‘സൈക്കോളജിക്കൽ ഡാർക്ക് കോമഡി’ പ്രേക്ഷകരെ ഞെട്ടിച്ച് അഭിനവ് സുന്ദർ- നസ്ലെൻ കൂട്ടുകെട്ട്
മലയാള പ്രേക്ഷകർക്ക് അധികം വശമില്ലാത്ത ഡാർക്ക് ഹ്യൂമറിലൂടെ തിയേറ്ററും പ്രേക്ഷകരെയും ഒന്നടങ്കം കൈയ്യിലെടുത്ത സംവിധായകനാണ് അഭിനവ് സുന്ദർ നായക്. ഇദ്ദേഹത്തിൻ്റെ അടുത്ത ചിത്രം പ്രഖ്യാപിച്ചതു മുതൽ പ്രേക്ഷകർ ഒന്നടങ്കം കാത്തിരിക്കുകയായിരുന്നു. ആ കാത്തിരിപ്പിനു വിരാമമിട്ടാണ് മോളിവുഡ് ടൈംസ് പ്രദർശനത്തിനെത്തിയത്. പ്രേക്ഷകരുടെ കാത്തിരിപ്പിനും പ്രതീക്ഷയ്ക്കും ഒരു ഭംഗവും തട്ടാതെയാണ് സംവിധായകൻ സിനിമ വിട്ടുകൊടുത്തിരിക്കുന്നത്. പ്രതീക്ഷകൾക്കുമപ്പുറം സിനിമ പ്രേക്ഷകർ ഇപ്പോൾ തന്നെ ഏറ്റെടുത്തിരിക്കുന്നു. മുകുന്ദനുണ്ണി അസോസിയേറ്റ്സ് പോലെ തന്നെ തൻ്റെ കരിയറിലെ അടുത്ത സക്സ് മൂവി മോളിവുഡ് ടൈംസ് ആണെന്ന് സംവിധായകൻ അഭിനവ് സുന്ദർ നായക് ഉറപ്പിക്കുന്നു.”സിനിമയോടുള്ള ഒരു വിദ്വേഷക്കത്ത്” (A Hate Letter to Cinema) എന്ന ടാഗ്ലൈനോടെയാണ് ഈ സൈക്കോളജിക്കൽ ഡാർക്ക് കോമഡി ചിത്രം എത്തിയിരിക്കുന്നത്. സിനിമയെക്കുറിച്ചുള്ള മാസ്മരികമായ നുണകളെയും സിനിമാലോകത്തെ ഇരുണ്ട വശങ്ങളെയും ഒട്ടും ദയയില്ലാതെ തുറന്നുകാട്ടാൻ ചിത്രം ശ്രമിക്കുന്നുണ്ട്.
Read also- സിനിമക്കുള്ളിലെ സിനിമയുമായി വരുന്ന നസ്ലെൻ ചിത്രം ‘മോളിവുഡ് ടൈംസി’ന്റെ പ്രോമോ സോങ് പുറത്ത്
തുടക്കം മുതൽ അവസാനം വരെ തൻ്റെ പെർഫോർമൻസ് ഗ്രാഫ് ഒരിട പോലും തെന്നാതെയാണ് നസ്ലെൻ അഭിനയം കാഴ്ചവച്ചിരിക്കുന്നത്. തൻ്റെ ഓരോ സിനിമകഴിയും തോറും പ്രേക്ഷകരുടെ മനസിൽ കഴിവ് കൊണ്ട് ഇടംനേടുകയാണ് നസ്ലെൻ. വിനീത് മാധവനായി പ്രത്യക്ഷപ്പെടുന്ന നസ്ലെൻ, കുട്ടിക്കാലത്തെ ഇൻസ്പിറേഷനിൽ നിന്നും ഒരു സിനിമാ മോഹിയായി മാറുകയും മലയാള സിനിമയിൽ തനിക്കൊരു സിനിമ നിർമിക്കണം എന്ന സ്വപ്നത്തോടെ ജീവിക്കുകയും പിന്നീട് വിനീതിൻ്റെ യാത്രയിൽ സംഭവിക്കുന്നതുമായ കഥകളുമാണ് ചിത്രമ മുന്നോട്ടുവയ്ക്കുന്നത്. മലയാള സിനിമാലോകത്ത് ക്യാമറയ്ക്ക് പിന്നിൽ നടക്കുന്ന പല മോശം പ്രവണതകളുമാണ് ചിത്രം വരച്ചുകാട്ടുന്നത്. ചിരിച്ച മുഖങ്ങൾക്ക് പിന്നിലെ ചതിയും വഞ്ചനയുമെല്ലാംവഞ്ചനയുമെല്ലാം ചിത്രം കൃത്യമായി പറയുന്നു. കുട്ടിക്കാലം മുതൽ സിനിമ പാഷനായി കൊണ്ടുനടക്കുന്ന വിനീത് മാധവൻ നേരിടുന്ന പ്രതിസന്ധികളും അതെല്ലാം അയാളെ ഏത് തരത്തിലാണ് മാറ്റിമറിക്കുന്നത് എന്നുമെല്ലാം ചിത്രം രസകരമായി കാണിക്കുന്നു. ആ തരത്തിൽ കമിങ് ഓഫ് ഏജ് ചിത്രം കൂടിയാണ് മോളിവുഡ് ടൈംസ്. നസ്ലെൻ കൂടാതെ ശരൺ യു ധീൻ, സംഗീത് പ്രതാപ്, റോഷൻ ഷാനവാസ്, ജഗദീഷ് എന്നിവർ തങ്ങളുടെ വേഷങ്ങൾ മികച്ചതാക്കി. സിനിമയ്ക്കുള്ളിലെ സിനിമാക്കാരായി എത്തുന്ന കഥാപാത്രങ്ങൾ പല പ്രമുഖരെയും ഓർമ്മിപ്പിക്കുന്നതായിരുന്നു.
Story Highlights : A dark, unapologetic psychological comedy-drama directed by Abhinav Sunder Nayak (Mukundan Unni Associates), billed as a brutal “hate letter to cinema.”
