റൊട്ടി ഉണ്ടാക്കുന്നതിനിടെ പാടിയ പാട്ട് ഹിറ്റ്; ഗായികയെ തിരഞ്ഞ് സോഷ്യൽ ലോകം- വിഡിയോ

അടുക്കളയിൽ പാചകത്തിനിടെ പാടിയ ഗാനത്തിലൂടെ ഒരു പെൺകുട്ടി താരമായത് അടുത്തിടെയാണ്. പസൂരി എന്ന പാക്കിസ്ഥാൻ ഗാനം ആണ് പെൺകുട്ടി ആലപിച്ചത്. ഇപ്പോഴിതാ, സമാനമായ ഒരു വിഡിയോ ശ്രദ്ധനേടുകയാണ്. പാചകത്തിനിടെയാണ് ഈ യുവതിയും ഗാനം ആലപിക്കുന്നത്. മേരെ നൈന എന്ന ഗാനമാണ് യുവതി ആലപിക്കുന്നത്.

1976-ലെ ഹിറ്റ് ഗാനമായ മേരേ നൈന സാവൻ ഭദോൻ എന്ന ഗാനം റൊട്ടി ഉണ്ടാക്കുന്നതിനിടയിൽ ഒരു സ്ത്രീ പാടുകയാണ്. ദശലക്ഷക്കണക്കിന് ആളുകൾക്കിടയിൽ വിഡിയോ വൈറലായി മാറുകയും സോഷ്യൽ മീഡിയയിൽ വലിയതോതിൽ അഭിനന്ദനം നേടുകയും ചെയ്തു.

വിഡിയോപകർത്തുന്നത് ഒരു കൊച്ചുകുട്ടിയാണ്. ആ പെൺകുട്ടി പാടാൻ സ്ത്രീയോട് ആവശ്യപ്പെടുന്നത് കേൾക്കാം. പിങ്ക് നിറത്തിലുള്ള സാരി ഉടുത്ത് നിലത്തിരുന്ന് റൊട്ടി ഉണ്ടാക്കുന്ന തിരക്കിലായ സ്ത്രീ, വളരെ മടിയോടെയാണ് പാടാൻ ആരംഭിക്കുന്നത്. പാടിത്തുടങ്ങിയതും അമ്പരപ്പിച്ചുകളഞ്ഞു എന്നുവേണം പറയാൻ. അത്രമനോഹരമാണ്‌ യുവതിയുടെ ആലാപനം.

കണ്ണടച്ചുതുറക്കുമ്പോൾ താരമാകുന്നവർ എന്ന് കേട്ടിട്ടില്ലേ. അങ്ങനെ ജീവിതം മാറിമറിഞ്ഞവർ ഒട്ടേറെയുണ്ട്. അത്തരത്തിൽ താരമായ ഈ യുവതിയെ തിരയുകയാണ് ഇപ്പോൾ സമൂഹമാധ്യമങ്ങൾ. അതേസമയം, പസൂരി ഗാനം പാടി താരമായ യുവതി ഇൻസ്റ്റഗ്രാം താരം കൂടിയാണ്.

Read Also: തിരക്കില്ലാത്ത ലളിതമായ ജീവിതം ആഗ്രഹിക്കുന്നവരാണോ? ശീലമാക്കാം ഈ രീതികൾ

മുംബൈയിൽ നിന്നുള്ള ഗായിക ശാലിനി ദുബെയാണ് പസൂരി പാടുന്ന വിഡിയോ ഇൻസ്റ്റഗ്രാമിൽ അപ്‌ലോഡ് ചെയ്തത്. ഇൻസ്റ്റാഗ്രാമിൽ ശാലിനിക്ക് 64.4k ഫോളോവേഴ്‌സ് ഉണ്ട്. മാത്രമല്ല, പസൂരി പാടുന്ന വിഡിയോ 20 ദശലക്ഷത്തിലധികം വ്യൂസ് നേടി. അടുക്കളയാണ് ശാലിനിക്ക് പാടാൻ ഏറ്റവും ഇഷ്ടപ്പെട്ട ഇടം. അതുകൊണ്ടുതന്നെ അടുക്കളയിൽ നിന്നാണ് എല്ലാ പാട്ടുകളും ശാലിനി പാടുന്നത്.

Story highlights- Woman sings while making rotis in viral video