‘പതിനെട്ടാം പടി’യിൽ പ്രിയാ മണിയും; ചിത്രം ജൂലൈ അഞ്ചിന്
മമ്മൂട്ടി കഥാപാത്രമായെത്തുന്ന പുതിയ ചിത്രമാണ് ‘പതിനെട്ടാം പടി’. ചിത്രത്തില്‍ പൃഥ്വിരാജും ഉണ്ണി മുകുന്ദനുമൊപ്പം പ്രിയാ മണിയും കഥാപാത്രങ്ങളായെത്തുന്നുണ്ട്. പതിനെട്ടാം പടിയിലൂടെ ചെറിയ ഒരിടവേളയ്ക്ക് ശേഷം പ്രിയാമണി മലയാളത്തിലേക്ക് മടങ്ങി എത്തിയിരിക്കുകയാണ്. കേന്ദ്ര കഥാപാത്രമായ കുട്ടിയുടെ സഹോദരിയുടെ റോളാണ് പ്രിയാമണിയ്ക്ക്. ചിത്രത്തിന്റെ സെന്‍സറിങ് പൂര്‍ത്തിയായി. യു/ എ സര്‍ട്ടിഫിക്കറ്റാണ് ചിത്രത്തിന് ലഭിച്ചിരിക്കുന്നത്. ചിത്രം ജൂലൈ അഞ്ചിന് തീയറ്ററുകളിലെത്തും. രണ്ട് മണിക്കൂര്‍ 35 മിനിറ്റാണ് സിനിമയുടെ ദൈര്‍ഘ്യം.
ചിത്രത്തിന്റെ തിരക്കഥയും സംവിധാനവും നിര്‍വ്വഹിക്കുന്നത് ശങ്കര്‍ രാമകൃഷ്ണനാണ്. ആര്യ, അഹാന കൃഷ്ണ, മനോജ് കെ ജയന്‍, മണിയന്‍ പിള്ള, ലാലു അലക്‌സ്, സുരാജ് വെഞ്ഞാറമൂട് എന്നിങ്ങനെ നിരവധി താരനിരകള്‍ അണിനിരക്കുന്ന ചിത്രമാണ് പതിനെട്ടാംപടി. ഇതിനുപുറമെ നിരവധി പുതുമുഖ താരങ്ങളും ചിത്രത്തില്‍ അണിനിരക്കുന്നുണ്ട്. മമ്മൂട്ടിയും പൃഥ്വിരാജും ഉണ്ണിമുകുന്ദനും ഒരു അതിഥി വേഷത്തിലാണ് ചിത്രത്തിലെത്തുക.
ആഗസ്റ്റ് സിനിമാസിനു വേണ്ടി ശങ്കര്‍ രാമകൃഷ്ണന്‍ സംവിധാനം നിര്‍വ്വഹിക്കുന്ന ചിത്രമാണ് പതിനെട്ടാം പടി. ഉറുമി എന്ന സിനിമയ്ക്ക ശേഷം ഇരുവരും ഒന്നിക്കുന്ന ചിത്രമാണ് പതിനെട്ടാം പടി. സ്റ്റാന്‍ഫോര്‍ഡ് യൂണിവേഴ്‌സിറ്റി പ്രൊഫസറുടെ റോളിലാണ് മമ്മൂട്ടി ചിത്രത്തിലെത്തുക. പതിനെട്ടാം പടി എന്ന ചിത്രത്തിന്റേതായി പുറത്തിറങ്ങിയ ഗാനങ്ങള്‍ക്കും മികച്ച സ്വീകാര്യത ലഭിക്കുന്നുണ്ട്. ചിത്രത്തിന്റെ ട്രെയ്ലർ അടുത്തിടെ പുറത്തിറങ്ങിയിരുന്നു. ആക്ഷനും സസ്‌പെന്‍സുമെല്ലാം നിറച്ചാണ് ചിത്രത്തിന്റെ ട്രെയ്‌ലര്‍ ഒരുക്കിയിരിക്കുന്നത്. യുട്യൂബില്‍ പങ്കുവച്ച ട്രെയ്‌ലര്‍ മണിക്കൂറുകള്‍ക്കൊണ്ട് ലക്ഷക്കണക്കിന് ആളുകളാണ് കണ്ടത്. മികച്ച പ്രതികരണമാണ് ട്രെയ്‌ലറിന് ലഭിക്കുന്നതും.
Read also: ‘വാനിൽ ചന്ദ്രിക’; ആരാധകർ കാത്തിരുന്ന ‘ലൂക്ക’യിലെ ആ മനോഹരഗാനമിതാ
എബ്രഹാം പാലയ്ക്കല്‍ എന്നാണ് ചിത്രത്തിലെ മമ്മൂട്ടി കഥാപാത്രത്തിന്റെ പേര്. തൊണ്ണൂറുകളുടെ പശ്ചാത്തലത്തില്‍ ഒരുങ്ങുന്നതാണ് ചിത്രം. ചിത്രത്തിന് വേണ്ടിയുള്ള മമ്മൂട്ടിയുടെ പുതിയ മേക്ക് ഓവര്‍ ചലച്ചിത്ര ലോകത്ത് നേരത്തെതന്നെ ശ്രദ്ധേയമായിരുന്നു. സ്‌റ്റൈലിഷ് ലുക്കിലാണ് മമ്മൂട്ടിയെ അവതരിപ്പിച്ചിരിക്കുന്നത്. ശങ്കര്‍ രാമകൃഷ്ണന്റെ രണ്ടാമത്തെ സംവിധാന സംരംഭം കൂടിയാണ് ’18ാം പടി’. ‘കേരള കഫേ’യാണ് ശങ്കര്‍ രാമകൃഷ്ണന്‍ സംവിധാനം നിര്‍വ്വഹിച്ച ആദ്യ ചിത്രം. ഈ ചിത്രവും തീയറ്ററുകളില്‍ മികച്ച പ്രതികരണം നേടിയിരുന്നു.
