വിട്ടുമാറാത്ത പനി വേഗം ഭേദമാകാൻ ഇക്കാര്യങ്ങൾ ശ്രദ്ധിക്കാം
ശീതകാലം വരവറിയിച്ചതോടെ സംസ്ഥാനമാകെ പനിച്ചൂടിലാണ്. പനി തുടങ്ങിയവർക്കാകട്ടെ വിട്ടുമാറാൻ കാലതാമസം എടുക്കുന്നുമുണ്ട്. ഫ്ലൂ ലക്ഷണങ്ങൾ സാധാരണയായി ഒരാഴ്ച വരെ നീണ്ടുനിൽക്കും. എന്നാൽ ഏറ്റവും ഗുരുതരമായ ലക്ഷണങ്ങൾ രണ്ടോ മൂന്നോ ദിവസത്തേക്ക് മാത്രമേ ഉണ്ടാകൂ. സുഖം പ്രാപിച്ചതിന് ശേഷവും ക്ഷീണം, ചുമ എന്നിവ അനുഭവപ്പെടുന്നത് തുടരാം. വിട്ട് മാറാത്ത അസ്വസ്ഥതകളിൽ നിന്ന് ആശ്വാസം നേടാൻ ചില കാര്യങ്ങൾ ശ്രദ്ധിക്കാം. (Ways for speedy flu recovery)
വീട്ടിൽ വിശ്രമിക്കാം:
ഫ്ലൂ വൈറസിനെ ചെറുക്കാൻ നിങ്ങളുടെ ശരീരത്തിന് സമയവും ഊർജവും ആവശ്യമാണ്. അതായത് ദിനചര്യകളിൽ മാറ്റം വരുത്തണം. ജോലിയിൽ നിന്നും സ്‌കൂളിൽ നിന്നും ബ്രേക്കെടുത്ത് ശരീരത്തിന് വിശ്രമിക്കാൻ അവസരം ഉണ്ടാക്കുക. ചുറ്റുപാടുള്ളവർക്കും ജോലിസ്ഥലത്തുള്ളവർക്കും പനി പടരുന്നത് തടയാൻ ഇത് സഹായിക്കും.
ഹൈഡ്രേറ്റ്:
പനിയുടെ ഒരു ലക്ഷണം ഉയർന്ന പനിയാണ്. ഇതിനൊപ്പം ഛർദ്ദിയോ വയറിളക്കമോ വന്നേക്കാം. ശരീരത്തിൽ നിന്നും നഷ്ടപ്പെട്ട ജലാംശം തിരിച്ച് പിടിക്കാൻ ധാരാളം വെള്ളം ആവശ്യമാണ്. അണുബാധയെ ചെറുക്കുന്നതിനും വെള്ളം മികച്ചതാണ്. തേൻ ഉപയോഗിച്ച് ഹെർബൽ ടീ അല്ലെങ്കിൽ ചായ കുടിക്കാം. ശരീരത്തിൽ ജലാംശം നിലനിർത്തിക്കൊണ്ട് ഇവ നിങ്ങളുടെ ലക്ഷണങ്ങൾക്ക് ആശ്വാസം പകരും. എപ്പോഴും ഒഴിവാക്കേണ്ട രണ്ട് കാര്യങ്ങൾ മദ്യവും കഫീനും ആണ്.
Read also: അടിക്കടിയുള്ള രോഗങ്ങളും, ക്ഷീണവും; ശരീരത്തിൽ വൈറ്റമിൻ ഡി-യുടെ അഭാവം തിരിച്ചറിയാം!
കഴിയുന്നത്ര ഉറങ്ങുക:
പനിക്കെതിരെ പോരാടുമ്പോൾ ശരീരത്തിന് ഏറ്റവും നല്ല മരുന്നാണ് ഉറക്കം. പതിവിലും നേരത്തെ ഉറങ്ങാം. ശരീരത്തിന് കൂടുതൽ സമയം വീണ്ടെടുക്കാൻ പകൽ സമയത്ത് ഒരു മയക്കവും ആവാം. വിശ്രമവും ഉറക്കവും ന്യുമോണിയ പോലുള്ള ഗുരുതരമായ ഇൻഫ്ലുവൻസ സങ്കീർണതകൾക്കുള്ള സാധ്യത കുറയ്ക്കുന്നു.
ആരോഗ്യകരമായ ഭക്ഷണങ്ങൾ കഴിക്കുക:
പഴങ്ങളും പച്ചക്കറികളും പ്രധാന വിറ്റാമിനുകളും ധാതുക്കളും ആന്റിഓക്‌സിഡന്റുകളും പ്രദാനം ചെയ്യുന്നു. അത് വൈറസിനെതിരെ പോരാടുമ്പോൾ പ്രതിരോധ സംവിധാനത്തെ ശക്തിപ്പെടുത്തുന്നു. വലിയ വിശപ്പ് തോന്നിയില്ലെങ്കിൽ പോലും ആരോഗ്യം നിലനിർത്താൻ പതിവായി ഭക്ഷണം കഴിക്കുന്നത് പ്രധാനമാണ്.
ചുമ കുറയ്ക്കാൻ തേൻ:
തൊണ്ടവേദനയോ ചുമയോ ശമിപ്പിക്കുന്നതിനുള്ള ഒരു പ്രകൃതിദത്ത പരിഹാരമാണ് തേൻ. പക്ഷെ ഒരു വയസ്സിന് താഴെയുള്ള കുട്ടികൾക്ക് തേൻ നൽകാതിരിക്കാൻ ശ്രദ്ധിക്കണം.
Story highlights: Ways for speedy flu recovery
