെ ഫലമാണ് ഫൈനൽ പ്രവേശമെന്നും വുകോമനോവിച്ച് കൂട്ടിച്ചേർത്തു.
Read More: ‘തനിക്കോ, പ്രായമോ? താൻ ജിംനാസ്റ്റ് അല്ലേ..’- ‘ഭീഷ്മ പർവ്വ’ത്തിലെ ഡിലീറ്റഡ് വിഡിയോ
ലോകമെങ്ങുമുള്ള ആരാധകരെ ആവേശത്തിരയിലാഴ്ത്തിയാണ് കേരള ബ്ലാസ്റ്റേഴ്സ് ഐഎസ്എൽ ഫൈനലിലേക്ക് പ്രവേശിച്ചത്. ഗോവയിൽ നടന്ന രണ്ടാം പാദ മത്സരം സമനിലയിലായെങ്കിലും ആദ്യ മത്സരത്തിലെ വിജയത്തിലൂടെയാണ് ബ്ലാസ്റ്റേഴ്സ് ഫൈനലിലേക്ക് മാർച്ച് ചെയ്തത്. ഹൈദരാബാദ് എടികെ മോഹൻ ബഗാൻ മത്സരത്തിലെ വിജയികളെ ആയിരിക്കും ബ്ലാസ്റ്റേഴ്സ് ഫൈനലിൽ നേരിടുന്നത്.
ആരാധകരുടെ വർഷങ്ങളുടെ കാത്തിരിപ്പാണ് ഒടുവിൽ സഫലമായത്. ആറ് വർഷങ്ങൾക്ക് ശേഷമാണ് ബ്ലാസ്റ്റേഴ്സ് ഐഎസ്എല്ലിന്റെ ഫൈനലിലെത്തിയിരിക്കുന്നത്. ഐഎസ്എൽ കിരീടമെന്ന ടീമിന്റെയും ആരാധകരുടെയും വർഷങ്ങളുടെ പഴക്കമുള്ള സ്വപ്നത്തിലേക്ക് ഒരു പടി കൂടി അടുത്തിരിക്കുകയാണ് കേരള ബ്ലാസ്റ്റേഴ്സ്.
Story Highlights: I M Vijayan about isl final
