കുട്ടനാടിന്റെ ചാരുതയില്‍ സണ്ണി വെയ്ന്‍: ‘ഒരു കുട്ടനാടന്‍ ബ്ലോഗി’ലെ പുതിയ ഗാനം കാണാം

മലയാളത്തിന്റെ മെഗാസ്റ്റാര്‍ മമ്മൂട്ടി നായകനായെത്തുന്ന ഒരു കുട്ടനാടന്‍ ബ്ലോഗിലെ പുതിയ വീഡിയോ ഗാനം പുറത്തു വിട്ടു. കുട്ടനാടിന്റെ ചാരുതയില്‍ സണ്ണി വെയ്‌നാണ് ഗാനത്തിലുടനീളം. ഗ്രാമീണതയുടെ ഭംഗി ഒരല്പം പോലും ചോര്‍ന്നുപോകാതെ പ്രതിഫലിക്കുന്നുണ്ട് ഈ ഗാനത്തില്‍. റഫീഖ് അഹമ്മദിന്റെതാണ് വരികള്‍. വിനീത് ശ്രീനിവാസനാണ് ആലാപനം. ശ്രീനാഥ് ശിവസങ്കരനാണ് സംഗീതം നിര്‍വ്വഹിച്ചിരിക്കുന്നത്.

തിരക്കഥാകൃത്തായ സേതു ആദ്യമായി സംവിധാനം ചെയ്യുന്ന ചിത്രമാണ് ഒരു കുട്ടനാടന്‍ ബ്ലോഗ്. നേരത്തെ പുറത്തിറങ്ങിയ ‘മാനത്തെ മാരിവില്‍ ചിറകില്‍…’ എന്നു തുടങ്ങുന്ന ഒരു കുട്ടനാടന്‍ ബ്ലോഗിലെ ഗാനവും ഏറെ പ്രേക്ഷക സ്വീകാര്യത നേടിയിരുന്നു. നാടന്‍ പാട്ടിന്റെ ചേലില്‍ ഒരുക്കിയ ‘ഏലംപാടി ഏലേലേലോ എന്ന് തുടങ്ങുന്ന ഒരു കുട്ടനാടന്‍ ബ്ലോഗിലെ ഗാനത്തിനും മികച്ച പ്രതികരണമാണ് ലഭിച്ചത്. ഇതോടെ വള്ളംകളിക്കൊപ്പം പാടാന്‍ മലയാളികള്‍ക്ക് ഒരു ഗാനം കൂടി സ്വന്തമായി. കുട്ടനാടിന്റെ പശ്ചാത്തലത്തില്‍ ഒരുക്കിയിരിക്കുന്ന ചിത്രത്തില്‍ സണ്ണി വെയ്ന്‍, അനു സിത്താര, ഷംന കാസീം, ലക്ഷ്മി റായി, സിദ്ദിഖ്, നെടുമുടി വേണു, സഞ്ജു ശിവറാം എന്നിവരും കഥാപാത്രങ്ങളായി എത്തുന്നുണ്ട്.

കുട്ടനാട്ടിലെ ഒരു ഗ്രാമപ്രദേശത്തെ ആളുകളുടെ ജീവിതം കേന്ദ്രീകരിച്ചാണ് ചിത്രം മുന്നോട്ട് പോകുന്നത്. ഈ ഗ്രാമത്തില്‍ താമസിക്കുന്ന ഒരു ബ്ലോഗ് എഴുത്തുകാരനായ ഹരി എന്ന വ്യക്തിയായാണ് മമ്മൂട്ടി എത്തുന്നത്. അനന്ത വിഷന്റെ ബാനറില്‍ പി മുരളീധരനും ശാന്താ മുരളീധരനും ചേര്‍ന്നാണ് ചിത്രം നിര്‍മ്മിക്കുന്നത്. മെമ്മറീസിന് ശേഷം ഇരുവരും ചേര്‍ന്ന് നിര്‍മ്മിക്കുന്ന സിനിമയാണ് ഒരു കുട്ടനാടന്‍ ബ്ലോഗ്. പ്രദീപ് ഛായാഗ്രഹണം നിര്‍വഹിക്കുന്ന ചിത്രത്തിനായി സംഗീത സംവിധാനം നിശ്ചയിച്ചിരിക്കുന്നത് ശ്രീനാഥാണ്. ചിത്രത്തിന്റെ പശ്ചാത്തല സംഗീതം നിര്‍വഹിക്കുന്നത് ബിജിബാലാണ്.