ദന്തരോഗങ്ങള്‍ പ്രാരംഭത്തിലേ തിരിച്ചറിഞ്ഞ് പരിഹരിക്കാം
മനുഷ്യ ശരീരത്തില്‍ എല്ലു പോലെതന്നെ പ്രധാനമാണ് പല്ലും. എന്നാല്‍ പലരും ഇന്ന് പല്ലുകളെ വേണ്ടവിധത്തില്‍ സംരക്ഷിക്കാറില്ല. പല്ലുവേദന കഠിനമാകുമ്പോള്‍ മാത്രമാണ് പലരും വൈദ്യസഹായം തേടുന്നതുപോലും. ഇത്തരം കാലതാമസം പല്ലുകളുടെ എന്നെന്നേയ്ക്കുമുള്ള നാശത്തിനു തന്നെ കാരണമാകുന്നു. പല്ലുകള്‍ക്ക് ഉണ്ടാകാറുള്ള ചില അസ്വസ്ഥതകളെ പ്രാരംഭത്തില്‍ തന്നെ തിരിച്ചറിഞ്ഞാല്‍ വലിയ രീതിയിലുള്ള കേടുപാടുകളില്‍ നിന്നും പല്ലിനെ സംരക്ഷിക്കാം.
പലരും ഇന്ന് നേരിടുന്ന ഒരു പ്രശ്‌നമാണ് മോണയില്‍ നിന്നുള്ള രക്തസ്രാവം. മോണയില്‍ ആഹാരപദാര്‍ത്ഥങ്ങള്‍ തങ്ങി നിന്ന് പല്ലിന് കേടു വരാന്‍ തുടങ്ങുമ്പോഴാണ് ഇത്തരത്തില്‍ മോണകള്‍ക്കിടയില്‍ നിന്നും രക്തം പൊടിയുന്നത്. എന്നാല്‍ പല്ല് കൃത്യമായി ക്ലീന്‍ ചെയ്താല്‍ ഈ പ്രശ്‌നത്തില്‍ നിന്നും മുക്തി നേടാം. ഈ ലക്ഷണം കണ്ടു തുടങ്ങുമ്പോള്‍തന്നെ പല്ലിനെ വേണ്ടവിധം പരിപാലിക്കേണ്ടതുണ്ട്. ഇല്ലെങ്കില്‍ കേട് കൂടുകയും പല്ല് നശിച്ചുപോകാനും സാധ്യത ഉണ്ട്.
Read also: 24 കണക്ട് റോഡ് ഷോ തൃശ്ശൂരിൽ രണ്ടാം ദിനം; ‘തിരിച്ചുകിട്ടുമോ ലൈഫ്’ വിഷയത്തിൽ വടക്കാഞ്ചേരിയിൽ ജനകീയ സംവാദം
പല്ലുകളില്‍ ചെറിയ പൊത്തുകള്‍ പ്രത്യക്ഷപ്പെടുന്നതാണ് പല്ല് കേടാകുന്നു എന്ന സൂചന നല്‍കുന്ന അടുത്ത ലക്ഷണം. ഈ ലക്ഷണം കണ്ടാല്‍ ദന്തഡോക്ടറിനെ സമീപിക്കുന്നതാണ് നല്ലത്. ചെറിയ പൊത്തുകള്‍ അടച്ചില്ലെങ്കില്‍ കേടു വര്‍ധിക്കാനുള്ള സാധ്യതയുണ്ട്. ഇത്തരം പൊത്തുകള്‍ സേഫ്റ്റി പിന്‍, ഈര്‍ക്കില്‍ തുടങ്ങിയവ ഉപയോഗിച്ച് സ്വയം ക്ലീന്‍ ചെയ്യാന്‍ ശ്രമിക്കുന്നതും കൂടുതല്‍ അപകടങ്ങള്‍ ക്ഷണിച്ചുവരുത്തും. മാത്രമല്ല പല്ലു വേദന കൂടാനും ഇത് കാരണമാകും.
വീഴ്ചയ്ക്കിടയില്‍ പല്ലു പോകുന്നതും സര്‍വ്വസാധാരണമാണ്. ഇത്തരം സന്ദര്‍ഭങ്ങളിലും ദന്ത ഡോക്ടര്‍മാരെ സമീപിക്കുന്നതാണ് ഏറ്റവും ഉചിതം. വീഴ്ചയില്‍ കൊഴിഞ്ഞു പോകുന്ന പല്ല് ചില പ്രത്യേ സന്ദര്‍ഭങ്ങളില്‍ വായ്ക്കുള്ളിലെ ഉമിനീരില്‍ തന്നെ സൂക്ഷിച്ചാലും പുനസ്ഥാപിക്കാന്‍ കഴിയും. അതുകൊണ്ടു തന്നെ വീഴ്ചയില്‍ പല്ല് നഷ്ടപ്പെടുമ്പോള്‍ ഉടന്‍തന്നെ ദന്ത ഡോക്ടറിനെ സമീപിക്കുന്നതാണ് ഉചിതം.
Story highlights: Solutions for Common dental problems
