സദാസമയവും ആവിപറക്കുന്ന തടാകത്തിന് പിന്നിൽ…

ആവി പറക്കുന്ന തടാകമോ…? തലക്കെട്ട് വായിച്ചവരിൽ പലരും സംഗതി പിടികിട്ടാതെ ഇപ്പോൾ തലപുകയ്ക്കുന്നുണ്ടാകും. എങ്കിൽ അധികമൊന്നും ആലോചിക്കണ്ട മുഴുവൻ സമയവും ആവി പറക്കുന്ന ഒരു നദിയുണ്ട്, ന്യൂസിലൻഡിലെ വൈമാൻഗു താഴ്വരയിലാണ് പ്രകൃതി ഒരുക്കിയ അത്ഭുതങ്ങൾ നിറഞ്ഞ ഈ നദിയുള്ളത്. ഫ്രൈയിങ് പാൻ തടാകം എന്നാണ് ഈ തടാകത്തിന്റെ പേര്.

ലോകത്തിലെതന്നെ ഏറ്റവും ചൂടുള്ളതും അസിഡിക് സ്വഭാവമുള്ളതുമായ ജലമാണ് ഈ തടാകത്തിലേത്. 50- 60 ഡിഗ്രി സെൽഷ്യസ് ആണ് ഇവിടുത്തെ താപനില. ഇത്തരത്തിൽ ഒരു തടാകം ഇവിടെ രൂപപെട്ടതിന് പിന്നിൽ ഒരു കാരണമുണ്ട്. ഒരു വലിയ അഗ്നിപർവ്വത സ്ഫോടത്തിന്റെ ഫലമായുണ്ടായതാണ് ഈ ഫ്രൈയിങ് പാൻ തടാകം. താരാവേര അഗ്നിപർവ്വതത്തിന്റെ പൊട്ടിത്തെറിയോടെ ഈ താഴ്വരയുടെ അടിസ്ഥാന സ്വഭാവം തന്നെ മാറി. പൊട്ടിത്തെറിയ്ക്ക് ശേഷം ഇവിടെ നിരവധി ചൂടുനീരുറവകൾ പ്രത്യക്ഷപ്പെട്ടു. ഇക്കൂട്ടത്തിൽ ഉണ്ടായ ഏറ്റവും വലിയ ഉഷ്ണജല പ്രവാഹമാണ് ഈ തടാകം.

Read also: അപ്രതീക്ഷിതമായി റോഡരികിൽ കണ്ടെത്തിയ സ്വർണ ക്യൂബ്, 87 കോടി വിലമതിക്കുന്ന സമ്മാനത്തിന് പിന്നിൽ…

അതേസമയം, 1917 ൽ വീണ്ടും ഒരു വലിയ പൊട്ടിത്തെറി ഉണ്ടായതിന്റെ ഫലമായാണ് ഈ തടാകത്തിന് ഇപ്പോൾ കാണുന്ന രൂപം ലഭിച്ചത്. ഏകദേശം 38,000 ചതുരശ്ര മീറ്റർ വിസ്തൃതിയുണ്ട് ഈ തടാകത്തിന്. 18 മുതൽ 60 അടി വരെ താഴ്ചയുമുണ്ട് ഈ തടാകത്തിന്. എപ്പോഴും ഈ തടാകത്തിന്റെ ഉപരിതലത്തിൽ നിന്നും പുക ഉയരാറുണ്ട്. കാർബൺ ഡയോക്സൈഡ്, ഹൈഡ്രജൻ സൾഫൈഡ് തുടങ്ങിയ വാതകങ്ങളാണ് ഈ തടാകത്തിൽ നിന്നും പുറന്തള്ളപ്പെടുന്നത്. തടാകത്തിന് ചുറ്റിലും സിലിക്ക ഘടനകളും ധാതു നിക്ഷേപങ്ങളുടെ വർണ്ണാഭമായ പ്രതലങ്ങളും ഇവിടെത്തുന്നവരെ ആകർഷിക്കുന്ന കാഴ്ചകളാണ്.

Story highlights: hot spring lake in new zealand