‘ഇപ്പോൾ ഞാൻ സംയുക്തയല്ല, സംതൃപ്തയാണ്’- 20-ാം വിവാഹ വാർഷിക നിറവിൽ സംയുക്തയും ബിജു മേനോനും
മലയാള സിനിമയുടെ പ്രിയ താര ദമ്പതികളാണ് ബിജു മേനോനും സംയുക്ത വർമ്മയും.വളരെ സുന്ദരമായ പ്രണയകാലത്തിനൊടുവിൽ വിവാഹിതരായവരാണ് ബിജു മേനോനും സംയുക്തയും. ഗോസിപ്പുകൾക്ക് ഇടനൽകാതെ അന്നും ഇന്നും സിനിമാലോകത്ത് പ്രിയപ്പെട്ടവരായി നിലകൊള്ളുന്ന ബിജു മേനോനും സംയുക്ത വർമ്മയും ഇപ്പോൾ 20-ാം വിവാഹ വാർഷിക നിറവിലാണ്. ഇരുവർക്കും ഹൃദ്യമായ ഒരു ആശംസയാണ് സംയുക്ത വർമ്മയുടെ ചെറിയമ്മയും അഭിനേത്രിയുമായ ഊർമിള ഉണ്ണി പങ്കുവെച്ചിരിക്കുന്നത്. (biju menon and samyuktha varma celebrating their 20th wedding anniversary )
ഊർമിള ഉണ്ണിയുടെ വാക്കുകൾ;
ജീവിതം സുന്ദരം…കുട്ടിക്കാലത്ത് നല്ല കുറുമ്പിയായിരുന്നു സംയുക്ത .എവിടെയായാലും ഉള്ള സ്ഥലത്ത് വേഗത്തിൽ വട്ടത്തിൽ ഓടുക, വീഴുക ശരീരമാകെ മുറിവേൽപ്പിക്കുക അതാണ് ഹോബി..
വീട്ടിൽ നിന്നു നടക്കാവുന്ന ദൂരമേയുള്ളു സ്‌കൂളിലേക്ക്. വൃത്തിയായി ഒരുക്കിയാണ് അവളെ സ്ക്കൂളിലേക്ക് വിടുക.എൻ്റെ ചൂണ്ടുവിരൽ പിടിച്ചു നടക്കുമ്പോൾ അവൾ പറയും, ഹോം വർക്ക് ചെയ്യുമ്പോൾ അമ്മ എന്നെ കുറെ ചീത്ത പറഞ്ഞു താത്താതൈ. എന്നെ അത്രക്ക് ഇഷ്ടമല്ലെങ്കിൽ ചുരുട്ടി കൂട്ടി വയറ്റിലേക്ക് ഇട്ടോളൻ പറയു അമ്മയോട് ….. എനിക്കു താത്താതൈയ്യെ മാത്രമെ ഇഷ്ടമുള്ളു. സ്‌കൂളിൽ നിന്നു തിരിച്ചു വരുമ്പോൾ അവളുടെ രൂപമൊന്നു കാണണം ,തലമുടിയൊക്കെ ഷോക്കടിച്ച പോലെ പൊങ്ങി നിൽക്കുന്നുണ്ടാവും .മേലാ സകലം ചെളി പുരണ്ടിരിക്കും. ഷൂസിൻ്റെ ലേസ് കൂട്ടികെട്ടി തോളിലിട്ടിരിക്കും !!
അവൾക്കു 14 വയസ്സായി. ഹിന്ദി പാട്ടുകൾ Tv യിൽ കണ്ടിരിക്കുമ്പോൾ സoയുക്ത എന്നോടു പറഞ്ഞു .”മീശയില്ലാത്ത മിനുമിനാ മുഖമുള്ള ഒരാളെ താത്താതൈ എനിക്കു കണ്ടു പിടിച്ചു തരണം … പ്രേമിക്കാനാ” … ഉമചേച്ചി എന്നെ അടുക്കളയിൽ നിന്നു കണ്ണുരുട്ടി നോക്കി.
സംയുക്ത സിനിമാ താരമായി. അവൾക്കു തിരക്കായി. എൻ്റെ ഒരു സുഹൃത്ത് എന്നെ വിളിച്ചു പറഞ്ഞു സംയുക്തയും,ബിജു മേനോനും പ്രണയത്തിലാണെന്ന് കേൾക്കുന്നല്ലോ ഊർമ്മിളേ …. ഞാൻ പൊട്ടിച്ചിരിച്ചു !”ചുമ്മാ “!!! ഒന്നാമത്തെ കാര്യം അവൾ പ്രണയിക്കുന്നത് പോലും എന്നോട് ചോദിച്ചിട്ടായിരിക്കും..പിന്നെ മിനുമിനാ മുഖമുള്ളയാൾ വേണമല്ലോ.. അല്ലാതെ രോമേശ്വരനായ ബിജുവിനെ അവൾക്കു ശരിയാവുമോ …?
നമ്മുടെ മനസ്സിൽ കുട്ടികൾ വലുതാവലേയില്ല .ഞാനെന്തു മണ്ടിയാണ്, അവൾ പ്രണയമൊക്കെ എന്നോട് പറയുമെന്നു കരുതി വെറുതെ കാത്തിരുന്നു.. അവരുടെ ഇരുപതാം വിവാഹ വാർഷികം വന്നെത്തി. ഞാൻ സംയുക്തയോടു ചോദിച്ചു, എങ്ങിനെ പോകുന്നു കുടുംബ ജീവിതം? അവൾ പറഞ്ഞു ; ”ചിലർ നമ്മുടെ ജീവിതത്തിൽ എത്തുമ്പോൾ മുതൽ നമുക്ക് ഒരു ഉത്തരവാദിത്വം അനുഭവപ്പെടും .അതു തോന്നിയാൽ ആ ബന്ധം നിലനിൽക്കും .സ്നേഹത്തിനു വേണ്ടിയുള്ള വിട്ടുവീഴ്ചകളാണ് പിന്നീടങ്ങോട്ട്. ഞാനിപ്പോൾ സo യുക്തയല്ല; സംതൃപ്തയാണ് താത്താതൈ …. ഞാൻ കുസൃതി ചോദ്യം ചോദിച്ചു ..അപ്പൊ മിനുമിനുത്ത മുഖമുള്ളയാൾ? അവൾ പൊട്ടി ചിരിച്ചു എന്നിട്ട് മമ്മൂക്കയുടെ വാക്കുകൾ കടമെടുത്തു. ഭാര്യാഭർത്തൃബന്ധം എന്നു പറയുന്നത് ഒരുരക്തബന്ധമല്ല ,പക്ഷെ എല്ലാ ബന്ധങ്ങളും, ജീവിതവും ഒക്കെ തുടങ്ങുന്നത് ഒരു വിവാഹബന്ധത്തിൽ നിന്നാണ്. പരസ്പരം മനസ്സിലാക്കുന്ന ഒരു ജീവിത പങ്കാളിയുണ്ടെങ്കിൽ പിന്നെ ജീവിതം സുന്ദരം !!’ജന്മങ്ങൾക്കപ്പുറമെന്നോ ,ഒരു ചെമ്പകം പൂക്കും സുഗന്ധം ..( ഇന്നു വിവാഹ വാർഷികം).
Read also: “ഞാൻ സഹായിക്കാം”; ഹൃദയങ്ങൾ കവർന്ന് ഷാരൂഖ്, സ്റ്റേഡിയത്തിൽ നിന്ന് ഹൃദ്യമായൊരു കാഴ്ച്ച!
ബിജു മേനോനും സംയുക്ത വർമ്മയും ഒരുമിച്ച് ‘മഴ’, ‘മധുരനൊമ്പരക്കാറ്റ്’, ‘മേഘമൽഹാർ’ എന്നീ ചിത്രങ്ങളിൽ പ്രവർത്തിച്ചിട്ടുണ്ട്. 2002ലാണ് ഇരുവരും വിവാഹിതരായത്. വിവാഹത്തെ തുടർന്ന് സംയുക്ത വർമ്മ അഭിനയത്തിൽ നിന്നും അകന്നെങ്കിലും പരസ്യ ചിത്രങ്ങളിൽ സജീവമാണ്. ഇവർക്ക് ഒരു മകനുണ്ട്.
Story highlights- biju menon and samyuktha varma celebrating their 20th wedding anniversary
