“കുറച്ച് മാത്രം ആഗ്രഹിക്കുക, അല്‍പം മാത്രം ചിന്തിക്കുക…” ആരോഗ്യ രഹസ്യത്തെക്കുറിച്ച് രജനികാന്ത്
തെന്നിന്ത്യ ഒട്ടാകെ നിരവധി ആരാധകരുള്ള നടനാണ് രജനികാന്ത്. വെള്ളിത്തിരയിലെത്തുന്ന ഓരോ കഥാപാത്രങ്ങളെയും അഭിനയമികവുകൊണ്ട് താരം അവിസ്മരണീയമാക്കാറുണ്ട്. സ്റ്റൈല് മന്നന്‍ എന്നാണ് രജനികാന്തിനെ ആരാധകര്‍ വിശേഷിപ്പിക്കാറ്. ഇത് ശരിവയ്ക്കും വിധമാണ് താരത്തിന്റെ ലുക്കും. 69-ാം വയസ്സിലും സ്‌റ്റൈലന്‍ ലുക്കിലിരിക്കുന്ന രജനികാന്ത് തന്റെ ആരോഗ്യ രഹസ്യത്തെക്കുറിച്ചും വ്യക്തമാക്കുന്നു.
“കുറച്ച് മാത്രം ആഗ്രഹിക്കുക, കുറച്ച് മാത്രം ചിന്തിക്കുക, അല്‍പം ഭക്ഷിക്കുക, അല്‍പം മാത്രം ഉറങ്ങുക ഒപ്പം വ്യായാമവും” ഇതാണ് രജനികാന്തിന്റെ ആരോഗ്യരഹസ്യം. താരം കേന്ദ്ര കഥാപാത്രമായെത്തുന്ന പുതിയ ചിത്രം ദര്‍ബാറിന്റെ പ്രൊമോഷന്റെ ഭാഗമായി ഹൈദരാബാദില്‍ നടന്ന ഒരു പരിപാടിക്കിടെയാണ് താരം ആരോഗ്യ രഹസ്യത്തെക്കുറിച്ച് വാചാലനായത്. ദര്‍ബാര്‍ ഈ മാസം 9-ന് തിയേറ്ററുകളില്‍ പ്രദര്‍ശനത്തിനെത്തും. എ ആര്‍ മുരുഗദോസ് ആണ് ചിത്രത്തിന്റെ സംവിധാനം നിര്‍വഹിക്കുന്നത്.
ഒരു പോലീസുകാരനായിട്ടാണ് സ്റ്റൈല് മന്നന്‍ ‘ദര്‍ബാറി’ലെത്തുന്നത്. 1992-ല്‍ പുറത്തിറങ്ങിയ ‘പാണ്ഡ്യന്‍’ എന്ന ചിത്രത്തിലാണ് രജനികാന്ത് അവസാനമായി പോലീസ് വേഷത്തിലെത്തിയത്. മുംബൈ ആസ്ഥാനമായി നടക്കുന്ന കഥയാണ് ദര്‍ബാറിന്റെ മുഖ്യ പ്രമേയം. അതേസമയം ഇളയദളപതി വിജയ് കേന്ദ്ര കഥാപാത്രമായെത്തിയ ‘സര്‍ക്കാര്‍’ ആയിരുന്നു എ ആര്‍ മുരുഗദോസ് സംവിധാനം നിര്‍വഹിച്ച അവസാന ചിത്രം. മുരുഗദോസ് സംവിധാനം നിര്‍വഹിച്ച ‘കത്തി’ എന്ന ചിത്രത്തിന്റെ നിര്‍മ്മാതാക്കളായ ലൈക്ക പ്രൊഡക്ഷന്‍സ് വീണ്ടും മുരുഗദോസുമായി കൈകോര്‍ക്കുന്ന ചിത്രം കൂടിയാണ് ‘ദര്‍ബാര്‍’.
പതിനാല് വര്‍ഷങ്ങള്‍ക്ക് ശേഷം നയന്‍താര എ ആര്‍ മുരഗദോസിന്റെ ചിത്രത്തില്‍ അഭിനയിക്കുന്നു എന്ന പ്രത്യേകതയും ദര്‍ബാറിനുണ്ട്. 2005 ല്‍ പുറത്തിറങ്ങിയ ‘ഗജിനി’ ആയിരുന്നു നയന്‍താരയും മുരുഗദോസും ഒരുമിച്ച അവസാന ചിത്രം. അതേസമയം രജനികാന്തിനോടൊപ്പമുള്ള നയന്‍താരയുടെ നാലാമത്തെ ചിത്രമാണ് ‘ദര്‍ബാര്‍’. ‘ചന്ദ്രമുഖി’, ‘കുശേലന്‍’, ‘ശിവജി’ എന്നിവയാണ് രജനീകാന്തും നയന്‍താരയും വെള്ളിത്തിരയില്‍ ഒരുമിച്ചെത്തിയ മറ്റ് മൂന്ന് ചിത്രങ്ങള്‍.
സന്തോഷ് ശിവനാണ് ‘ദര്‍ബാര്‍’ എന്ന സിനിമയുടെ സിനിമാറ്റോഗ്രഫി നിര്‍വഹിക്കുന്നത്. നീണ്ട ഇടവേളയ്ക്ക് ശേഷം രജനികാന്തിനായി സന്തോഷ് ശിവന്‍ ക്യാമറ ചലിപ്പിക്കുന്നു എന്ന പ്രത്യേകതയും ഈ ചിത്രത്തിനുണ്ട്. അനിരുദ്ധ് രവിചന്ദര്‍ ആണ് ചിത്രത്തിന്റെ സംഗീത സംവിധായകന്‍.
