നവമാധ്യമങ്ങളില്‍ തരംഗമായി കുട്ടനാടന്‍ ബ്ലോഗിലെ ‘ബ്രോ സോങ്’; വീഡിയോ കാണാം

September 15, 2018

നവമാധ്യമങ്ങളില്‍ തരംഗമായി മാറിയിരിക്കുകയാണ് മമ്മൂട്ടി നായകനായെത്തിയ ‘ഒരു കുട്ടനാടന്‍ ബ്ലോഗ്’ എന്ന ചിത്രത്തിലെ ‘ബ്രോ സോങും’. കിടിലന്‍ ന്യൂജനറേഷന്‍ പാട്ടെന്നാണ് പലരും ഈ ഗാനത്തെ വിശേഷിപ്പിക്കുന്നത്. ‘ചാരത്തു നീ വന്നതെന്തേ…’ എന്നു തുടങ്ങുന്നതാണ് ഈ തകര്‍പ്പന്‍ ഗാനം. മലയാളത്തിന്റെ പ്രിയതാരം ഉണ്ണി മുകുന്ദനാണ് ഈ ഗാനം ആലപിച്ചിരിക്കുന്നത് എന്ന പ്രത്യേകതയും ഈ പാട്ടിനുണ്ട്. യുവാക്കളെ ആകര്‍ഷിക്കുന്ന രീതിയിലാണ് ഗാനത്തിന്റെ വരികള്‍. ശ്രീനാഥ് ശിവശങ്കറിന്റേതാണ് ഗാനരചന.

തിരക്കഥാകൃത്തായ സേതു ആദ്യമായി സംവിധാനം ചെയ്യുന്ന ചിത്രമാണ് ഒരു കുട്ടനാടന്‍ ബ്ലോഗ്. ഗാനങ്ങള്‍ക്ക് ചിത്രത്തില്‍ ഒട്ടേറെ പ്രാധാന്യം നല്‍കിട്ടിണ്ട്. ചിത്ത്രതിലുടനീളം അഞ്ച് ഗാനങ്ങളാണുള്ളത്. നേരത്തെ പുറത്തിറങ്ങിയ ‘മാനത്തെ മാരിവില്‍ ചിറകില്‍…’ എന്നു തുടങ്ങുന്ന ഒരു കുട്ടനാടന്‍ ബ്ലോഗിലെ ഗാനവും ഏറെ പ്രേക്ഷക സ്വീകാര്യത നേടിയിരുന്നു. നാടന്‍ പാട്ടിന്റെ ചേലില്‍ ഒരുക്കിയ ‘ഏലംപാടി ഏലേലേലോ എന്ന് തുടങ്ങുന്ന ഒരു കുട്ടനാടന്‍ ബ്ലോഗിലെ ഗാനത്തിനും മികച്ച പ്രതികരണമാണ് ലഭിച്ചത്. ഇതോടെ വള്ളംകളിക്കൊപ്പം പാടാന്‍ മലയാളികള്‍ക്ക് ഒരു ഗാനം കൂടി സ്വന്തമായി. കുട്ടനാടിന്റെ പശ്ചാത്തലത്തില്‍ ഒരുക്കിയിരിക്കുന്ന ചിത്രത്തില്‍ സണ്ണി വെയ്ന്‍, അനു സിത്താര, ഷംന കാസീം, ലക്ഷ്മി റായി, സിദ്ദിഖ്, നെടുമുടി വേണു, സഞ്ജു ശിവറാം എന്നിവരും കഥാപാത്രങ്ങളായി എത്തുന്നുണ്ട്.

കുട്ടനാട്ടിലെ ഒരു ഗ്രാമപ്രദേശത്തെ ആളുകളുടെ ജീവിതം കേന്ദ്രീകരിച്ചാണ് ചിത്രം മുന്നോട്ട് പോകുന്നത്. ഈ ഗ്രാമത്തില്‍ താമസിക്കുന്ന ഒരു ബ്ലോഗ് എഴുത്തുകാരനായ ഹരി എന്ന വ്യക്തിയായാണ് മമ്മൂട്ടി എത്തുന്നത്. അനന്ത വിഷന്റെ ബാനറില്‍ പി മുരളീധരനും ശാന്താ മുരളീധരനും ചേര്‍ന്നാണ് ചിത്രം നിര്‍മ്മിക്കുന്നത്. മെമ്മറീസിന് ശേഷം ഇരുവരും ചേര്‍ന്ന് നിര്‍മ്മിക്കുന്ന സിനിമയാണ് ഒരു കുട്ടനാടന്‍ ബ്ലോഗ്. പ്രദീപ് ഛായാഗ്രഹണം നിര്‍വഹിക്കുന്ന ചിത്രത്തിനായി സംഗീത സംവിധാനം നിശ്ചയിച്ചിരിക്കുന്നത് ശ്രീനാഥാണ്. ബുജിബാലാണ് ചിത്രത്തിന്റെ പശ്ചാത്തല സംഗീതം.