ചിരി പൂരം വെടിക്കെട്ട് ആക്ഷൻ;കയ്യടി നേടി ‘ധൂമകേതു’
വ്യത്യസ്തമായ പ്രമേയവും പക്കാ കോമഡി എന്റർടൈനർ പാക്കേജുമായി തിയേറ്ററുകളിൽ വൻ ചിരി തരംഗം സൃഷ്ടിക്കുകയാണ് സജിൻ ഗോപു നായകനായെത്തിയ ‘ധൂമക്കേതു’. തികച്ചും പുതുമയുള്ള ഒരു കഥാപരിസരത്തിൽ പ്രേക്ഷകരെ ബോറടിപ്പിക്കാതെ മുന്നോട്ട് കൊണ്ടുപോകുന്നതിൽ ചിത്രം പൂർണ്ണമായും വിജയിച്ചിട്ടുണ്ട്. വർഷങ്ങളായുള്ള കാത്തിരിപ്പിനൊടുവിൽ ഷർമിളയെ വിവാഹം കഴിക്കാൻ റെഡിയായി നിൽക്കുന്ന ‘കുട്ടൻ’ എന്ന കഥാപാത്രത്തിലൂടെയാണ് ചിത്രം മുന്നോട്ട് പോകുന്നത്. ഒടുവിൽ ആ സുദിനം എത്തുന്നു. എന്നാൽ കഥ മാറുന്നത് അവിടെനിന്നാണ്. കല്യാണദിവസം രാവിലെ ഉറക്കമുണരുന്നത് മുതൽ ആദ്യരാത്രി വരെയുള്ള സംഭവവികാസങ്ങൾ ഒരു ടൈം ലൂപ്പ് പോലെ ദിവസവും ആവർത്തിക്കപ്പെടാൻ തുടങ്ങുന്നു!
Read also – അഴിക്കുംതോറും മുറുകുന്ന കുരുക്ക്; മികച്ച സിനിമ അനുഭവമായി ‘ആരം ‘
കുട്ടൻ എന്ന കേന്ദ്രകഥാപാത്രമായി എത്തിയ സജിൻ ഗോപു പടത്തിലുടനീളം തകർപ്പൻ പ്രകടനമാണ് കാഴ്ചവെച്ചിരിക്കുന്നത്. ലൂപ്പിൽ പെട്ടുപോയ കുട്ടന്റെ അങ്കലാപ്പും, നെട്ടോട്ടവും, ഇമോഷണൽ ഘട്ടങ്ങളുമെല്ലാം കൃത്യമായ കോമഡി ടൈമിംഗിലൂടെ അവതരിപ്പിക്കാൻ സജിൻ ഗോപുവിന് സാധിച്ചു. ഗണപതി, ഷൈൻ ടോം ചാക്കോ, നിഖില വിമൽ തുടങ്ങി ഓരോ അഭിനേതാക്കളും ഏറ്റവും മികച്ച പ്രകടനം തന്നെയാണ് കാഴ്ച്ചവെക്കുന്നത്. സിനിമയിലെ ഏറ്റവും മികച്ച ഹൈലൈറ്റുകളിലൊന്ന് ക്ലൈമാക്സിലെ വെടിക്കെട്ട് ഫൈറ്റ് സീൻ’ ആണ്. സർപ്രൈസിംഗ് ആയി എത്തുന്ന ഈ ആക്ഷൻ രംഗം പ്രേക്ഷകർക്ക് വൻ തിയേറ്റർ എക്സ്പീരിയൻസാണ് നൽകുന്നത്. ‘നെയ്മർ’ എന്ന സിനിമയ്ക്ക് ശേഷം സുധി മാഡിസൺ സംവിധാനം ചെയ്ത ചിത്രത്തിന്റെ തിരക്കഥ ഒരുക്കിയിരിക്കുന്നത് സണ്ണി, മനു എന്നിവർ ചേർന്നാണ്. ഹാപ്പി അവേഴ്സ് എന്റർടൈൻമെന്റ്സ്, എ ആൻഡ് എച്ച്എസ് പ്രൊഡക്ഷൻസ് എന്നിവയുടെ ബാനറിൽ സമീർ താഹിർ, ഷൈജു ഖാലിദ്, സജിൻ അലി, അബ്ബാസ് തിരുനാവായ എന്നിവരാണ് ചിത്രം നിർമ്മിച്ചിരിക്കുന്നത്. അങ്കിത് മേനോനാണ് സംഗീത സംവിധാനം.
Story highlights: ‘Dhoomakethu’ a must watch action thriller
