കവളപ്പാറയ്ക്ക് എതിര്‍വശത്തെ മലയില്‍ വിള്ളല്‍; പ്രദേശവാസികളെ ക്യാമ്പിലേയ്ക്ക് മാറ്റി

കേരളത്തില്‍ മഴ ശക്തമാകുന്നു. പലയിടങ്ങളിലും ഇപ്പോഴും കനത്ത മഴ തുടരുകയാണ്. കണ്ണൂര്‍, കോഴിക്കോട്, മലപ്പുറം ജില്ലകളില്‍ ഇന്ന് റെഡ് അലേര്‍ട്ട് പ്രഖ്യാപിച്ചിട്ടുണ്ട്. അതേസമയം സംസ്ഥാനത്തെ നടുക്കിയ ഉരുള്‍പ്പൊട്ടലുണ്ടായ കവളപ്പാറയ്ക്ക് എതിരെയുള്ള മലയില്‍ വിള്ളല്‍ കണ്ടെത്തി. ഇതേത്തുടര്‍ന്ന് പ്രദേശവാസികളെ മാറ്റി പാര്‍പ്പിച്ചു.

വിള്ളല്‍ കണ്ടെത്തിയതിനെതുടര്‍ന്ന് പോത്തുകല്‍ തൊടുമുട്ടി മേഖലയില്‍ നിന്നുമാണ് ആളുകളെ ഒഴിപ്പിച്ചത്. വില്ലേജ് ഓഫീസര്‍ പ്രദേശവാസികള്‍ക്ക് ജാഗ്രതാനിര്‍ദ്ദേശവും നല്‍കിയിട്ടുണ്ട്.

Read more:പെയ്‌തൊഴിയാതെ മഴ; മൂന്ന് ജില്ലകളില്‍ ഇന്ന് റെഡ് അലേര്‍ട്ട്

അതേസമയം കനത്ത മഴയെത്തുടര്‍ന്ന് കവളപ്പാറയിലെ തിരച്ചില്‍ നിര്‍ത്തിവച്ചിരിക്കുകയാണ്. മണ്ണിടിച്ചിലിന് സാധ്യതയുള്ളതിനാലാണ് തിരച്ചില്‍ താല്‍ക്കാലികമായി നിര്‍ത്തിയത്. ഇന്ന് ഒരു മൃദദേഹംകൂടി കവളപ്പാറയില്‍ നിന്നും കണ്ടെടുത്തിരുന്നു. നിലവില്‍ കവളപ്പാറയില്‍ നിന്നും 26 മൃദദേഹങ്ങളാണ് കണ്ടെത്തിയിരിയ്ക്കുന്നത്.