പക്കാ പോലീസ് പടം; ഞെട്ടിക്കും കാമിയോ
രഞ്ജിത്തെന്ന മാസ്റ്റർ ക്രാഫ്റ്റ്മാൻ്റെ സംവിധാനമികവും ഉദയകൃഷ്ണയുടെ പക്കാ കൊമേഴ്സ്യൽ ചേരുവകളും ഒത്തുചേർന്ന കിടിലൻ മാസ് ആക്ഷൻ ത്രില്ലറാണ് ‘ലോ ആൻഡ് ഓർഡർ’. തുടക്കം മുതൽ ഒടുക്കം വരെ പ്രേക്ഷകരെ ത്രില്ലടിപ്പിച്ചു നിർത്തുന്ന എൻഗേജിങ് ആയ ഒരു തിയേറ്റർ അനുഭവമാണ് ചിത്രം സമ്മാനിക്കുന്നത്. പോലീസ് ട്രെയിനിംഗ് കോളേജിൽ നിന്ന് പരിശീലനം പൂർത്തിയാക്കി കാക്കി അണിയുന്ന 5 സബ് ഇൻസ്പെക്ടർമാരുടെ തുടക്കകാലത്തിലൂടെയാണ് ചിത്രം മുന്നോട്ട് പോകുന്നത്. അവരുടെ സൗഹൃദവും പുതിയ വെല്ലുവിളികളും അപ്രതീക്ഷിതമായി അവരെ നയിക്കുന്ന ക്രൈം ഇൻവെസ്റ്റിഗേഷനുമാണ് സിനിമയുടെ കാതൽ. പുതിയ തലമുറ പോലീസുകാരുടെ ഊർജ്ജസ്വലതയും ആവേശവും യാഥാർത്ഥ്യബോധത്തോടെ വരച്ചുകാട്ടാൻ രഞ്ജിത്തിന് കഴിഞ്ഞിട്ടുണ്ട്.
ചിത്രത്തിന്റെ ഏറ്റവും വലിയ കരുത്ത് പുതുമുഖങ്ങളുടെ അസാധ്യ പ്രകടനമാണ്. ഋതുദേവ് അയ്യപ്പൻ, ഷാനൂദ് ഇബ്രാഹിം, സജൽ സുദർശൻ, റിനോഷ് ജോർജ്, ഡോൺ മൈക്കൽ, നിജാദ് ബാബു തോമസ്, ഷേർഷാ ഷെരീഫ് എന്നിവരടങ്ങുന്ന യുവനിര ഓരോ രംഗങ്ങളിലും കൈയടക്കമുള്ള അഭിനയമാണ് കാഴ്ചവെച്ചിരിക്കുന്നത്. തുടക്കക്കാരുടെ പതർച്ചകളൊന്നുമില്ലാതെ, കഥാപാത്രങ്ങളുടെ ഗൗരവവും സംഘർഷങ്ങളും മികച്ച രീതിയിൽ അവർ സ്ക്രീനിലെത്തിച്ചു. പ്രകാശ് വർമയുടെ ഗംഭീരമായ പ്രകടനത്തിനൊപ്പം അഭിരാമി, ജോയ് മാത്യു, സുരേഷ് കൃഷ്ണ, ദേവൻ, നന്ദൻ ഉണ്ണി, ആനന്ദ് മൻമദൻ, ജോണി ആന്റണി, ശങ്കർ രാമകൃഷ്ണൻ, സാബുമോൻ, വി.കെ. പ്രകാശ്, ഭീമൻ രഘു, അജയ് വാസുദേവ്, നന്ദു, മോഹൻ ജോസ് തുടങ്ങിയ വൻ താരനിരയും സിനിമയ്ക്ക് ശക്തമായ അടിത്തറ നൽകുന്നു.
Read also –ചരിത്രനേട്ടം ആഘോഷിക്കാൻ പുതുമയുള്ള പോസ്റ്ററുമായി ‘ബെത്ലഹേം കുടുംബ യൂണിറ്റ്’: വേറിട്ട 300 കോടി പോസ്റ്ററിന് കയ്യടിച്ച് സോഷ്യൽ മീഡിയ!
ആക്ഷൻ പ്രേമികളെ പൂർണ്ണമായും തൃപ്തിപ്പെടുത്തുന്ന തരത്തിലാണ് സംഘട്ടന രംഗങ്ങൾ കൊറിയോഗ്രാഫി ചെയ്തിരിക്കുന്നത്. ഒട്ടും ലാഗ് അടിപ്പിക്കാതെ, വേഗതയാർന്ന കട്ടുകളോടെ ആക്ഷൻ രംഗങ്ങൾ മുന്നേറുന്നു. ഇതിനെല്ലാം പുറമെ തിയേറ്ററുകളെ ഇളക്കിമറിക്കുന്നത് രഞ്ജിത്തിന്റെ തന്നെ പഴയ ക്ലാസിക് ഹിറ്റിലെ ആ പ്രശസ്ത കഥാപാത്രത്തിന്റെ റീ-എൻട്രിയാണ് . ആ ഒരു സീൻ മാത്രം മതി തിയേറ്റർ മുഴുവൻ കൈയടികളോടെ പൊട്ടിത്തെറിക്കാൻ. ബിജിബാലിന്റെ പശ്ചാത്തല സംഗീതം ചിത്രത്തിന്റെ ആക്ഷൻ മൂഡിനോട് 100% നീതിപുലർത്തുന്നുണ്ട്. ത്രില്ലർ സ്വഭാവമുള്ള രംഗങ്ങളിൽ സംഗീതം പ്രേക്ഷകരിൽ വലിയ തോതിൽ പിരിമുറുക്കം കൂട്ടുന്നു. ഛായാഗ്രഹണവും എഡിറ്റിംഗും സിനിമയുടെ വേഗത കാത്തുസൂക്ഷിക്കുന്നുണ്ട്. തിയേറ്ററിൽ ആസ്വദിച്ച് കാണാൻ പറ്റിയ മാസ്സ്-ആക്ഷൻ കോപ് ഡ്രാമകൾ ഇഷ്ടപ്പെടുന്നവർക്ക് ഒരു നിമിഷം പോലും നിരാശ സമ്മാനിക്കാത്ത മികച്ചൊരു എന്റർടെയ്നറാണ് ‘ലോ ആൻഡ് ഓർഡർ’.
Story highlights: Law & Order is a must watch movie
