ഫാദർ ആംബ്രോസ് ഓച്ചമ്പള്ളിയായി ഇന്ദ്രജിത്ത്; പുതിയ ചിത്രം ഒരുങ്ങുന്നു

വെള്ളിത്തിരയിൽ അഭിനയ വിസ്മയങ്ങള്‍ സൃഷ്ടിക്കുന്ന കലാകാരനാണ് ഇന്ദ്രജിത്  സുകുമാരൻ. താരത്തിന്റെ പുതിയ ചിത്രത്തിന്റെ വിശേഷങ്ങളാണ് ഇപ്പോൾ ആരാധകർക്കിടയിൽ ചർച്ച. നവാഗതനായ കിരൺ പ്രഭാകർ സംവിധാനം ചെയ്യുന്ന താക്കോൽ എന്ന ചിത്രത്തിലാണ് ഇന്ദ്രജിത്ത് പ്രധാന കഥാപാത്രമായി എത്തുന്നത്. ഫാദർ ആംബ്രോസ് ഓച്ചമ്പള്ളിയായാണ് ഇന്ദ്രജിത്ത് വെള്ളിത്തിരയിൽ എത്തുന്നത്. മുരളി ഗോപിയും ചിത്രത്തിൽ കേന്ദ്ര കഥാപാത്രത്തെ അവതരിപ്പിക്കുന്നുണ്ട്. ടിയാൻ എന്ന ചിത്രത്തിന് ശേഷം ഇന്ദ്രജിത്തും  മുരളി ഗോപിയും വീണ്ടുമൊന്നിക്കുന്ന താക്കോൽ ഹാസ്യത്തിനും  സസ്പെന്സിനും ഒരുപോലെ പ്രാധാന്യം നൽകുന്ന ചിത്രമായിരിക്കുമെന്നാണ് സൂചന.

സംവിധായകൻ ഷാജി കൈലാസാണ് ചിത്രം നിർമ്മിക്കുന്നത്. മികച്ച തിരക്കഥ അവലംബമാക്കിയൊരുങ്ങുന്ന താക്കോൽ തീർത്തും വ്യത്യസ്ഥമായ ഒരു സിനിമയിയിരിക്കുമെന്ന് ഷാജി കൈലാസ് അഭിപ്രായപ്പെട്ടു. എം ജയചന്ദ്രനാണ് ചിത്രത്തിലെ ഗാനങ്ങൾക്ക് സംഗീതം നൽകുന്നത്.ലെഫ്റ്റ് റൈറ്റ് ലെഫ്റ്റ്, കാഞ്ചി,  ഈ അടുത്ത കാലത്ത്, ടിയാൻ എന്നിവയാണ് ഇന്ദ്രജിത്തും മുരളി ഗോപിയും ഒന്നിച്ചഭിനയിച്ച ചിത്രങ്ങൾ. റസൂല്‍ പൂക്കുട്ടിയാണ് ചിത്രത്തിന്റെ സൗണ്ട് ഡിസൈന്‍. എം ജയചന്ദ്രനാണ് സംഗീത സംവിധായകന്‍. ശ്യാമ പ്രസാദ് സംവിധാനം ചെയ്ത ഇലക്ട്ര എന്ന സിനിമയുടെ തിരക്കഥ രചനയിലൂടെ ശ്രദ്ധ നേടിയ എഴുത്തുകാരന്‍ കൂടിയാണ് കിരണ്‍ പ്രഭാകരന്‍. അരനാഴിക നേരം എന്ന സീരിയലിന്റെ തിരക്കഥയ്ക്ക് സംസ്ഥാന അവാര്‍ഡും അദ്ദേഹം നേടിയിരുന്നു. ചിത്രത്തിൽ പ്രധാനകഥാപാത്രങ്ങളായി രഞ്ജി പണിക്കരും നെടുമുടി വേണുവും വേഷമിടുന്നുണ്ട്.

“ഇന്ദ്രജിത്തും മുരളി ഗോപിയുമാണ് പ്രധാന കഥാപാത്രങ്ങളെ അവതരിപ്പിക്കുന്നത്. അവർ രണ്ടു പേരും  തമ്മിലുള്ള  കെമിസ്ട്രിയാണ് സിനിമയുടെ ചാലക ശക്തി. തിരക്കഥ പൂർത്തിയായപ്പോൾ തന്നെ ഇതിലേക്ക് ഇന്ദ്രജിത്തും മുരളി ഗോപിയുമായിരിക്കും ഏറ്റവും അനുയോജ്യരെന്നു തോന്നി . അവരെ സമീപിച്ചപ്പോള്‍ രണ്ടു പേര്‍ക്കും തിരക്കഥ ഇഷ്ടമായി സസ്പെൻസ് എലെമെന്റുമായെത്തുന്ന ചിത്രം ഹാസ്യത്തിന്റെ അകമ്പടിയോടെയായിരിക്കും അവതരിപ്പിക്കുന്നത്”. സംവിധായകന്‍ കിരണ്‍ ഇന്ത്യന്‍ എക്‌സ്പ്രസിന് നല്‍കിയ അഭിമുഖത്തില്‍ പറഞ്ഞു.

അതേസമയം ഇന്ദ്രജിത്ത് നായകനായെത്തുന്ന’ ആഹാ’ എന്ന ചിത്രവും അണിയറയില്‍ ഒരുങ്ങുന്നുണ്ട്. വടം വലി പ്രമേയമാക്കിയാണ് ചിത്രം ഒരുക്കുന്നത്. എഡിറ്ററായ ബിബിന്‍ പോള്‍ സാമുവലിന്റെ ആദ്യ സംവിധാന സംരംഭമാണ് ‘ആഹാ’.