നാട്ടിക ബീച്ച് ഫെസ്റ്റിവല്‍; ശ്രദ്ധ നേടി പെറ്റ് ഷോ

January 19, 2020

ജനങ്ങള്‍ക്ക് വൈവിധ്യങ്ങളുടെ ദൃശ്യ വിരുന്നൊരുക്കുകയാണ് നാട്ടിക ബീച്ച് ഫെസ്റ്റിലൂടെ. പൂരങ്ങളുടെ നാടായ തൃശ്ശൂരിലാണ് നാട്ടിക ബീച്ച് ഫെസ്റ്റ് നടക്കുന്നത്. ജനുവരി 16 ന് ആരംഭിച്ച ഫെസ്റ്റ് ഈ മാസം 26 വരെ നീണ്ടു നില്‍ക്കും.

അതേസമയം കാഴ്ചക്കാരില്‍ കൗതുകം നിറയ്ക്കുകയാണ് നാട്ടിക ബീച്ച് ഫെസ്റ്റിലെ പെറ്റ് ഷോ. ഫെതര്‍ ആന്‍ഡ് നെയില്‍ പെറ്റ് ഷോയ്ക്ക് മികച്ച ജനസ്വീകാര്യതയാണ് ലഭിക്കുന്നതും. അന്താരഷ്ട്ര വിപണിയില്‍ നാലരലക്ഷത്തോളം രൂപ വിലമതിക്കുന്ന ഹാര്‍ലിക്കന്‍ മക്കാവോ, രണ്ട് ലക്ഷത്തിലധികം വിലമതിക്കുന്ന ബ്ലൂ ഹെഡഡ് വൈനസ് തുടങ്ങി നൂറിലധികം ഇനത്തില്‍പ്പെട്ട പക്ഷികളും മുപ്പതിലധികം രാജ്യങ്ങളില്‍ നിന്നുള്ള പ്രാവിനങ്ങളും നൂറിലധികം കോഴി വര്‍ഗത്തില്‍പ്പെട്ട പക്ഷികളും അറേബ്യന്‍ പൂച്ചകളും അന്താരാഷ്ട്ര വിപണിയില്‍ ആറ് ലക്ഷത്തില്‍പ്പരം രൂപ വിലമതിക്കുന്ന ബ്ലാക്ക് ടപ്പ് മര്‍മ്മോസെറ്റ് കുരങ്ങുകളും ഉള്‍പ്പെടെ ആയിരത്തിലധികം പക്ഷിമൃഗാദികളാണ് പെറ്റ് ഷോയില്‍ ഉള്ളത്. പ്രായഭേദമന്യേ മേളയിലെത്തുന്നവര്‍ക്ക് കൗതുകം നിറഞ്ഞ വിസ്മയക്കാഴ്ച ഒരുക്കുകയാണ് ഈ പെറ്റ് ഷോ.

അതേസമയം തൃശൂരിന്റെ പടിഞ്ഞാറന്‍ തീരത്ത് ഒരുങ്ങുന്ന വമ്പന്‍ ഷോപ്പിംഗ് കാര്‍ണിവല്‍ ആസ്വദിക്കാനായി നിരവധിപ്പേര്‍ എത്തുന്നുണ്ട്. ആഴക്കടല്‍ കാഴ്ചകളുമായി അക്വാ ഷോ, ആകര്‍ഷകമായ വിലക്കുറവില്‍ ഗൃഹോപകരണങ്ങള്‍, രുചി ഭേദങ്ങളുടെ കലവറ തീര്‍ത്ത് ഫുഡ് കോര്‍ട്ട്, അതിമനോഹരമായ പുഷ്പക്കാഴ്ചകളുമായി വൃന്ദാവന്‍ ഫ്ളവര്‍ ഷോ, വാഹനങ്ങളുടെ പ്രദര്‍ശനം, കുട്ടികള്‍ക്കായി അമ്യുസ്‌മെന്റ്‌റ് പാര്‍ക്ക് എന്നിവയൊക്കെ നാട്ടിക ബീച്ച് ഫെസ്റ്റിന്റെ മറ്റ് പ്രധാന ആകര്‍ഷണങ്ങളാണ്.

ഇതിനു പുറമെ വൈവിധ്യമാര്‍ന്ന വസ്ത്രങ്ങളുടെ മേള, ഓട്ടോമൊബൈല്‍, ഇന്റീരിയര്‍ ഡിസൈന്‍, വിദ്യാഭ്യാസ രംഗത്തെ കുറിച്ചുള്ള നിര്‍ദേശങ്ങള്‍ക്കായി പ്രത്യേക കൗണ്ടറുകള്‍, ലോണ്‍ മേള തുടങ്ങിയവയെല്ലാം നാട്ടിക ബീച്ച് ഫെസ്റ്റിന്റെ മാറ്റു കൂട്ടുന്നു. വര്‍ണ്ണാഭമായ കാഴ്ചകള്‍ക്കൊപ്പം കാഴ്ചക്കാര്‍ക്ക് ഇഷ്ടാനുസരണം സാധനങ്ങള്‍ വാങ്ങിക്കുന്നതിനുള്ള സൗകര്യങ്ങളും നാട്ടിക ബീച്ച് ഫെസ്റ്റില്‍ ഒരുക്കിയിട്ടുണ്ട്.