നവരസ ഫിലിംസ് – സ്റ്റോൺ ബെഞ്ച് കൂട്ടുകെട്ടിൽ വീണ്ടുമൊരു തിരിച്ചുവരവിനൊരുങ്ങി സംവൃതാ സുനിൽ
‘തങ്കം’ എന്ന ശ്രദ്ധേയ ചിത്രത്തിന് ശേഷം സംവിധായകൻ ഷഹീദ് അറഫാത്ത് ഒരുക്കുന്ന പുതിയ ചിത്രം പ്രഖ്യാപിച്ചു. നവരസ ഫിലിംസിന്റെയും സ്റ്റോൺ ബെഞ്ച് സ്റ്റുഡിയോയുടെയും ബാനറിൽ ഒരുങ്ങുന്ന ചിത്രത്തിന്റെ സ്വിച്ച് ഓൺ, പൂജ ചടങ്ങുകൾ ഇന്ന് നടന്നു. നീണ്ട ഇടവേളക്ക് ശേഷം സംവൃതാ സുനിൽ സിനിമലോകത്തേക്ക് മടങ്ങി വരുന്നു എന്ന പ്രത്യേകതയും ഈ സിനിമയ്ക്കുണ്ട് . നവരസ പ്രൊഡക്ഷൻ നമ്പർ 3 എന്നാണ് ചിത്രത്തിന് താത്കാലികമായി നൽകിയിരിക്കുന്ന പേര്. ശ്രീജിത്ത് കെഎസും കാർത്തികേയൻ എസും ചേർന്നാണ് ചിത്രം നിർമ്മിക്കുന്നത്. ധിലോർ, റിജോഷ്, മോൻസി, ബ്ലെസ്സി എന്നിവർ സഹനിർമ്മാതാക്കളാണ്. ‘കെട്ട്യോളാണ് എന്റെ മാലാഖ’, ‘അഡിയോസ് അമിഗോസ്’ എന്നീ ചിത്രങ്ങളുടെ രചന നിർവഹിച്ച തങ്കം ആണ് ചിത്രത്തിൻ്റെ രചന.
Read also- മമ്മൂട്ടിയുടെ “മേള”; നിതീഷ് സഹദേവ് ചിത്രം ടൈറ്റിലും ഫസ്റ്റ് ലുക്കും പുറത്ത്, മാസ്സ് എന്റെർറ്റൈനറുമായി മമ്മൂട്ടി കമ്പനി
ദിലീഷ് പോത്തൻ, അൽഫോൺസ് പുത്രൻ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങൾ. ചിത്രത്തിൽ ജിബിൻ ഗോപിനാഥ്, അഭിജിത്ത് സുരേഷ്, അശ്വതി മനോഹരൻ, റിയാസ് ഖാൻ, ശ്രുതി ജയൻ, ബിസാൽ പ്രസന്ന എന്നിവരും ഭാഗമാണ്. ‘ആട് ജീവിതം’ എന്ന ചിത്രത്തിന് ശേഷം സുനിൽ കെ യെസ് ചായഗ്രഹണം നിർവഹിക്കുന്ന ചിത്രമാണിത്. ‘ഗപ്പി’, ‘അമ്പിളി’, ‘ആശാൻ’ എന്നീ ചിത്രങ്ങളുടെ സംവിധായകൻ ജോൺപോൾ ജോർജ് ചിത്രത്തിന്റെ സംഗീതം ഒരുക്കുന്നു. എക്സിക്യൂട്ടീവ് പ്രൊഡ്യൂസർ : അഭിജിത്ത് സുരേഷ്, എഡിറ്റർ : കിരൺ ദാസ്, ഒറിജിനൽ സ്കോർ : അജീഷ് ആന്റോ, പ്രൊഡക്ഷൻ ഡിസൈനർ : സുഭാഷ് കരുണ്, ചീഫ് അസോസിയേറ്റ് ഡയറക്ടർ : വിപിൻ വിജയൻ, പ്രൊഡക്ഷൻ കൺട്രോളർ : ബിനു മുരളി, ലൈൻ പ്രൊഡ്യൂസർ : അശ്വിൻ കെ വി, മേക്കപ്പ് : റോണക്സ് സേവ്യർ, കോസ്റ്റ്യൂംസ് : ധന്യ ബാലകൃഷ്ണൻ, ഓൺലൈൻ മാർക്കറ്റിംഗ് : ഒബ്സ്ക്യൂറ, ഡിസൈൻസ് : യെല്ലോടൂത്ത്സ്, പി.ആർ.ഒ : വൈശാഖ് സി. വടക്കേവീട്, ജിനു അനിൽകുമാർ
Story highlights: Samvrutha Sunil’s new movie announced
