ട്വിസ്റ്റുകളുടെ പൂരം; പ്രഥമ ദൃഷ്ട്യാ കുറ്റക്കാരെ ഏറ്റെടുത്ത് പ്രേക്ഷകർ

‘ശ്വാസമടക്കിപിടിച്ചുകൊണ്ട് കണ്ട സിനിമ’ പാർവതി തിരുവോത്ത്, വിജയരാഘവൻ എന്നിവരെ കേന്ദ്ര കഥാപാത്രങ്ങളാക്കി ഷഹദ് സംവിധാനം ചെയ്ത ‘പ്രഥമ ദൃഷ്ട്യാ കുറ്റക്കാർ’ അത്തരത്തിൽ ഒന്നാണ്. തിയേറ്ററുകളിൽ വൻ ജനപ്രീതി നേടി ചിത്രം വിജയകരമായി രണ്ടാമത്തെ ആഴ്ചയിലേക്ക് കടന്നിരിക്കുകയാണ്.

കോട്ടയത്തെ നാട്ടകം പൊലീസ് സ്റ്റേഷനിൽ നടക്കുന്ന ഒരു കസ്റ്റഡി കൊലപാതകമാണ് ചിത്രത്തിന്റെ കഥാപശ്ചാത്തലം. സർവീസിലിരിക്കെ മരണപ്പെട്ട ഭർത്താവിന്റെ  ആശ്രിത നിയമനത്തിലാണ് പാർവതി അവതരിപ്പിക്കുന്ന അലീന പോലീസ് കോൺസ്റ്റബിൾ ആകുന്നത്. നാട്ടകം ഭാഗത്ത് നടക്കുന്ന കവർച്ചാ പരമ്പരയും പിന്നാലെയുണ്ടാകുന്ന കൊലപാതകവും അന്വേഷിക്കാനാണ് വിജയരാഘവൻ അവതരിപ്പിക്കുന്ന ഡിവൈഎസ്പി ഹാരിസ് മീരാൻ എത്തുന്നത്. സിദ്ധാർഥ് ഭരതൻ, മാത്യു തോമസ്, ഉണ്ണിമായ പ്രസാദ്, പാർവതി എന്നിവരുടെ കഥാപാത്രങ്ങൾക്ക് ഈ കസ്റ്റഡി മരണവുമുള്ള ബന്ധവും അവർക്കെതിരെയുള്ള അന്വേഷണങ്ങളുമാണ് ചിത്രം പറയുന്നത്. പോലീസ് ഉദ്യോഗസ്ഥനായ പി എസ് സുബ്രഹ്മണ്യവും വിജേഷ് തോട്ടിങ്ങലും ചേർന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. സീറ്റ് എഡ്ജ് ത്രില്ലിങ് അനുഭവത്തിനപ്പുറം കഥ പറഞപോകുന്നതിനിടയിലൊളിപ്പിച്ച ട്വിസ്റ്റുകളും പ്രേക്ഷകരെ ഞെട്ടിക്കും. കണ്ടുമടുത്ത പോലീസ് കഥയ്ക്കപ്പുറം പോലീസുകാരുടെ കഥയായി അവതരിപ്പിച്ചതുകൊണ്ടുതന്നെ ഓരോ കഥാപാത്രങ്ങളുടെയും വൈകാരിക തലം കൂടി ചേർന്നതാണ് സിനിമ.

മികച്ച സർവീസ് റെക്കോഡ് ഉള്ള ഹാരിസ് മീരാൻ ഈ കേസുമായി മുന്നോട്ട് പോകുമ്പോൾ എതിരെയുള്ളത് മറ്റ് നാല് പൊലീസുകാരാണ്. അവിടെയാണ് കുറ്റാന്വേഷണം മറ്റു വഴിത്തിരിവുകൾ എടുക്കുന്നത്. കസ്റ്റഡി മരണവും തുടർന്നുള്ള അന്വേഷണവുമാണ് പ്രധാന കഥാതന്തു എങ്കിൽ പോലും ഡീറ്റയിലിങ്ങോടെയുള്ള കഥപറച്ചിൽ സിനിമയെ മികച്ച ത്രില്ലറാക്കുന്നു.വിനയ് ഫോർട്ട്, അസീസ് നെടുമങ്ങാട്, തമിഴ് നടൻ പാർഥിപൻ എന്നിവരും സിനിമയിൽ പ്രധാനവേഷങ്ങളിലെത്തുന്നുണ്ട് . സിനിമാഭിനയ ജീവിതത്തിൽ 20 വർഷം പിന്നിട്ട പാർവതിയുടെ ആദ്യ പോലീസ് വേഷമാണ് ചിത്രത്തിലേത്.

സിനിമയിൽ ഒരിടത്തും  കഥയ്ക്ക് മുമ്പേ ചിന്തിച്ചെത്താൻ പ്രേക്ഷകനെ സിനിമ അനുവദിക്കുന്നില്ല. വ്യക്തമായ ഡീറ്റെയിലിങ്ങോടെ വിശദമായി കഥപറഞ്ഞു പോകുന്ന ചിത്രത്തിന് ക്യാമറ കൈകാര്യം ചെയ്തിരിക്കുന്നത് സംവിധായകൻ കൂടിയായ റോബി വർഗീസ് രാജാണ്. ചമൻ ചാക്കോ എഡിറ്റിങ് നിർവഹിച്ചിരിക്കുന്നു. മുജീബ് മജീദിന്റെ പശ്ചാത്തല സംഗീതം സിനിമയുടെ നട്ടെല്ലാണ്.ക്ലൈമാക്സിൽ സിനിമയെ വേറെ തലത്തിലേക്ക് കൊണ്ടുപോകുന്നതിൽ പശ്ചാത്തല സംഗീതത്തിന്റെ പങ്ക് തള്ളിക്കളയാനാകില്ല. 11 ഐക്കൺസിന്റെ ബാനറിൽ അർജുൻ സെൽവയാണ് സിനിമ നിർമിച്ചിരിക്കുന്നത്. ത്രില്ലർ സിനിമകൾ ഇഷ്ടപ്പെടുന്നവരെ ഒരു തരത്തിലും പ്രഥമ ദൃഷ്ട്യാ കുറ്റക്കാർ നിരാശപ്പെടുത്തില്ല.

Story Highlights : Pradhama Drishtiya Kuttakkar movie updates