‘മോഹന്‍ലാല്‍ -ജാക്കി ചാന്‍ ചിത്രം നായര്‍സാന്‍’; പ്രചരിക്കുന്ന വാര്‍ത്ത വ്യാജം
കഴിഞ്ഞ കുറച്ചു ദിവസങ്ങളായി സമൂഹമാധ്യമങ്ങളിലാകെ നിറഞ്ഞത് ഒരു സിനിമയെക്കുറിച്ചുള്ള വാര്‍ത്തകളാണ്. മോഹന്‍ലാല്‍- ജാക്കി ചാന്‍ കൂട്ടുകെട്ടില്‍ നായര്‍സാന്‍ എന്ന പേരില്‍ പുതിയ ചിത്രം വരുന്നു എന്ന തരത്തിലായിരുന്നു വാര്‍ത്തകള്‍ പ്രചരിച്ചിരുന്നത്. എന്നാല്‍ ഈ വാര്‍ത്ത വ്യാജവും അടിസ്ഥാന രഹിതവുമാണെന്ന് വ്യക്തമാക്കിയിരിക്കുകയാണ് സംവിധായകനായ ആല്‍ബര്‍ട്ട് ആന്റണി.
സ്വാതന്ത്ര്യ സമര സേനാനിയായ അയ്യപ്പന്‍പിള്ള മാധവന്‍ നായര്‍ എന്നയാളുടെ കഥ പറയുന്ന ചിത്രമാണ് നായര്‍സാന്‍ എന്നും മോഹന്‍ലാലാണ് ചിത്രത്തില്‍ അയ്യപ്പന്‍പിള്ള മാധവന്‍ നായരായെത്തുന്നതെന്നും വാര്‍ത്തകള്‍ പ്രചരിച്ചിരുന്നു. കണ്ണേ മടങ്ങുക എന്ന ചിത്രത്തിന്റെ സംവിധാനത്തിലൂടെ മികച്ച സംവിധായകനുള്ള സംസ്ഥാന അവാര്‍ഡ് കരസ്ഥമാക്കിയ ആല്‍ബര്‍ട്ട് ആന്റണിയാണ് ചിത്രത്തിന്റെ സംവിധായകന്‍ എന്നും വാര്‍ത്തയില്‍ പറയുന്നുണ്ട്. എന്നാല്‍ ഇതെല്ലാം അടിസ്ഥാന രഹിതമാണെന്നാണ് സംവിധായകന്‍ ആല്‍ബര്‍ട്ട് ആന്റണി പറയുന്നത്.
അതേസമയം ബിഗ് ബ്രദര്‍ ആണ് മോഹന്‍ലാലിന്റേതായി ഏറ്റവും ഒടുവില്‍ തിയേറ്ററുകളിലെത്തിയ ചിത്രം. സിദ്ദിഖാണ് ചിത്രത്തിന്റെ സംവിധായകന്‍. തിയേറ്ററുകളില്‍ പ്രദര്‍ശനം തുടരുന്ന ചിത്രത്തിന് സമ്മിശ്ര പ്രതികരണമാണ് പ്രേക്ഷകരില്‍ നിന്നും ലഭിക്കുന്നത്. മോഹന്‍ലാലിന് പുറമെ, അറബ്ബാസ് ഖാന്‍, അനൂപ് മേനോന്‍, ഹണി റോസ്, മിര്‍ണ മേനോന്‍, വിഷ്ണു ഉണ്ണിക്കൃഷ്ണന്‍, ഇര്‍ഷാദ്, സാര്‍ജാനോ ഖാലിദ് തുടങ്ങി നിരവധി താരങ്ങള്‍ ചിത്രത്തില്‍ അണിനിരക്കുന്നുണ്ട്.
