മുപ്പതുവർഷം കൂടുമ്പോൾ ‘മുട്ടയിടുന്ന മല’- അത്ഭുതമായി മൗണ്ട് ഗാഡ്നെഗ്

ചൈനീസ് പ്രവിശ്യയായ ഗുയിഷോയിൽ സ്ഥിതിചെയ്യുന്ന മൗണ്ട് ഗാൻഡെംഗ് പർവ്വതം ശാസ്ത്രലോകത്തിന് തന്നെ അത്ഭുതമാണ്. ലക്ഷക്കണക്കിന് സഞ്ചാരികൾ എത്തുന്ന ഈ പർവ്വതത്തിന്റെ പ്രത്യേകത ഇത് മുപ്പതുവർഷം കൂടുമ്പോൾ കല്ലുമുട്ടയിടുന്നു എന്നതാണ്. കൗതുകമായി തോന്നാം. പക്ഷെ, കാലങ്ങളായി നടന്നുപോകുന്ന ഒരു പ്രതിഭാസമാണിത്.

അഞ്ഞൂറ് ദശലക്ഷം വര്‍ഷങ്ങള്‍ക്ക് മുന്‍പേ രൂപം കൊണ്ടതെന്ന് കരുതപ്പെടുന്ന ഈ പർവ്വതത്തിന്‍റെ 65 അടി ഉയരവും 20 അടി വീതിയുമുള്ള ഒരു വശത്ത് ഓരോ മുപ്പതുവർഷം കൂടുമ്പോളും മുട്ടയുടെ ആകൃതിയിൽ കല്ലുകൾ പുറത്തേക്ക് വരും. രസകരമായ കാര്യമെന്തെന്നാൽ, യഥാർത്ഥത്തിൽ മിനുസത്തോടെ ഒരു മുട്ടയുടെ ആകൃതിയിലാണ് ഈ കല്ലുകൾ പുറത്തേക്ക് എത്തുന്നത് എന്നതാണ്.

എന്നാൽ പുറത്തേക്ക് തള്ളിവരുന്ന ഈ കല്ലുകൾ കാലങ്ങളോളം പാറക്കെട്ടുകളിൽ തന്നെ തുടരും. പിന്നീട് ഒരിക്കൽ മുട്ടയുടെ പൂർണമായ ആകൃതിയിൽ താഴേക്ക് പതിക്കും. ഈ കാഴ്ച കാണാനും ചിത്രങ്ങൾ പകർത്താനും പഠനങ്ങൾ നടത്താനും ഒട്ടേറെ ആളുകളാണ് ഇവിടേക്ക് എത്താറുള്ളത്.

പർവ്വതത്തിന്റെ ഈ ഭാഗത്തിന്റെ ഘടന മറ്റ് പ്രദേശങ്ങളിൽ നിന്ന് വ്യത്യസ്തമാണെന്നും മണ്ണൊലിപ്പിന് കൂടുതൽ സാധ്യതയുള്ള കൽക്കറിയസ് പാറയാണ് ഇവിടെയുള്ളതെന്നുമാണ് പഠനങ്ങൾ പറയുന്നത്. എന്നിരുന്നാലും, പാറകൾ എങ്ങനെയാണ് മിനുസമാർന്ന വൃത്താകൃതിയിൽ പ്രത്യക്ഷപ്പെടുന്നത് എന്നതിൽ ആർക്കും വ്യക്തതയില്ല. 2009 മുതൽ ഇവിടം വിനോദസഞ്ചാരികളുടെ പറുദീസയാണ്.

ഇങ്ങനെ പുറത്തേക്ക് വരുന്ന കല്ലുമുട്ടകളിൽ 70 എണ്ണം മാത്രമേ ഇന്ന് അവശേഷിക്കുന്നുള്ളൂ. മറ്റുള്ളവ വിൽക്കുകയോ മോഷ്ടിക്കപ്പെടുകയോ ചെയ്‌തിരിക്കാം. ഈ പ്രദേശത്ത് നടത്തിയ ഭൂമിശാസ്ത്രപരീക്ഷണങ്ങളിൽ ഇത് കേംബ്രിയൻ കാലഘട്ടത്തിൽ – ഏകദേശം 500 ദശലക്ഷം വർഷങ്ങൾക്ക് മുമ്പ് രൂപംകൊണ്ടതാണെന്ന് തെളിഞ്ഞു.

READ ALSO: ‘ചലനമറ്റ് കിടക്കുന്ന പപ്പേട്ടനെ കാണുമ്പോൾ എന്റെ ഉള്ള് പിടഞ്ഞു..’- പത്മരാജന്റെ ഓർമ്മകളിൽ റഹ്മാൻ

അതേസമയം, പർവ്വതത്തിന് സമീപത്ത് താമസിക്കുന്ന ഗുളു എന്ന ഗ്രാമവാസികൾ ഇത് ദിവ്യശക്തി എന്നാണ് വിശ്വസിക്കുന്നത്. മാത്രമല്ല, വർഷത്തിൽ ഒരിക്കൽ അവർ ഈ പർവ്വതം സന്ദർശിക്കുകയും അവിടെ നിന്നുള്ള കല്ലുകൾ വീട്ടിൽ സൂക്ഷിക്കുകയും ചെയ്യുന്നുണ്ട്.

Story highlights- MOUNT GANDENG