പാരീസിലെ ഈഫൽ ടവറിനേക്കാൾ ഉയരമുള്ളത്; ഇത് ലോകത്തിലെ ഏറ്റവും ഉയരം കൂടിയ റെയിൽപാലം!

ജമ്മുകശ്മീരിലെ നിവാസികൾക്ക് ഉയരമുള്ള കുന്നിൻപ്രദേശങ്ങളിൽ യാത്ര ചെയ്യുന്നത് ഏറെ ബുദ്ധിമുട്ടുള്ളതായിരുന്നു. ഒടുവിൽ മെച്ചപ്പെട്ട ഗതാഗത സൗകര്യങ്ങൾ ഒരുക്കേണ്ടതിന്റെ അടിയന്തിര ആവശ്യം ഇന്ത്യാ ഗവൺമെന്റ് ശരിവെച്ചു. ജമ്മു കശ്മീരിനെ ഇന്ത്യയുടെ മറ്റ് ഭാഗങ്ങളുമായി ബന്ധിപ്പിക്കുന്ന ഒരു ദേശീയ റെയിൽവേ പദ്ധതിയുടെ നിർമ്മാണത്തിന് തുടക്കമായത് അങ്ങനെയാണ്. (World’s tallest rail bridge)

1.3 കിലോമീറ്റർ നീളമുള്ള ചെനാബ് പാലം നദീതടത്തിൽ നിന്ന് 359 മീറ്റർ ഉയരത്തിലാണ് സ്ഥിതി ചെയ്യുന്നത്. പാരീസിലെ ഈഫൽ ടവറിനേക്കാൾ 35 മീറ്റർ ഉയരത്തിലാണ് ഇത് സ്ഥിതിചെയ്യുന്നത്. കത്ര മുതൽ ബനിഹാൽ വരെയുള്ള 111 കിലോമീറ്റർ പാതയെ ബന്ധിപ്പിക്കുന്ന ഏക മാധ്യമം ഈ പാലമാണ്.

ഏറ്റവും സങ്കീർണ്ണവും ഒറ്റപ്പെട്ടതുമായ ഭൂപ്രദേശങ്ങളിലൊന്നിലാണ് പാലം നിർമ്മിച്ചിരിക്കുന്നത്. പുഴയുടെ ഒഴുക്ക് തടസ്സപ്പെടുത്താതെ പാലം നിർമിക്കുക എന്നതായിരുന്നു ഏറ്റവും വലിയ വെല്ലുവിളി. പാലത്തിന്റെ അടിത്തറയിലേക്കെത്താൻ അഞ്ച് കിലോമീറ്റർ നീളത്തിൽ അപ്രോച്ച് റോഡുകൾ നിർമിക്കേണ്ടി വന്നു.

Read also: “പട്ടിണിയിൽ നിന്നും സമ്പന്നതയിലേക്ക്”; ഇത് കോടീശ്വരന്മാരുടെ ഗ്രാമം!

പാലം നിർമിക്കാൻ കേബിൾ ക്രെയിനുകളും ഡെറിക്കുകളും ഉപയോഗിച്ചു. പദ്ധതിക്കായി ഉപയോഗിച്ച കേബിൾ ക്രെയിനുകൾ ലോകത്തിലെ ഏറ്റവും വലിപ്പമുള്ളവയായിരുന്നു. പാലത്തിന്റെ നിർമ്മാണത്തിൽ 28,660 മെട്രിക് ടൺ സ്റ്റീൽ ഉപയോഗിച്ചിട്ടുണ്ട്. പാലത്തിന്റെ ആർച്ചിൽ സ്റ്റീൽ ബോക്സുകളുണ്ട്. സ്ഥിരത മെച്ചപ്പെടുത്തുന്നതിനായി ബ്ലോക്കുകളിൽ കോൺക്രീറ്റും നിറച്ചിട്ടുണ്ട്.

120 വർഷമാണ് പാലത്തിന്റെ ആയുസ്സ്. മണിക്കൂറിൽ 266 കിലോമീറ്റർ വരെ വേഗതയുള്ള കാറ്റിനെ ചെറുക്കുന്ന തരത്തിലാണ് ഇത് രൂപകൽപ്പന ചെയ്തിരിക്കുന്നത്. ഏറ്റവും കൂടുതൽ തീവ്രതയുള്ള സോൺ-V യുടെ ഭൂകമ്പ ശക്തികളെ വരെ താങ്ങാൻ ഇതിന് കഴിയും.

ഇപ്പോൾ വിനോദസഞ്ചാരികൾക്കും സന്തോഷവാർത്തയുണ്ട്. ഉടൻ തന്നെ ചെനാബ് റെയിൽവേ പാലം ഒരു വിനോദസഞ്ചാര കേന്ദ്രമായി വികസിപ്പിക്കാൻ ഒരുങ്ങുകയാണ്.

Story highlights: World’s tallest rail bridge