രക്ഷാ പ്രവര്‍ത്തനത്തിനിടെ മരണപ്പെട്ട ലിനുവിന്റെ കുടുംബത്തിന് വീടു നിര്‍മ്മിച്ചു നല്‍കുമെന്ന് മോഹന്‍ലാലിന്‍റെ വിശ്വാശാന്തി ഫൗണ്ടേഷന്‍
മഴക്കെടുതിയില്‍ രക്ഷാപ്രവര്‍ത്തനത്തിനിടെ മരണം കവര്‍ന്ന ലിനുവിന്റെ കുടുംബത്തിന് വീട് നിര്‍മ്മിച്ചു നല്‍കുമെന്ന് മോഹന്‍ലാല്‍ ചെയര്‍മാനായുള്ള വിശ്വശാന്തി ഫൗണ്ടേഷന്‍. മേജര്‍ രവിയാണ് ഇക്കാര്യം അറിയിച്ചത്. വിശ്വശാന്തി ഫൗണ്ടേഷന്റെ പ്രതിനിധിയായി മേജര്‍ രവി ലിനുവിന്റെ വീട് സന്ദര്‍ശിച്ചു. അടിയന്തര സഹായമായി ലിനുവിന്റെ അമ്മയ്ക്ക് ഒരു ലക്ഷം രൂപയും നല്‍കി.
അതേസമയം ലിനുവിന്റെ കുടുംബത്തിന് നടന്‍ ജയസൂര്യ അഞ്ച് ലക്ഷം രൂപയും സഹായം നല്‍കി. ലിനുവിന്റെ അമ്മയെ വിളിച്ച് നടന്‍ മമ്മൂട്ടിയും സഹായം വാഗ്ദാനം ചെയ്തിട്ടുണ്ട്.
വീട് മഴയെടുത്തപ്പോള്‍ ലിനുവും അച്ഛനും അമ്മയും സഹോദരങ്ങളും സമീപത്തെ ദുരിതാശ്വാസ ക്യാമ്പിലേയ്ക്ക് മാറി. തുടര്‍ന്ന് കുടുങ്ങിക്കിടക്കുന്ന മറ്റുള്ളവരെ രക്ഷിക്കുന്നതിനായി കൂട്ടുകാര്‍ക്കൊപ്പം ലിനു പോയി. എന്നാല്‍ കുണ്ടായിത്തോട് എരഞ്ഞിരക്കാട്ട് പാലത്തിനു സമീപം രക്ഷാപ്രവര്‍ത്തനത്തിനിടെ ലിനുവിനെ കാണാതായി. മണിക്കൂറുകള്‍ക്ക് ശേഷം ലിനുവിന്റെ മൃദദേഹം സുഹൃത്തുക്കള്‍ കണ്ടെത്തുകയായിരുന്നു.
