ശിവാജി ഗണേശന്റെ ഒന്നരമിനിറ്റ് നീണ്ട ഡയലോഗ് ഒറ്റ ടേക്കിലെടുത്ത് മമ്മൂട്ടി- ‘നൻപകൽ നേരത്ത് മയക്കം’ ടീസർ
നടൻ മമ്മൂട്ടിയും പ്രശസ്ത സംവിധായകൻ ലിജോ ജോസ് പെല്ലിശ്ശേരിയും ഒന്നിക്കുന്നത് കാണാൻ ആകാംക്ഷയോടെ കാത്തിരിക്കുന്ന ഓരോ സിനിമാ പ്രേമികളുടെയും സ്വപ്ന സാക്ഷാത്കാരമാണ് വരാനിരിക്കുന്ന ചിത്രം ‘നൻപകൽ നേരത്ത് മയക്കം’. ചിത്രത്തിലെ നടൻ മമ്മൂട്ടിയുടെ സ്വഭാവ ഘടനയെക്കുറിച്ച് ഇതിനകം തന്നെ ഊഹാപോഹങ്ങൾ ആരാധകർക്കിടയിൽ പ്രചരിക്കുന്നുണ്ട്. ഇപ്പോഴിതാ, ചിത്രത്തിന്റെ ടീസർ എത്തിയിരിക്കുകയാണ്.
കഥയെക്കുറിച്ച് സൂചന നൽകാതെയാണ് ടീസർ ഒരുക്കിയിരിക്കുന്നത്. ഗൗരവം എന്ന ചിത്രത്തിൽ ശിവാജി ഗണേശൻ അഭിനയിച്ച് വിസ്മയിപ്പിച്ച ഒരു രംഗവുമായാണ് മമ്മൂട്ടി ടീസറിൽ എത്തുന്നത്. ശിവാജി ഗണേശൻ ഇരട്ടവേഷത്തിൽ അവതരിപ്പിച്ച ഒന്നരമിനിറ്റ് ഡയലോഗ് ഒറ്റ ടേക്കിൽ മമ്മൂട്ടി അവതരിപ്പിക്കുന്നു. ഇത് ചിത്രത്തിന്റെ രണ്ടാമത്തെ ടീസറാണ്. ആദ്യ ടീസറും സൂചനകൾ ഒന്നും നൽകിയിട്ടില്ല.
കഥയുടെ ഭൂരിഭാഗവും നടക്കുന്നത് തമിഴ്നാട്ടിൽ, പ്രത്യേകിച്ച് പഴനിയിൽ ആയതിനാലാണ് ചിത്രത്തിന് തമിഴ് പേര് നൽകിയതെന്നാണ് ടിനു പാപ്പച്ചൻ ഒരു മാധ്യമത്തിന് നൽകിയ അഭിമുഖത്തിൽ വ്യക്തമാക്കിയത്. ‘നൻപകൽ നേരത്ത് മയക്കം’ എന്ന ശീർഷകത്തിന്റെ അർത്ഥം ‘ഉച്ചസമയത്ത് ഉറങ്ങുക’ എന്നാണ്.
1991 ൽ പുറത്തിറങ്ങിയ ഭരതൻ സംവിധാനം ചെയ്ത ‘അമരം’ എന്ന ചിത്രത്തിന് ശേഷം അശോകൻ മമ്മൂട്ടിയ്‌ക്കൊപ്പം അഭിനയിക്കുന്ന ചിത്രം കൂടിയാണ് ഇത്. നീണ്ട 30 വർഷത്തെ ഇടവേളയ്ക്ക് ശേഷം അശോകൻ മമ്മൂട്ടിക്കൊപ്പം ഒരു പ്രധാന കഥാപാത്രത്തെ അവതരിപ്പിക്കുന്ന ചിത്രമെന്ന നിലയിലും ‘നൻപകൽ നേരത്ത് മയക്കം’ പ്രേക്ഷകർക്ക് ആകാംക്ഷ സമ്മാനിക്കുന്നുണ്ട്.
Read Also; ‘മണ്ണടിയും നാൾവരെ കൂടെ കാവലായി..’-ഉള്ളുതൊട്ട ആലാപന മാധുര്യവുമായി മിയ
അതേസമയം, സൈക്കിൾ മെക്കാനിക്ക് കൂടിയായ വേലൻ എന്ന കള്ളന്റെ വേഷത്തിലാണ് മമ്മൂട്ടി അഭിനയിക്കുന്നതെന്ന് റിപ്പോർട്ടുകൾ സൂചിപ്പിക്കുന്നു.മമ്മൂട്ടി-ലിജോ ജോസ് പെല്ലിശ്ശേരി കൂട്ടുകെട്ടിൽ ഒരുങ്ങുന്ന ‘നൻപകൽ നേരത്ത് മയക്കം’ എന്ന ചിത്രത്തിന്റെ ഛായാഗ്രഹണം നിർവ്വഹിക്കുന്നത് ‘പേരൻപ്’, ‘കർണ്ണൻ’ എന്നീ തമിഴ് ചിത്രങ്ങളിലൂടെ ശ്രദ്ധേയനായ തേനി ഈശ്വറാണ്. ‘പേരൻപ്’ എന്ന തമിഴ് ചിത്രത്തിലെ അമുധവൻ എന്ന കഥാപാത്രത്തെ അവതരിപ്പിച്ചതിന് മമ്മൂട്ടിക്ക് വലിയ സ്വീകാര്യത മുൻപ് ലഭിച്ചിരുന്നു.
Story highlights- nanpakal nerath mayakkam second teaser
