ഡാക്കർ റാലി; ബൈക്ക് റാലി 2ൽ പോ‍ഡിയത്തിലേറി മലയാളി ഹാരിത് നോവ..!
സൗദി അറേബ്യയിൽ നടന്ന ഡാക്കർ റാലിയിൽ ഇന്ത്യയ്ക്ക് ഇരട്ട നേട്ടം. ബൈക്ക് റാലി വിഭാഗത്തിൽ ഹീറോ മോട്ടോസ്പോർട്സ് ടീം രണ്ടാം സ്ഥാനത്തെത്തിയപ്പോൾ റാലി 2വിൽ മത്സരിച്ച മലയാളി ഹാരിത് നോവ ഒന്നാം സ്ഥാനം നേടി. ഷെർകോ ടിവിഎസ് റാലി ഫാക്ടറിക്കു വേണ്ടിയാണ് ഷൊർണൂർ സ്വദേശി ഹാരിത് നോവ മത്സരിച്ചത്. ( Harith Noah becomes the first Indian to win Dakar rally )
ആകെ സമയം 54 മണിക്കൂർ, 24 മിനിറ്റ്, 44 സെക്കൻഡ്. ഓവറോൾ ബൈക്ക് റാങ്കിങ്ങിൽ(റാലി ജിപി+റാലി 2) 11–ാം സ്ഥാനം നേടാനും ഹാരിത്തിനായി. പ്രധാന റാലികളിലൊന്നിൽ പോഡിയം ഫിനിഷ് നേടുന്ന ആദ്യ ഇന്ത്യൻ നിർമാതാക്കൾ എന്ന നേട്ടം ഹീറോയും റാലി 2വിൽ ഒന്നാമതെത്തുന്ന ആദ്യ ഇന്ത്യൻ താരം എന്ന നേട്ടം ഹാരിതും കൈവരിച്ചു. തൻ്റെ അഞ്ചാമത്തെ ഡാക്കാർ റാലിയിൽ മത്സരിച്ച ഹാരിത് നോഹ, രണ്ടാം സ്ഥാനക്കാരനായ റൊമെയ്ൻ ഡുമോണ്ടിയറിനേക്കാൾ നാല് മിനിറ്റിലധികം മുന്നിലായിരുന്നു. ഷൊർണൂർ സ്വദേശി മുഹമ്മദ് റാഫിയുടെയും ജർമൻകാരിയായ സൂസന്നയുടെയും മകനാണ് ഹാരിത് നോവ.
Read Also : ദി ഗ്രേറ്റസ്റ്റ് ഓഫ് ഓൾ ടൈം ; മെദീരയുടെ രാജകുമാരന് ഇന്ന് 39-ാം പിറന്നാൾ
2018ൽ ഹാരിത് ദേശീയ സൂപ്പർ ക്രോസ് ചാമ്പ്യനായി. 2012ൽ ആണു ടിവിഎസ് ടീമംഗമായത്. 2021ൽ ഡാക്കർ റാലിയിൽ 20–ാം സ്ഥാനത്തെത്തിയിരുന്നു. ലോകത്തിലെ ഏറ്റവും അപകടകരവും സാഹസികവുമായ ഓഫ് റോഡ് മോട്ടർ റേസിങ് മത്സരമാണു ഡാക്കർ റാലി. പാരിസ്–ഡാക്കർ റാലി എന്ന പേരിൽ 1978ൽ പാരിസിലായിരുന്നു തുടക്കം. കാർ, ബൈക്ക്, ട്രക്ക് തുടങ്ങി 7 വിഭാഗം വാഹനങ്ങൾക്കു പ്രത്യേക മത്സരമുണ്ട്. കെ പി അരവിന്ദിനും സി എസ് സന്തോഷിനും ശേഷം ഡാകർ റാലിയിൽ പങ്കെടുക്കുന്ന മൂന്നാമത്തെ ഇന്ത്യക്കാരനാണ് ഹാരിത് നോഹ.
Story highlights : Harith Noah becomes the first Indian to win Dakar rally
