റഹ്മാന്‍ വിസ്മയം വീണ്ടും; ശ്രദ്ധേയമായി മാര്‍വല്‍ ആന്തം: വീഡിയോ
സംഗീത മാന്ത്രികന്‍ എആര്‍ റഹ്മാന്‍ അവഞ്ചേഴ്‌സ് എന്റ്‌ഗെയിമിനായി സ്‌പെഷ്യല്‍ ആന്തം ഒരുക്കിയിരിക്കുകയാണ്. ചിത്രത്തിന്റെ ഇന്ത്യന്‍ റിലീസിനോടനുബന്ധിച്ചാണ് ഗാനം ഒരുക്കിയിരിക്കുന്നത്. ഹിന്ദി വേര്‍ഷനാണ് പുറത്തെത്തിയിരിക്കുന്നത്, ഹിന്ദിക്ക് പുറമെ തമിഴ്, തെലുങ്ക് എന്നീ ഭാഷകളില്ലും ഗാനമെത്തും. ചിത്രത്തിന്റെ ഇന്ത്യന്‍ റിലീസുമായി ബന്ധപ്പെട്ടാണ് ആന്തം ഒരുക്കിയിരിക്കുന്നത്.
മാര്‍വല്‍ സൂപ്പര്‍ ഹീറോസിന്റെ പ്രകടനം കാണാന്‍ കാത്തിരുന്ന ഇന്ത്യക്കാര്‍ക്ക് ഇരട്ടി സന്തോഷം പകരുന്നതാണ് ഏആര്‍ റഹ്മാന്റെ മാര്‍വല്‍ ആന്തം. ഏആര്‍ റഹ്മാന്‍ തന്നെയാണ് ഗാനരംഗത്ത് അഭിനയിക്കുന്നതും. മാര്‍വല്‍ സ്റ്റുഡിയോസിന്റെ വിവിധ സിനിമാരംഗങ്ങളും ആന്തത്തില്‍ ഇടം നേടിയിട്ടുണ്ട്. എന്നാല്‍ അവഞ്ചേഴ്‌സിന്റെ പശ്ചാത്തലവുമായി മാര്‍വല്‍ ആന്തം കാര്യമായ ബന്ധം പുലര്‍ത്തുന്നില്ലെന്നും ചിലര്‍ അഭിപ്രായപ്പെടുന്നു. എന്തായാലും യുട്യൂബില്‍ ഇതിനോടകം തന്നെ പതിനാല് ലക്ഷത്തിലധികം ആളുകള്‍ മാര്‍വല്‍ ആന്തം കണ്ടുകഴിഞ്ഞു. എന്നാല്‍ സിനിമയില്‍ ഈ ഗാനം ഉള്‍പ്പെടുത്തിയിട്ടില്ല.
ചലച്ചിത്ര ആസ്വദകര്‍ ഏറ്റവും അധികം പ്രതീക്ഷ അര്‍പ്പിക്കുന്ന ചിത്രങ്ങളില്‍ ഒന്നാണ് അവഞ്ചേഴ്‌സ് എന്റ്‌ഗെയിം. അവഞ്ചേളഴ്‌സ് ഇന്‍ഫിനിറ്റി വാര്‍ എന്ന ചിത്രത്തിന്റെ വിജയം തന്നെയാണ് എന്റ്‌ഗെയിമിനായി കാത്തിരിക്കാന്‍ ആരാധകരെ പ്രേരിപ്പിക്കുന്നതും. 250 കോടിയിലും മേലെയാണ് അവഞ്ചേഴ്‌സ് ഇന്‍ഫിനിറ്റി വാര്‍ ഇന്ത്യയില്‍ നിന്നു മാത്രമായി നേടിയത്. ഈ ചരിത്രം എന്റ്‌ഗെയിമിലൂടെ വീണ്ടും ആവര്‍ത്തിക്കപ്പെടാനുള്ള സാധ്യതയും തള്ളിക്കളയാനാവില്ല.
Read more:ദീപികയ്ക്ക് ആസിഡ് ആക്രമണത്തെ അതീവിച്ച പെണ്‍കുട്ടിയുടെ സ്‌നേഹ സമ്മാനം
അതേസമയം ലോകമെമ്പാടുമുള്ള മാര്‍വല്‍ സൂപ്പര്‍ ഹീറോസിന്റെ ആരാധകര്‍ക്കായാണ് ആന്തം ഒരുക്കിയിരിക്കുന്നതെന്നും കുടുംബത്തിലെ അവഞ്ചേഴ്‌സ് ആരാധകരില്‍ നിന്നുപോലും ഗാനം ഒരുക്കാന്‍ സമ്മര്‍ദ്ദം ഉണ്ടായി എന്നും എആര്‍ റഹ്മാന്‍ നേരത്തെ ആരാധകരോട് പങ്കുവെച്ചിരുന്നു. അവഞ്ചേഴ്‌സിന് ഏറ്റവും ഉചിതമായ സംഗീതം ഒരുക്കണമെന്നായിരുന്നു എല്ലാവരുടെയും ആവശ്യം. സംഗീത ആസ്വാദകര്‍ക്ക് ഈ ഗാനം ഇഷ്ടപ്പെടുമെന്നാണ് പ്രതീക്ഷിക്കുന്നതെന്നും റഹ്മാന്‍ വ്യക്തമാക്കിയിരുന്നു.
മാര്‍വല്‍ കോമിക്‌സിന്റെ ബ്രഹാമാണ്ഡ ചിത്രമാണ് അവഞ്ചേഴ്‌സ് എന്റ്‌ഗെയിം. സര്‍വ്വശക്തനായ താനോസിനെ നേരിടാന്‍ ഒരുങ്ങുകയാണ് അവഞ്ചേഴ്‌സ്. ഇതിനു വേണ്ടി പുതിയ വേഷത്തില്‍ തന്നെയാണ് അവഞ്ചേഴ്‌സ് പട എത്തിയിരിക്കുന്നതും.
