സിനിമാരംഗത്ത് ഉത്തരവാദിത്തമുള്ള റിവ്യൂ സംസ്കാരം ഉണ്ടാകണം ആവശ്യവുമായി ” പൊങ്കാല” സിനിമയുടെ സംവിധായകൻ

സിനിമാരംഗത്ത് ഉത്തരവാദിത്തമുള്ള റിവ്യൂ സംസ്കാരം ഉണ്ടാകുന്നതിനായി ആവശ്യമായ ഇടപെടലുകൾ ചെയ്യണമെന്ന് ആവശ്യപ്പെട്ട് ” പൊങ്കാല” സിനിമയുടെ സംവിധായകൻ എ. ബി.ബിനിൽ മുഖ്യമന്ത്രി വി ഡി സതീശനെ നേരിട്ടു കണ്ടു. ബിനിലിന്റെ ഫേസ്ബുക്ക് പോസ്റ്റ് ശ്രദ്ധേയമാകുന്നു. മലയാള സിനിമാ വ്യവസായം ഇന്ന് നേരിടുന്ന ചില ഗുരുതര വെല്ലുവിളികളും, ഈ മേഖലയെ ആശ്രയിച്ച് ജീവിക്കുന്ന ആയിരക്കണക്കിന് തൊഴിലാളികളുടെ ആശങ്കകളും അദ്ദേഹത്തിന്റെ ശ്രദ്ധയിൽപ്പെടുത്താൻ കഴിഞ്ഞു. ക്ഷമയോടെ കേൾക്കുകയും വിഷയത്തിന് പ്രാധാന്യം നൽകുകയും ചെയ്ത അദ്ദേഹത്തിന് ഹൃദയം നിറഞ്ഞ നന്ദി രേഖപ്പെടുത്തുകയും ഈ കൂടിക്കാഴ്ചയിൽ ഞാൻ ഒരു വ്യക്തിപരമായ അനുഭവവും പങ്കുവെച്ചു എന്നും സംവിധായകൻ പറയുന്നു

Read Also- ‘വരവ് ‘ സെൻസർ ചെയ്തു; ചിത്രത്തിന് U/A സർട്ടിഫിക്കറ്റ്

“പൊങ്കാല” തീയറ്റർ റിലീസിനിടെ കടുത്ത നെഗറ്റീവ് റിവ്യൂകളും പരിഹാസങ്ങളും നേരിട്ടെന്നും എന്നാൽ ഇന്ന് അതേ സിനിമ Amazon Prime Video-യിൽ ഇന്ത്യയിലെ ആക്ഷൻ സിനിമകളിൽ 9-ാം സ്ഥാനത്ത് രണ്ട് ആഴ്ചയായി നിലകൊള്ളുകയാണ് എന്നും സംവിധായകൻ പറയുന്നു. ഇത് ഒരു സിനിമയുടെ യഥാർത്ഥ മൂല്യം പലപ്പോഴും ആദ്യ ദിവസങ്ങളിലെ സോഷ്യൽ മീഡിയ വിധികളിലൂടെ മാത്രം നിർണയിക്കപ്പെടുന്നില്ലെന്ന് തെളിയിക്കുന്നു. വിമർശനം കലയുടെ വളർച്ചയ്ക്ക് ആവശ്യമാണ്. പക്ഷേ വിമർശനത്തിന്റെ പേരിൽ സിനിമകളെ പരിഹസിക്കുകയും അപമാനിക്കുകയും പൊതുജനങ്ങൾക്ക് മുന്നിൽ മുൻകൂട്ടി വിധിയെഴുതുകയും ചെയ്യുന്ന പ്രവണതയെക്കുറിച്ച് ഗൗരവമായ ചർച്ചകൾ അനിവാര്യമാണ്.ഒരു സിനിമയുടെ പിന്നിൽ നൂറുകണക്കിന് തൊഴിലാളികളും കോടിക്കണക്കിന് രൂപയുടെ നിക്ഷേപവും ആയിരക്കണക്കിന് കുടുംബങ്ങളുടെ പ്രതീക്ഷകളും ഉണ്ടെന്ന കാര്യം നമ്മൾ മറക്കരുത്. മലയാള സിനിമയുടെ ആരോഗ്യകരമായ വളർച്ചയ്ക്കും ഉത്തരവാദിത്തമുള്ള റിവ്യൂ സംസ്കാരത്തിനും ആവശ്യമായ ഇടപെടലുകൾ ഉണ്ടാകുമെന്ന പ്രതീക്ഷയോടെയാണ് ഞാൻ മടങ്ങുന്നത്.

Story highlights: The director of Pongala has emphasized the need for a responsible review culture in the film industry.