സത്യത്തിന്റെ രൂപം വിചിത്രമാണ്; സസ്‍പെൻസ് നിറച്ച് അന്വേഷണം ട്രെയ്‌ലർ
അഭിനയ മികവുകൊണ്ടും കഥാപാത്രങ്ങളിലെ വിത്യസ്തതകൊണ്ടും പ്രേക്ഷകരുടെ പ്രിയതാരമായി മാറിയ ജയസൂര്യ മുഖ്യകഥാപാത്രമായി എത്തുന്ന ചിത്രമാണ് അന്വേഷണം. പ്രശോഭ് വിജയനാണ് ചിത്രം സംവിധാനം ചെയ്യുന്നത്. ഇ ഫോര്‍ എന്റര്‍ടെയ്‌മെന്റ്‌സിന്റെ ബാനറിലാണ് പുതിയ ചിത്രത്തിന്റെ നിര്‍മ്മാണം. ഫ്രാന്‍സിസ് തോമസാണ് ചിത്രത്തിന് തിരക്കഥ ഒരുക്കുന്നത്. ചിത്രം ഈ മാസം 31 ന് തിയേറ്ററുകളിലെത്തും. ഫാമിലി ത്രില്ലര്‍ വിഭാഗത്തിലാണ് ചിത്രം തയാറാക്കുന്നത്.
ഇപ്പോഴിതാ ചലച്ചിത്ര ആസ്വാദകർക്കിടയിൽ ഏറെ ശ്രദ്ധനേടുകയാണ് ചിത്രത്തിന്റെ ട്രെയ്‌ലർ. ആകാംഷയും ഭീതിയും നിറച്ചാണ് ചിത്രത്തിന്റെ ട്രെയ്‌ലർ ഒരുക്കിയിരിക്കുന്നത്. ജയസൂര്യ, വിജയ് ബാബു, ലെന, ശ്രുതി രാമചന്ദ്രൻ, ലിയോണ ലിഷോയ് തുടങ്ങി നിരവധി താരങ്ങൾ ചിത്രത്തിൽ അണിനിരക്കുന്നുണ്ട്.
പ്രശോഭ് വിജയന്റെ ആദ്യ സംവിധാന സംരംഭമായിരുന്നു ലില്ലി. തിയേറ്ററുകളില്‍ മികച്ച പ്രേക്ഷക സ്വീകാര്യതയാണ് ഈ ചിത്രത്തിന് ലഭിച്ചത്. ലില്ലി എന്ന സ്ത്രീയുടെ അതിജീവനത്തിന്റെ കഥയായിരുന്നു ചിത്രത്തിന്റെ മുഖ്യ പ്രമേയം.
അതേസമയം ജയസൂര്യ നായകനായെത്തുന്ന മറ്റൊരു ചിത്രത്തിന്റെ പ്രഖ്യാപനവും അടുത്തിടെ നടന്നിരുന്നു. മെട്രോമാന്‍ ഇ ശ്രീധരന്റെ ജീവിതകഥ പറയുന്ന ചിത്രമാണ് ഇത്. വി കെ പ്രകാശാണ് ചിത്രത്തിന്റെ സംവിധാനം നിർവഹിക്കുന്നത്. സുരേഷ് ബാബുവാണ് ചിത്രത്തിനു വേണ്ടിയുള്ള തിരക്കഥ ഒരുക്കുന്നത്. അരുണ്‍ നാരായണനാണ് നിർമാണം. ഇന്ദ്രൻസും ചിത്രത്തില്‍ ഒരു പ്രധാന കഥാപാത്രമായെത്തുന്നുണ്ട്. രാമസേതു എന്നാണ് ചിത്രത്തിന്റെ പേര്.
ജയസൂര്യയുടേതായി അവസാനം വെള്ളിത്തിരയിൽ എത്തിയ ചിത്രമാണ് തൃശൂർ പൂരം. മികച്ച പ്രതികരണമാണ് ചിത്രത്തിന് ലഭിക്കുന്നതും.
