ചൂടുകാലത്ത് ക്ഷീണമകറ്റാന്‍ ഇളനീര്

March 26, 2019

ആരോഗ്യ ഗുണങ്ങളുടെ കാര്യത്തില്‍ ഏറെ മുന്നിലാണ് ഇളനീരിന്റെ സ്ഥാനം. ഇളനീരിന്റെ പലതരത്തിലുള്ള വിഭവങ്ങളും ഇന്ന് സുലഭമാണ്. ചൂടുകാലത്ത് ഇളനീര് കുടിക്കുന്നത് ഉത്തമവും ഒപ്പം ആരോഗ്യകരവുമാണ്.

നമ്മുടെ സംസ്ഥാനം അറിയപ്പെടുന്നതുപോലും കേരം തിങ്ങിയ നാടെന്നാണ്. കേരളത്തിന്റെ സ്വന്തം ഫലമാണ് കരിക്ക്. കരിക്ക് കൊണ്ടുള്ള വിവിധ വിഭവങ്ങളും ഇന്ന് വിപണികളില്‍ സജീവമാണ്. ആന്റീ ഓക്‌സിഡന്റുകള്‍ ധാരളമടങ്ങിയിട്ടുണ്ട് കരിക്കിന്‍ ജ്യൂസില്‍. ഇത് ആരോഗ്യത്തിന് ഏറെ ഗുണകരമാണ്. ധാതുക്കളാല്‍ സമ്പന്നമായ കരിക്കിന്‍ വെള്ളവും ചൂടുകാലത്ത് നല്ലതുതന്നെ.

കുറഞ്ഞ കലോറിയാണ് കരിക്കിന്‍ വെള്ളത്തിലുള്ളത്. അതേസമയം പൊട്ടാസ്യവും എന്‍സൈമുകളും ധാതുക്കളും ഇളനീരില്‍ ധാരാളമായി അടങ്ങിയിട്ടുണ്ട്. രോഗാവസ്ഥയില്‍ പോലും ഇളനീര് കുടിക്കുന്നത് നല്ലതാണ്. പ്രകൃതിദത്തമായ ഇത്രയും നല്ലൊരു പാനിയം വേറെ കാണില്ല.

ഇളനീരില്‍ ലോറിക് ആസിഡ് ധാരാളമായി അടങ്ങിയിട്ടുണ്ട്. ഇത് സമ്മുടെ ശരീരത്തിലെ രോഗപ്രതിരോധ ശേഷി വര്‍ധിപ്പിക്കാന്‍ സഹായിക്കുന്നു. നിര്‍ജ്ജലീകരണത്തിനും നല്ലൊരു പ്രതിവിധിയാണ് അതിരാവിലെ വെറും വയറ്റില്‍ ഇളനീര്‍ കുടിക്കുന്നത്. ഇത് ശരീരത്തിലെ ജലാംശത്തെ നിലനിര്‍ത്താന്‍ സഹായിക്കും.

Read more:‘കലങ്കി’ലെ ഈ പാട്ട് സൂപ്പര്‍ഹിറ്റ്; കാഴ്ചക്കാര്‍ 2 കോടിക്കും മേലെ

മനുഷ്യശരീരത്തിലെ ഇലക്ട്രലൈറ്റിന്റെ തോത് കൃത്യമായി നിലനിര്‍ത്താനും ഇളനീര് സഹായിക്കും. മാനസീകവും ശാരീരികവുമായ ഊര്‍ജ്ജസ്വലതയ്ക്കും നല്ലതാണ് ഇളനീര് കുടിക്കുന്നത്. ഭക്ഷണം കഴിക്കുന്നതിനു മുന്‍പ് ഒരു ഗ്ലാസ് കരിക്കിന്‍വെള്ളം കുടിച്ചാല്‍ അമിതമായി ഭക്ഷണം കഴിക്കുന്നതിനെ ഇത് തടയുന്നു. ഒപ്പം ദഹനത്തെ സുഗമമാക്കാനും ഇളനീര് സഹായിക്കുന്നു. രക്തസമ്മര്‍ദ്ദത്തെ ക്രമീകരിക്കുന്നതിനും ഇളനീര് നല്ലതാണ്.

ഹൃദയാരോഗ്യത്തിനും ഉത്തമമാണ് ഇളനീര്. ഉറങ്ങാന്‍ പോകുന്നതിനു മുമ്പ് ഇളനീര് കുടിക്കുന്നത് മാനസീക സമ്മര്‍ദ്ദം കുറയ്ക്കാന്‍ സഹായിക്കും. ശരീരത്തിലെ വിഷാംശങ്ങളെ പുറന്തള്ളാനുള്ള നല്ലൊരു മാര്‍ഗ്ഗം കൂടിയാണ് ഇളനീര്. ഈ ചൂടുകാലത്ത് ധൈര്യമായി തന്നെ ശീലമാക്കാം ഇളനീര്.