ഇത് അവറാച്ചന്റെയും പിള്ളേരുടെയും ‘ഫീൽ ഗുഡ്’ ട്രീറ്റ്
ഗ്രാമഭംഗിയും മനുഷ്യബന്ധങ്ങളുടെ നിഷ്കളങ്കതയും കോർത്തിണക്കി മനസ്സുനിറയ്ക്കുന്ന ഒരു സിനിമ. അത്തരത്തിലൊന്നാണ് മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫൻ നിർമ്മിച്ച് തമ്പി സംവിധാനം ചെയ്ത ‘അവറാച്ചൻ & സൺസ്’. വൈകാരികതയ്ക്കും തമാശയ്ക്കും ഒരുപോലെ പ്രാധാന്യം നൽകുന്ന മനോഹരമായ ഒരു ഫീൽ ഗുഡ് അനുഭവമാണ് ചിത്രം സമ്മാനിക്കുന്നത്.
നാട്ടിലെ തല്ലിപ്പൊളിയായ അവറാച്ചൻ എന്ന കേന്ദ്ര കഥാപാത്രമായി ബിജു മേനോൻ വിസ്മയിപ്പിക്കുമ്പോൾ മക്കളായി ഗണപതിയും ശ്രീനാഥ് ഭാസിയും ബിജു മേനോനൊപ്പം മത്സരിച്ച് അഭിനയിച്ചിരിക്കുന്നു. അവറാച്ചൻ ചെല്ലാനത്ത് ഉണ്ടാക്കുന്ന ചില പ്രശ്നങ്ങളെ തുടർന്ന് ജന്മനാട്ടിൽ നിന്ന് മാറിനിൽക്കേണ്ട അവസ്ഥ വരുന്നു. വടക്കൻ മലബാറിലെ ഒരു മലയോര ഗ്രാമത്തിലാണ് അവറാച്ചനും മക്കളും അഭയം പ്രാപിക്കുന്നത്. അവിടെ അവർ നേരിടുന്ന രസകരമായ സംഭവങ്ങളും ഉണ്ടാകുന്ന പുതിയ സൗഹൃദങ്ങളുമാണ് കഥയെ മുന്നോട്ട് കൊണ്ടുപോകുന്നത്.
പേര് സൂചിപ്പിക്കുന്നത് പോലെ അപ്പന്റെയും മക്കളുടെയും ജീവിതത്തെ ചുറ്റിപ്പറ്റിയാണ് കഥ പോകുന്നതെങ്കിലും, രക്തബന്ധത്തിന്റെ തീവ്രമായ വൈകാരിക തലങ്ങളെയും സൗഹൃദങ്ങളെയും ചിത്രം വളരെ ഭംഗിയായി തുറന്നുകാട്ടുന്നുണ്ട്. ആദ്യ പകുതിയിൽ തമാശകൾക്കും കുടുംബബന്ധങ്ങൾക്കും മുൻതൂക്കം നൽകുമ്പോൾ, ഇന്റർവെലിന് ശേഷം ചിത്രം വേറൊരു തലത്തിലേക്ക് കടക്കുകയും പ്രേക്ഷകരെ രസിപ്പിക്കുകയും ചെയ്യുന്നു.
അവറാച്ചനും മക്കൾക്കും പുറമെ പോളി വത്സൻ, അഖില ഭാർഗവൻ, പാർവതി ബാബു, ഗ്രേസ് ആന്റണി, ജോണി ആന്റണി, വിനയ് ഫോർട്ട്, കോട്ടയം നസീർ, വിനീത് തട്ടിൽ തുടങ്ങി വമ്പൻ താരനിര തന്നെ ചിത്രത്തിലുണ്ട്. ഓരോരുത്തരും തങ്ങളുടെ കഥാപാത്രങ്ങളോട് പൂർണ്ണ നീതി പുലർത്തി. കൂടാതെ പ്രേക്ഷകരെ ഞെട്ടിക്കുന്ന ഒരു കാമിയോയും ചിത്രത്തിലുണ്ട്.
സിനിമയുടെ ഏറ്റവും വലിയ പ്ലസ് പോയിന്റുകളിലൊന്ന് സനൽ ദേവ് ഒരുക്കിയ കേൾക്കാൻ ഇമ്പമുള്ള പാട്ടുകളും മികച്ച പശ്ചാത്തല സംഗീതവുമാണ്. ജോസഫ് വിജീഷും സംവിധായകൻ തമ്പിയും ചേർന്നാണ് സിനിമ എഴുതിയിരിക്കുന്നത്. സജിത്ത് പുരുഷനാണ് ഛായാഗ്രഹണം നിർവഹിച്ച ചിത്രത്തിന്റെ എഡിറ്റർ ആകാശ് ജോസഫ് വർഗീസാണ്.
കുടുംബത്തോടൊപ്പം സന്തോഷത്തോടെ കണ്ടിരിക്കാൻ പറ്റിയ, തിയേറ്ററിൽ നിന്ന് ഇറങ്ങുമ്പോൾ മനസ്സ് നിറയ്ക്കുന്ന ഒരു നല്ല സിനിമ തിരയുന്നവർക്ക് ‘അവറാച്ചൻ & സൺസ്’ മിസ്സ് ചെയ്യാൻ പറ്റാത്ത ഒരു അനുഭവമാണ്. ധൈര്യമായി തിയേറ്ററിലേക്ക് പോന്നോളൂ!
