ശരീരം സൂചനകൾ നൽകുമ്പോൾ അവഗണിക്കരുത്- ആശുപത്രി കിടക്കയിൽ നിന്നും ഖുശ്ബു
തെന്നിന്ത്യൻ സിനിമാലോകത്തെ പ്രിയതാരമാണ് ഖുശ്ബു. മലയാളത്തിൽ എല്ലാ സൂപ്പർതാരങ്ങൾക്കൊപ്പവും ഖുശ്ബു വേഷമിട്ടിട്ടുണ്ട്. മാത്രമല്ല, സിനിമാ സൗഹൃദങ്ങൾ ഖുശ്ബു കാത്തുസൂക്ഷിക്കുന്നുണ്ട്. അൻപതുവയസ് പിന്നിട്ട നടി ഫിറ്റ്നസിന് വളരെയധികം പ്രാധാന്യം നൽകുന്നുണ്ട്. ഇപ്പോഴിതാ, ആശുപത്രി കിടക്കയിൽ നിന്നും വളരെ പ്രധാനപ്പെട്ട ചില നിർദേശങ്ങൾ നൽകുകയാണ് നടി. khushbu sundar health update
‘ഇൻഫ്ലുവൻസ നിങ്ങളെ ബാധിക്കുമ്പോൾ.. കടുത്ത പനി, ശരീരവേദന, ബലഹീനത എന്നിവ കാരണം അഡ്മിറ്റ് ചെയ്തിരിക്കുകയാണ്. അഡെനോവൈറസ് വളരെ മോശമാണ്. പനിയുടെ ലക്ഷണങ്ങളൊന്നും ഒഴിവാക്കരുത്. നിങ്ങളുടെ ശരീരം അതിനുള്ള അടയാളങ്ങൾ നൽകുമ്പോൾ വേഗത കുറയ്ക്കുക. നിങ്ങളുടെ ആരോഗ്യം ശ്രദ്ധിക്കുക. ആരോഗ്യവാനായിരിക്കു’- ഖുശ്ബു കുറിക്കുന്നു. ആശുപത്രയിൽ നിന്നുള്ള ചിത്രങ്ങളും നടി പങ്കുവയ്ക്കുന്നു.
അടുത്തിടെ മേക്കോവറിലൂടെ ഞെട്ടിച്ചിരുന്നു നടി. ‘ദൃഢനിശ്ചയമുള്ള ഒരു സ്ത്രീയെ ഒരിക്കലും വിലകുറച്ച് കാണരുത്’ എന്ന ക്യാപ്ഷനൊപ്പമാണ് ഖുശ്ബു ചിത്രങ്ങൾ പങ്കുവെച്ചിരിക്കുന്നത്. ദിവസവും രണ്ടു മണിക്കൂർ വർക്ക്ഔട്ട് ചെയ്യാറുണ്ടെന്നും ഡയറ്റ് പിന്തുടരുന്നുണ്ടെന്നും നടി പങ്കുവെച്ചിരുന്നു. അതിനാൽ തന്നെ ഖുശ്‌ബുവിന്റെ മാറ്റത്തെക്കുറിച്ച് ആരാധകരും ആകാംക്ഷയിലായിരുന്നു.
അതേസമയം, ലോക്ക് ഡൗൺ ദിനങ്ങളിൽ സിനിമാതിരക്കിൽ നിന്നും ഇടവേളയെടുത്ത് സൗന്ദര്യ സംരക്ഷണത്തിനായി സമയം മാറ്റിവെച്ചിരുന്നു നടി. പ്രകൃതിദത്തമായ സൗന്ദര്യ സംരക്ഷണ രീതികൾ ആരാധകർക്കായി പങ്കുവയ്ക്കുകയും ചെയ്തിരുന്നു. അതോടൊപ്പം, അടുത്തിടെ കണ്ണിന് ശസ്ത്രക്രിയ ചെയ്യുന്നതുകൊണ്ട് സമൂഹമാധ്യങ്ങളിൽ നിന്നും കുറച്ചുനാൾ നടി ഇടവേള എടുത്തിരുന്നു.
1980 കളിൽ ഒരു ബാലതാരമായിട്ടാണ് ഖുശ്ബു അഭിനയ ജീവിതം തുടങ്ങിയത്. ‘തോടിസി ബേവഫായി’ എന്ന ചിത്രത്തിലാണ് ആദ്യമായി വേഷമിട്ടത്. ലാവാരിസ് എന്ന ചിത്രത്തിൽ ഒരു പ്രധാന വേഷം ചെയ്തതോടെ ഖുശ്ബു ശ്രദ്ധിക്കപ്പെട്ടു.
രജനികാന്ത്, കമലഹാസൻ, സത്യരാജ്, പ്രഭു, സുരേഷ്‌ഗോപി, മോഹൻലാൽ, മമ്മൂട്ടി,ജയറാം,ദിലീപ്, എന്നിവരോടൊപ്പമെല്ലാം ഖുശ്ബു വേഷമിട്ടിരുന്നു. തമിഴിലും മലയാളത്തിലും കന്നടയിലും സജീവമാണ് ഖുശ്ബു. മലയാളത്തിൽ മിസ്റ്റർ മരുമകൻ എന്ന ചിത്രത്തിലാണ് ഏറ്റവും ഒടുവിൽ അഭിനയിച്ചത്.
Story highlights- khushbu sundar health update
