ലേഡീസ് ഹോസ്റ്റലിലെ ചിരിമേളവുമായി ‘അശുഭമംഗളകാരി..’; ‘സൂപ്പർ ശരണ്യ’യിലെ ഗാനം
‘തണ്ണീർമത്തൻ ദിനങ്ങൾക്ക് ശേഷം ഗിരീഷ് എ ഡിയുടെ സംവിധാനത്തിൽ ഒരുങ്ങുന്ന ചിത്രമാണ് ‘സൂപ്പർ ശരണ്യ’. അനശ്വര രാജൻ നായികയാകുന്ന ചിത്രത്തിലെ ആദ്യഗാനമെത്തി. ഒരു ലേഡീസ് ഹോസ്റ്റൽ കാഴ്ചകളിലൂടെയാണ് ‘അശുഭമംഗളകാരി..’ എന്ന ഗാനം പ്രേക്ഷകരിലേക്ക് എത്തിയിരിക്കുന്നത്. സുഹൈൽ കോയയുടെ വരികൾക്ക് ജസ്റ്റിൻ വർഗീസ് ഈണം പകർന്നിരിക്കുന്നു. ശരത്തും മീര ജോണിയും ചേർന്നാണ് ഗാനം ആലപിച്ചിരിക്കുന്നത്.
ഡിനോയ് പൗലോസും ഗിരീഷ് എഡിയും ചേർന്ന് രചിച്ച ‘തണ്ണീർമത്തൻ ദിനങ്ങൾ’ നിർമിച്ച പ്ലാൻ ജെ സ്റ്റുഡിയോയും, ഷെബിൻ ബെക്കർ പ്രൊഡക്ഷൻസും ചേർന്നാണ് ’ സൂപ്പർ ശരണ്യ’യും ഒരുങ്ങുന്നത്. ചിത്രത്തിനായി ഗിരീഷ് എ ഡിയും ഷെബിൻ ബെക്കർ പ്രൊഡക്ഷൻസും വീണ്ടും ഒന്നിക്കുകയാണ്. അർജുൻ അശോകനാണ് ചിത്രത്തിൽ നായകനായി എത്തുന്നത്. മമിതാ ബിജുവും പ്രധാന വേഷത്തിൽ എത്തുന്നുണ്ട്.
അതേസമയം, കൊച്ചു സിനിമയുടെ വലിയ വിജയമായിരുന്നു തണ്ണീർമത്തൻ ദിനങ്ങളിലൂടെ കേരളം സാക്ഷ്യം വഹിച്ചത്. ചിത്രം 50 കോടി ക്ലബ്ബിലും ഇടംനേടിയിരുന്നു. അതേ ടീം വീണ്ടും ഒന്നിക്കുമ്പോൾ പ്രതീക്ഷയോടെയാണ് പ്രേക്ഷകരും. തണ്ണീർമത്തൻ ദിനങ്ങളിലും അനശ്വര രാജനായിരുന്നു നായിക.
Read Also: ‘കാട്ടിലെ പാഴ്‌മുളംതണ്ടിൽ നിന്നും..’- സർഗ്ഗവേദിയിൽ പാട്ടിന്റെ പാലാഴി തീർത്ത് ബെവൻ; വിഡിയോ
ഉദാഹരണം സുജാത എന്ന ചിത്രത്തിലൂടെയാണ് അനശ്വര സിനിമാ അഭിനയം തുടങ്ങിയത്. 2019 ൽ പുറത്തിറങ്ങിയ തണ്ണീർ മത്തൻ ദിനങ്ങൾ ആണ് അനശ്വരയെ പ്രേക്ഷക പ്രിയങ്കരിയാക്കിയത്. ആദ്യരാത്രി, വാങ്ക് എന്നീ ചിത്രങ്ങളിലൂടെയും അനശ്വര ശ്രദ്ധ നേടി. മലയാള സിനിമകളുടെ വിജയത്തോടെ തമിഴകത്തേക്കും ചുവടുവെച്ചിരിക്കുകയാണ് അനശ്വര.
Story highlights- video song ‘Ashubha Mangalakaari’ from Super Sharanya
