ഒന്നിച്ച് യാത്രതുടങ്ങിയിട്ട് 30 വർഷങ്ങൾ- അച്ഛനും അമ്മയ്ക്കും വിവാഹവാർഷിക ആശംസയുമായി കാളിദാസ് ജയറാം
ജയറാമും പാർവതിയും മലയാള സിനിമയിലെ ഏറ്റവും പ്രിയപ്പെട്ട താരദമ്പതികളിൽ ഒരാളാണ്. കൂടാതെ സിനിമാ പ്രേമികൾക്ക് അവിസ്മരണീയമായ നിരവധി കഥാപാത്രങ്ങളെ ഇരുവരും സമ്മാനിച്ചിട്ടുണ്ട്. ഇപ്പോഴിതാ, ജയറാമും പാർവതിയും മുപ്പതാം വിവാഹവാർഷികം ആഘോഷിക്കുകയാണ്. മകനും നടനുമായ കാളിദാസ് ജയറാം ഇരുവർക്കും ആശംസകൾ അറിയിച്ച് രംഗത്തെത്തി.
തന്റെ പ്രിയപ്പെട്ട മാതാപിതാക്കൾ അവരുടെ 30-ാം വിവാഹ വാർഷികം ആഘോഷിക്കുന്ന വേളയിൽ, കാളിദാസ് ജയറാം കേക്ക് പങ്കിടുന്ന ജയറാമിന്റെയും പാർവതിയുടെയും ചിത്രം പങ്കിട്ടു. കാളിദാസ് ജയറാമിന്റെ ഇൻസ്റ്റാഗ്രാം പോസ്റ്റ് ഇങ്ങനെ-‘അപ്പയ്ക്കും അമ്മയ്ക്കും മുപ്പതാം വിവാഹ വാർഷിക ആശംസകൾ !!! ഞാൻ നിങ്ങളെ വളരെയധികം സ്നേഹിക്കുന്നു.’..
അപരൻ എന്ന ചിത്രത്തിലൂടെയാണ് ജയറാം വെള്ളിത്തിരയിലേക്ക് ചുവടുവച്ചത്. പാർവതിയെ ജയറാം ആദ്യമായി കാണുന്നതും പരിചയപ്പെടുന്നതും അപരന്റെ സെറ്റിൽ വെച്ചായിരുന്നു. അതിനുമുൻപ് തന്നെ സിനിമയിൽ ശ്രദ്ധേയ സാന്നിധ്യമായി മാറിയിരുന്നു പാർവതി. അപരൻ പാർവതിയുടെ പതിനഞ്ചാമത്തെ ചിത്രമായിരുന്നു. പത്മരാജൻ സംവിധാനം ചെയ്ത അപരൻ 32 വർഷങ്ങൾ പൂർത്തിയാക്കിയപ്പോൾ ജയറാം പങ്കുവെച്ച കുറിപ്പിലും പാർവതിയുമായുള്ള ആദ്യ കൂടികാഴ്ചയെക്കുറിച്ചുണ്ടായിരുന്നു.
പിന്നീട് നിരവധി ചിത്രങ്ങളിൽ ഒന്നിച്ചഭിനയിച്ച ജയറാമും പാർവതിയും 1992ലാണ് വിവാഹിതരായത്. ആറു വര്ഷം മാത്രമേ പാർവതി വെള്ളിത്തിരയിൽ സജീവമായിരുന്നുള്ളുവെങ്കിലും ഇന്നും പ്രേക്ഷകരുടെ ഇഷ്ട നടിയാണ് താരം. കാളിദാസ് അച്ഛന്റെയും അമ്മയുടെയും പാത പിന്തുടർന്ന് സിനിമയിലേക്ക് എത്തിയപ്പോൾ മകൾ മാളവിക മോഡലിംഗ് രംഗത്താണ് സജീവമാകുന്നത്.
Story highlights- jayaram and parvathy celebrating 30 years of marriage
